Ebaruha y’erimbere ya Petro 4:1-19
4 Kundi Kristo mwaghalwa omo mubiri, nenyu kutya mubye n’amalengekania awali nga wiwe kusangwa oyo wabiryaghalwa omo mubiri abirileka amalolo,
2 kusudi alabaye ebiro ebyo akine nabyo omo mubiri omw’ikola ebyo oMungu anzire, butsira omw’ikwama esyongumbu sy’abandu.
3 Oko kwenene, mwabiribugha mughulu muli mukakola ebyo bandu banzire. Omo mughulu oyo, mwabya mukakola emyatsi y’obutakw’isoni,* mwabya n’esyongumbu esilabiryeho kateho, mwabya mukatamira, mwabya mukakola esyofete esilabiryeho kateho, mwabya bakundirya, kandi mwabya mukaramya esyosanamu omo nzira eyikita esyonye.
4 Abandu bakasweka bakalangira ngoko simukikola haghuma nabo emyatsi eyo eyikita esyonye, n’ekyo kikaleka ibababughako muhanda.
5 Aliwe, abandu abo bakendisyatonda embere sy’oyuli tayari eritswera abaliho n’abaholire.
6 Oko kwenene, ekyo kyo kyabirileka engulu mbuya iyahubiribwa n’oko baholire, kusudi nomo bangatswerwa omo mubiri erikwamana n’amalengekania w’abandu, babye bakasondolwa n’ekirimu ky’oMungu.
7 Aliwe, enduli y’emyatsi yosi yiri hakuhi. Neryo mubye abandu abakalengekanaya ndeke, kandi isimwibirirawa eribya mukasaba.
8 Nikwa ekikulu oko byosi, mwanzane kutsibu kundi olwanzo lukaswika amalolo mangyi.
9 Mukokanaye butsir’iyilungumula.
10 Obuli mughuma w’okw’inywe abirihabwa ekihembo. Neryo akolesayekyo omw’ikolera abandi. Abye ng’omwimaniri oyukawatikaya abandi eribana endundi y’olukogho lw’oMungu, olukalangirika omo syonzira mbiriri-mbiriri.
11 Oyukabugha, abughe ng’akabugha ebinywa by’oMungu. Oyukakolera abandi, ayiketere akaghala ako Mungu akatuha, kusudi oMungu apipawe omo myatsi yosi erilabira Yesu Kristo. Olukengerwa n’amaka ni biwe kera na kera. Amina.
12 Banzwa baghe, isimwasweka busana n’amaligho awakalire agho munemulabamo. Isimwabya nga mwamahikirwa n’ekindu ekitekyatahikira abandi.
13 Aliwe, mubye imunatsemire kundi munemwaghalwa nga Kristo, mutoke erisyatsema n’eriyitsangura omughulu w’eribisulirwa ry’olukengerwa lwiwe.
14 Mwamatsambwa busana n’erina rya Kristo, imutsemire, kundi ekyo kikakanganaya ngoko ekirimu ky’olukengerwa, ni bugha ambu, ekirimu ky’oMungu kiri okw’inywe.
15 Aliwe, sihabye n’omughuma w’okw’inywe oyukaghalawa busana n’eriita, eriba, erikola ebibi, kutse eriyingirya omo myatsi y’abandi.
16 Nikwa omundu amaghalwa busana n’eribya Mukristo, ekyo isikyaleka iniakwa esisoni. Aliwe, syaleke eripipa oMungu iniane n’emibere y’Ekikristo.
17 Kundi ono w’omughulu ogho oMungu ahiraho eritsuka eritswera, kandi akenditsuka eritswera ab’omo nyumba yiwe. Neryo amabitutsukako, ibikendibya biti oko abatehulikirira engulu mbuya y’oMungu?
18 “Kandi omutunganene amabya iniakasabuka okw’ibulikira, ibikendisyabya biti oko mundu oyutekenga oMungu n’oyukakola amalolo?”
19 Kwesi, abakaghalawa busana n’erikola ebyo oMungu anzire babye bakayihira* omo byala by’omuhangyiki mutaleghula ibanemukola ebyuwene.
Amaelezo awehikwa
^ Kutse “emibere y’eritendikw’isoni.” Obungyi bw’ekinywa kye Kigiriki a·selʹgei·a. Ulebaye amaana w’ebinywa.
^ Kutse “bakahira esyonafsi syabo.”
