Samweli w’Erimbere 1:1-28
1 E Ramataimu-zofimu,* eyiri omo kiharo ky’ebitwa kye Efraimu, yabya omulume oyukahulawa mo Elkana. Abya mughala wa Yehoramu, mughala wa Elihu, mughala wa Tohu, mughala wa Zufi, Omuefraimu.
2 Abya n’abakali babiri. Omughuma iniakahulawa mo Hana, n’oghundi iniakahulawa mo Penina. Penina abya n’abana, aliwe Hana syabya awite oko bana.
3 Obuli mwaka, Elkana iniakalua omo muyi wiwe, iniaya e Shilo akayaramya n’eriherera Yehova w’emilondo y’amahere. Eyo yo baghala babiri ba Eli, ye Hofni na Finehasi, babya bakakolera Yehova ng’abahereri.
4 Kiro kighuma, Elkana mwaherera obuhere. Neryo mwaha Penina y’amaghabo, amahagho n’abaghala n’abali biwe bosi,
5 aliwe mwaha Hana y’erighabo righuma eryuwene, kundi abya anzire Hana kulenga Penina. Aliwe Yehova abya isyalyaha Hana y’abana.*
6 Nikwa Penina, omumbanda wiwe, iniakabya inianemumusekererya busana n’erimwaghalya kundi Yehova abya isyalyamuha abana.
7 Ekyo kyo Penina abya iniakakola obuli mwaka, omughulu Hana abya akaya eyiri enyumba ya Yehova. Penina, omumbanda wiwe, iniakamusekereraya kutsibu, neryo Hana iniakabera erilira. Isyangasyatoka n’erirya.
8 Neryo mwira wiwe, ye Elkana, mwamubwira ati: “Hana, ukalira busanaki? Siwetalya busanaki? Kandi busanaki wabiribya omo bulighe? Siwasi ngoko niri w’omughaso okw’iwe kulenga abana 10 b’obulume?”
9 Babere babibugha erirya n’erinywa ibane e Shilo, Hana mwahangana. Oko ndambi eyo, omuhereri Eli abya inianikere oko kitumbi kiwe, hakuhi n’omulango w’ehekalu* ya Yehova.
10 Hana abya omo bulighe bunene, neryo mwasaba Yehova, kandi mwalira kutsibu.
11 Mwayilagha ati: “Yehova w’emilondo, langira ngoko ngaghalawa kutsibu. Wamabinibuka, ingye mughombe waghu, n’eritendinibirirwa ingye mughombe waghu, kandi wamabiha omughombe waghu y’omwana w’obulume, ingendisyamuha Yehova biro byosi ebyo akendisyabya inianeho. Ekitibo isikyendisyalaba oko mutwe wiwe.”
12 Hana mwabugha mughulu muli akasaba Yehova. Omo mughulu wosi oyo, Eli abya akasamalira obuno bwa Hana.
13 Hana abya akabughira omo mutima, eminywa yiwe misa yo yabya ikasegha-seghana, aliwe omulenge wiwe syabya akowika. Neryo Eli mwalengekania ati Hana abiritamira.
14 Eli mwabwira Hana ati: “Ukendikolya obukundirya bwaghu bo hayi? Leka obwabu.”
15 Neryo Hana mwamusubirya ati: “Iyehe, mukama waghe, niri mukali oyukaghalawa kutsibu. Sinditanywa edivai kutse obundi bwabu bosi-bosi obukatamiraya. Aliwe ninemubwira Yehova ebyosi ebiri omo mutima waghe.
16 Isiwalengekanaya uti omughombe waghu ni mukiru. Eryaghalwa n’erihangya-hangya kutsibu byo bikaleka inasaba erihika lino.”
17 Eli mwamusubirya ati: “Ughende buholo, oMungu we Israeli akuhe ekyo ulyamusaba.”
18 Omukali oyo mwabugha ati: “Wasingya erikangania omughombe waghu y’olukogho.” Neryo omukali oyo mwayighendera, amalya, n’obusu bwiwe mubutasyabya omo bulighe.
19 Neryo Elkana n’ekihanda kiwe mubabuka omo tututu, bamayakukama embere sya Yehova, n’enyuma sy’aho mubasuba ewabo e Rama. Elkana mwaghotsera n’omukali wiwe ye Hana, na Yehova mwibuka Hana.
20 Omo mwaka mughuma,* Hana mwabya mukule, amabuta n’omwana w’obulume. Mwamuha erina rya Samweli,* kundi mwabugha ati: “Yehova yo niryasaba omwana oyu.”
21 Habere habilaba mughulu mulebe, Elkana mwaghenda n’ekihanda kiwe, amayaherera Yehova y’obuhere b’obuli mwaka, kandi mwaghenda busana n’eriherera obuhere bw’eriyilagha.
22 Aliwe Hana mwataghenda nabo, kundi mwabwira omwira wiwe ati: “Omwana akendisyabya abitsira amabere, ngendisyamutwalayo. Akendisyahika embere sya Yehova, neryo iniasighalayo biro byosi.”
23 Neryo Elkana, omwira wiwe, mwamubwira ati: “Kola ekyo wamalangira mo kibuya. Usighale eka erihika omughulu omwana akendisyatsira amabere. Na Yehova aberereraye ebyo wamabugha.” Neryo Hana mwasighala ewiwe n’erinyonyesya omwana wiwe erihika omughulu atsira amabere.
24 Abere abimutsirisya amabere, mwamutwala e Shilo. Mwaghendayo n’enume y’ende ey’emyaka isatu, e efa* nguma y’efarine, n’erilegha rinene ry’edivai. Neryo mwaya e Shilo eyiri enyumba ya Yehova, haghuma n’omulwana wiwe.
25 Neryo mubakera enume y’ende eyo, bamatwalira Eli y’omulwana.
26 Neryo Hana mwabugha ati: “Unganyire, mukama waghe! Oko kwenene-kwenene ngoko uliho, n’ingye mukali oyo kiro kighuma nabya nimene naghu omo mwanya ono ininemusaba Yehova.
27 Omulwana ono yo nabya ngasaba niti oMungu ambe iye, na Yehova abirimba ekyo namusaba.
28 Neryo naghe ngamubweka Yehova. Ngamubweka Yehova omo biro byosi ebyo akendisyabya inianeho.”
Neryo mwakukama* n’erihira obusu bwiwe oko kitaka embere sya Yehova.
Amaelezo awehikwa
^ Kutse “Omuzufi we Rama.”
^ Kinywa kwa kinywa, “abya iniabirikinga enda yiwe.”
^ Ni bugha ambu, “w’ehema.”
^ Kutse alinga, “Endambi yabere yahika.”
^ Ni bugha ambu “erina ry’oMungu.”
^ E efa nguma ini hakuhi syolitre 22. Ulebaye Endomeko B14.
^ Alinga Elkana yo wakukama.
