Samweli w’Erimbere 11:1-15
11 Neryo Nahashi Omuamoni mwayahira ekambi yiwe hakuhi ne Yabeshi, e Gileadi. Abya akasonda erilwa n’abandu be Yabeshi. Abalume bosi be Yabeshi mubabwira Nahashi bati: “Kola endaghane haghuma netu, tukendibya bakobe baghu.”
2 Nahashi Omuamoni mwababwira ati: “Inywe bosi mutsuke mwaligha muti ameso wenyu w’amali atobolawe imonakola endaghane haghuma nenyu. Ngendikola ekyo busana n’erihemula Abaisraeli bosi.”
3 Abasyakulu be Yabeshi mubamusubirya bati: “Utuhe ebiro 7 tutoke erituma omulaghe omo biharo byosi bye Israeli. Hamatendibya oyukenditusabula, itukendiligha ebyo wamatubwira.”
4 Neryo ababya bahekire omulaghe mubaghenda, bamahika e Gibea eyo Sauli abya ikere. Mubabya babibwira abandu b’ebinywa ebyo, abandu bosi mubalira kutsibu.
5 Oko ndambi eyo, Sauli abya akalua emoli iniane n’esyonde. Mwabulya ati: “Hamabyaki? Abandu bakalira busanaki?” Neryo mubamubwira ebinywa ebyo balume be Yabeshi balyabugha.
6 Sauli abere abyowa ebinywa ebyo, ekirimu ky’oMungu mukyamuhikako, neryo Sauli mwahitana kutsibu.
7 Neryo mwimya esyonde ibiri sy’obulume, amatwasyo mo bihande-bihande. Enyuma sy’aho, amahabyo abandu ati batwalebyo omo biharo byosi bye Israeli. Abandu abo babya bakabugha bati: “Omundu wosi-wosi oyutendikwama Sauli na Samweli aminye ngoko esyonde siwe ko sikendiyirwa sitya!” Neryo Yehova mwahira omo bandu m’obuba, neryo abosi mubayalwa.*
8 Sauli mwaghanzirabo e Bezeki. Habya Abaisraeli 300 000 n’abalume 30 000 b’omo kihanda kya Yuda.
9 Neryo Sauli n’abalume biwe mubabwira abalume abaleta omulaghe bati: “Muyabwire abalume be Yabeshi eyiri omo Gileadi muti, ‘Mukendisabulwa omungya eryuba ryabyaka kutsibu.’” Neryo abaleta omulaghe mubayabwira abandu be Yabeshi b’ebinywa ebyo, n’abandu be Yabeshi mubatsema kutsibu.
10 Neryo abalume be Yabeshi mubabwira Abaamoni bati: “Omungya itwayihira omo byala byenyu, neryo mukenditukolera ngoko mwanzire.”
11 Ekiro ekikwamire, Sauli mwaghaba abandu mo bikuto bisatu, neryo mubingira omo kambi y’Abaamoni omo kitswe ky’akasatu ky’ekiro.* Mubita Abaamoni erihika omughulu eryuba ryakola kutsibu. Abasaka mubapanzwa-panzwa, muhatabya ababiri abatibita haghuma.
12 Neryo abandu mubabwira Samweli bati: “Ababugha bati, ‘Kwe Sauli anganatutabala’ bali hayi? Letabo tukitabo.”
13 Aliwe Sauli mwabugha ati: “Munabwire sihali oyukenditibwa, kundi munabwire Yehova abirisabula Israeli.”
14 Habere habilaba mughulu mulebe, Samweli mwabwira abandu ati: “Mwase tuye e Gilgali tutasyayasingaya Sauli mo mwami.”
15 Neryo abandu bosi mubaya e Gilgali. Babere babihika e Gilgali, mubayira Sauli mo mwami embere sya Yehova. Enyuma sy’aho, mubaherera eyo y’amahere embere sya Yehova, neryo Sauli n’abandu bosi be Israeli mubakola efete, bamatsema kutsibu.
Amaelezo awehikwa
^ Kinywa kwa kinywa, “mubayalwa ng’omundu mughuma.”
^ Ni bugha ambu, eritsuka hakuhi saa 8 y’ekiro erihika oko saa 12 y’omo tututu.
