Ebaruha y’erimbere ya Petro 3:1-22
3 Kutya, inywe bakali, mubye mukasikya abalume benyu, neryo hamabya abatekwama ekinywa, bakurawe butsira ekinywa erilabira emighendere y’abakali babo.
2 Kundi bakendibya ibabiriyilangirira emighendere yenyu eyuwene n’erisikya rinene.
3 Obubuya* bwenyu isibwabya bw’ehihya, ni bugha ambu, eriluka esyonzwiri, eriyipamba omo bindu by’ehoro kutse esyongyimba esyuwene.
4 Aliwe, bubye omundu w’emwisi, obubuya obutetsanda, ni bugha ambu, omutima molo n’ow’obuholo, owo bughuli bunene omo meso w’oMungu.
5 Kundi abakali babuyirire ba kera ababya bakahira amaha wabo omo Mungu ko babya bakayipamba* batya. Ibo babya bakasikya abalume babo,
6 nga Sara oyo wabya akasikya Abrahamu n’erimwahulamo mukama. Nenyu mwabiribya bali biwe mwamatendileka erikola ebyuwene, kandi mwamatendisagha.
7 Kutya, inywe balume, mwikale n’abakali benyu n’amenge.* Mubasikaye ng’ekindu ekyoloberere kubalenga, ni bugha ambu, ekindu ky’obukali, kundi busana n’olukogho lwiwe, oMungu akendisyabaha engebe nga nywe. Mutitabasikya, oMungu isyendyowa emisabe yenyu.
8 Oko nduli, inywe bosi mubye n’amalengekania maghumerera. Mubye mukayihira omo mwanya w’abandi. Mwanzane ng’abasubeneko. Mubye mukakwira abandi b’obulighe. Kandi mubye mukayikehya.
9 Omundu amabakolera ekibi, inywe isimwamukolera ekibi. Kutse omundu amabatsamba, inywe isimwamutsamba. Aliwe, mumutsumule kundi mwabirikirawa busana n’ekyo, mutoke erisyabana emiyisa.
10 Kundi oyo wanzire engebe n’eribyaho omo butseme, ritolere iniateya olulimi lwiwe lukasyabugha emyatsi mibi, n’eminywa yiwe yikasyabugha amabehi.
11 Ritolere inialeka ebibi n’erikola ebyuwene, asondaye obuholo n’erikwamirirabo.
12 Kundi ameso wa Yehova* akabya inianemulangira abatunganene, n’amatwi wiwe akabya inianemuhulikirira emisabe yabo y’erilemba-lemba. Aliwe, Yehova* aponire abakakola ebituwene.
13 Mwamabya n’omuhwa w’erikola ebyuwene, nindi yo wangabakolera muhanda?
14 Aliwe, mwamaghalwa busana n’eritunganene, mutsemire. Nomo bine bitya, simusaghe ebikaleka ibasagha,* kandi simuhanga-hangaye.
15 Aliwe, omo mitima yenyu, muminye ngoko Kristo ni mubuyirire kandi ngoko ni Mukama. Omughulu wosi, mubye imune tayari erisubirya obuli mundu oyukababulaya amabulyo oko maha ogho muli nagho. Aliwe, mumusubiraye omo bolo n’omw’isikya rinene.
16 Mubye n’obunya-mutima* obuwene, kusudi nomo bandu bangabugha muhanda okw’inywe, bahemuke busana n’emighendere yenyu eyuwene, kundi mukakwama Kristo.
17 Kusangwa oMungu amaligha ati mughalawe busana n’erikola ekyuwene, aho ikyuwene, kulenga kw’eryaghalwa busana n’erikola ebituwene.
18 Kristo mwahola kaghuma kasa busana n’amalolo. Abya iniatunganene, aliwe mwahola busana n’abatatunganene. Mwahola atoke eribatwala oko Mungu. Mwahola ini mundu w’omubiri, aliwe mwalubuka iniabiribya mulimu.
19 Neryo ini mulimu, mwayahubirya emilimu eyiri omo ngomo.
20 Eyo yo milimu eyatasikaya oMungu kera omughulu oMungu abya akalindirira inianemuhanda omutima* omo biro bya Noa, omughulu obwato bwabya bukahimbwa. Abandu bake, ni bugha ambu, esyonafsi* munani mubasabuka endata w’amaghetse.
21 Ebyalaba omo biro ebyo bilingene n’olubatiso, olunemubasabula lino. Olubatiso silulilusaya omutsafu oko mubiri. Aliwe, omughulu omundu akabatisibawa, akabya iniakasaba oMungu obunya-mutima* obuwene. Kandi olubatiso lukasabula erilabira erilubuka rya Yesu Kristo.
22 Oyu, ali oko luhande lw’amali lw’oMungu, kundi mwaghenda elubula n’eriyirwamo mutabali oko bamalaika, abakulu, n’ab’obutoki.
Amaelezo awehikwa
^ Kutse “Eriyipamba.”
^ Kutse “bakayiyiramo babuya.”
^ Kutse “omo nzira eyikakanganaya ngoko mwasibo ndeke.”
^ Kutse “obusu bwa Yehova.” Ulebaye endomeko A5.
^ Ulebaye endomeko A5.
^ Kutse kandi, “simusaghe ebyo bakasaghisayamo abandu.”
^ Kutse “ezamiri.”
^ Kinywa kwa kinywa, “erihanda omutima ry’oMungu ryabya rikalindirira.”
^ Kutse “abandu.”
^ Kutse “ezamiri.”
