Samweli w’Erimbere 10:1-27
10 Neryo Samweli mwimya etsupa y’amaghuta, amutagho oko mutwe wa Sauli. Mwamuha ebizu n’erimubwira ati: “Yehova amabikuhirako amaghuta utoke erisondola abandu biwe.
2 Munabwire ukendibya wabighenda, ukendisangana abalume babiri hakuhi n’eyisinda ya Rakeli eyiri omo kiharo kya Benyamini, e Zelza. Bakendikubwira bati, ‘Esyopunda esyo wayarondaya syabirisungika. Lino baba waghu syakihanga-hangaya busana n’esyopunda esyo, aliwe iwe ukaleka iniahangya-hangya. Anemubugha ati: “Ngendisunga omwana waghe yo niti?”’
3 Neryo uyahike hakuhi n’omuti munene we Tabori, ukendyeyayo abalume basatu ibanemuhetukira e Beteli busana n’eriyaramya oMungu w’ekwenene. Omughuma ahekire ebyana bisatu by’esyombene, oghundi ahekire emikati isatu, n’ow’akasatu ahekire erilegha rinene eririmo edivai.
4 Bakendikubulya nga unuwene, neryo ibakuha emikati ibiri. Isiwaghanayo.
5 Enyuma sy’aho, ukendiya oko katwa k’oMungu w’ekwenene eyo Abafilistini babirihira ekambi yabo. Ukendibya wabihika omo muyi, ukendisangana ekikuto ky’Abaminyereri bakalua omo mwanya w’endata ibanemubugha obuminyereri. Embere syabo yikendibya abandu abanemuwata ekyombo ky’omuziki ekiriko esyosinga, kandi ibanemuwata akaghoma, enyabulera, n’enanga.
6 Ekirimu kya Yehova kikendikuha akaghala, neryo naghu ukendibugha obuminyereri haghuma nabo, kandi ukendiyirwa mo ghundi mundu.
7 Ukendibya wabilangira emyatsi eyo, ngambe iwakola ekyosi-kyosi ekyo wangatoka, kundi oMungu w’ekwenene ane haghuma naghu.
8 Ubye embere, uye e Gilgali. Ngendikweyayo ininemuyaherera amahere w’eryokererya n’amahere w’obuholo. Ukendisyanilinda omo biro 7. Ngendisyabya nahika, inakubwira ebyo utolere iwakola.”
9 Sauli abere abilua ahali Samweli, oMungu mwatsuka eribindula omutima wiwe. Mwatasyabya ngoko akanabya, n’ebyosi ebyo bamubwira ambu bikendibya mubyabya ekiro ekyo.
10 Neryo Sauli n’omughombe wiwe mubaya oko katwa, mubahindana n’ekikuto ky’abaminyereri. Aho n’aho ekirimu ky’oMungu mukyamuhikako, neryo amatsuka eribugha obuminyereri haghuma nabo.
11 Abosi ababya ibamwasi kera omughulu babya bakamulangira inianemubugha obuminyereri haghuma n’abaminyereri, mubabya bakabwirana bati: “Omughala wa Kishi abiribya ati? Sauli naye abiribya muminyereri kwe?”
12 Neryo omulume w’eyo mwabugha ati: “Nikwa na baba wabo nindi?” Neryo abandu mubabya bakakasima* bati: “Sauli naye abiribya muminyereri kwe?”
13 Sauli abere abibugha obuminyereri, mwaya omo mwanya w’endata.
14 Habere habilaba omughulu mulebe, mughala wabo baba wa Sauli mwabwira Sauli n’omughombe wiwe ati: “Mumukayahi?” Neryo Sauli mwasubirya ati: “Tulyayaronda esyopunda, aliwe mututetasungasyo eyo, ko tulyaya tutya ewa Samweli.”
15 Mughala wabo baba wa Sauli mwamubwira ati: “Kisi mumbwire ebyo Samweli alyababwira.”
16 Sauli mwamusubirya ati: “Mwakatubwira ati esyopunda syabirisungika.” Aliwe Sauli mwatamubwira ngoko Samweli abirimubwira ngoko akendibya mwami.
17 Neryo Samweli mwabugha ati abandu bahindane embere sya Yehova e Mizpa.
18 Mwabwira Abaisraeli ati: “Yehova oMungu we Israeli ati: ‘N’ingye nalusaya Abaisraeli e Misri, kandi n’ingye nabalusaya omo byala by’Abamisri n’omo byala by’abami bosi ababya bakabaghalya.
19 Aliwe lino mwabirighana oMungu wenyu oyo wabalusaya omo myatsi yosi eyikala-kalire, n’omo maligho wenyu wosi. Mumwabugha muti: “Iyehe, utuhirireho omwami.” Neryo lino mwimane embere sya Yehova erikwamana n’ebihanda byenyu, n’erikwamana n’ebikuto byenyu by’amaelfu.’”
20 Neryo Samweli mwabugha ati ebihanda byosi bye Israeli biseghere hakuhi, neryo ekihanda kya Benyamini mukyasombolwa.
21 Enyuma sy’aho, mwabugha ati ekihanda kya Benyamini kiseghere hakuhi erikwamana n’ebihanda ebirimo, neryo ekihanda ky’Abamatri mukyasombolwa. Oko nduli, Sauli mughala wa Kishi mwasombolwa. Mubamusonda-sonda, aliwe mwatasungika.
22 Neryo mubabulya Yehova bati: “Omulume oyo mwakanahika hano kwe?” Yehova mwasubirya ati: “Ane erya, anabiseme omo miheke.”
23 Mubalw’ibayamwendayo. Sauli mwimana omo kati-kati k’abandu. Abya muli kulenga abosi, abandu bosi mubamuhikira oko bitigho.
24 Neryo Samweli mwabwira abandu bosi ati: “Mwanamalangira oyo Yehova abirisombola? Omo bandu bosi, simuli oyuli nga ye.“ Neryo abandu bosi mubatsuka eribugha omo mulenge muli bati: “Omwami akote!”
25 Neryo Samweli mwabwira abandu ebyo batolere ibakolera omwami, mwahandikabyo omo kitabu, amahirakyo embere sya Yehova. Enyuma sy’aho, Samweli mwabugha ati obuli mundu asube ewiwe.
26 Sauli naye mwasuba ewiwe e Gibea. Mwaghenda n’abasuda abo Yehova atula oko mitima yabo.
27 Aliwe ebiwere-were bilebe mubyabugha biti: “Oyu anganatusabula?” Mubyamupokya, mubitamuletera n’ekihembo. Aliwe Sauli mwatabugha kindu.*
