Samweli w’Erimbere 12:1-25
12 Oko mwiso, Samweli mwabwira Abaisraeli bosi ati: “Nabirikola* ebyosi ebyo mwanisaba, nabiribahiriraho omwami atoke eribatabala.
2 Neryo omwami wenyu* y’oyu! Ingye nabirikekeluha, kandi nabiribya n’esyombwi. Abaghala baghe bane hano haghuma nenyu. Munabasondola eritsuka omo bulwana bwaghe erihika na munabwire.
3 Ingye y’ono. Mwamabya n’ekindu ekyo mwanganibughako muhanda, mubughekyo embere sya Yehova n’embere sy’omundu wiwe oyuhirirweko amaghuta: Ninenatimya enume y’ende kutse epunda y’omundu? Ninenatiba omundu kutse erimutesa? Ninenataligha ekyutuliro ky’omundu n’eritenditsomana ebyo alyakola? Namabya inabirikola ebyo, ingendibasubulirya ebyo nimaya.”
4 Abaisraeli mubamusubirya bati: “Siwewatatwibako kindu, siwewatatutesa, kutse eriligha ekyutuliro* ky’omundu wosi-wosi.”
5 Neryo mwababwira ati: “Yehova analangire, n’omundu wiwe oyuhirirweko amaghuta naye analangire ngoko simuwite ekyo mwanganibughako muhanda.” Neryo mubamusubirya bati: “Inga, analangire.”
6 Kandi Samweli mwabwira abandu ati: “Yehova, oyo wakolesaya Musa na Haruni n’oyo walusaya abotata-kulu wenyu be Misri, analangire.
7 Neryo lino, mwimane aho, ngendibatswera embere sya Yehova n’eribakangania emyatsi yosi eyitunganene eyo Yehova abakolera, inywe n’abotata-kulu wenyu.
8 “Yakobo mwahumira e Misri. Enyuma sy’aho, abotata-kulu wenyu mubasaba Yehova y’obuwatikya. Mubabya babimusaba obuwatikya, Yehova mwabatumira Musa na Haruni batoke erilusya abotata-kulu wenyu be Misri n’erisyabikalya hano.
9 Aliwe mubibirirwa Yehova oMungu wabo, neryo mwabahira omo byala bya Sisera omukulu w’abasuda be Hazori, kandi mwabahira omo byala by’Abafilistini n’omo byala by’omwami we Moabu, abo mubalwa n’Abaisraeli.
10 Neryo abotata-kulu wenyu mubasaba Yehova y’obuwatikya n’eribugha bati: ‘Twabirikola erilolo, kundi twabirileka erikolera Yehova, aliwe twabirikolera esyobaali n’esyosanamu sya Ashtoreti. Neryo lino, utulusaye omo byala by’esyonzighu syetu tutoke erikukolera.’
11 Neryo Yehova mwatuma Yerubaali, Bedani, Yifta, naghe ingye Samweli. Mwabalusya omo byala by’esyonzighu syosi esyabya sibatimbireko mutoke eribya omo buholo.
12 Omughulu mwalangira Nahashi omwami w’Abaamoni akasyalwa nenyu, mumwanihatikana muti, ‘Iyehe, twanzire tu itwabya n’omwami!’ nomo Yehova oMungu wenyu y’omwami wenyu.
13 Neryo omwami oyo mwasombola y’oyo, omwami oyo mwasaba. Yehova abiribahiriraho omwami.
14 Mwamabisagha Yehova, mwamabimukolera, mwamabikwama ebyo akabugha, kandi mutitaghana ebyalayiro bya Yehova, mwamabikwama esyonzira sya Yehova inywe n’omwami wenyu, aho ikyuwene.
15 Aliwe mwamatendihulikirira omulenge wa Yehova kandi mwamaghana ebyalayiro bya Yehova, Yehova iniakendibaha amalipizi, inywe n’abobaba wenyu.
16 Neryo lino, mwimane aho, mulangire omwatsi munene ogho Yehova akendikola imunalangire.
17 Lino ni mughulu w’erighesa engano, aliwe ngendibwira Yehova niti alete emilumo y’obutuku n’embula, neryo mukendiminya ngoko mwabirikola ekituwene omo meso wa Yehova omw’isaba omwami.”
18 Neryo Samweli mwakania na Yehova. Ekiro ekyo, Yehova mwaleta emilumo y’obutuku n’eriwisya embula, neryo abandu mubasagha Yehova na Samweli bo kutsibu.
19 Neryo abandu bosi mubabwira Samweli bati: “Sabira abaghombe baghu oko Yehova oMungu waghu, kundi sitwanzire erihola, kusangwa tuli bandu b’amalolo, kandi ibwa twabiritasyakola ekindi kibi omw’isaba omwami.”
20 Neryo Samweli mwabwira abandu ati: “Isimwasagha. Ni kwenene, mwabirikola emyatsi yosi eyo eyituwene. Ekyo mukole, isimwalolaya oko Yehova kw’omughongo. Mukolere Yehova n’omutima wenyu wosi.
21 Isimwamuleka neryo imwayakwama ebindu bitya-bitya,* ebitebyangabaletera endundi n’eribasabula, kundi ni bindu bitya-bitya.
22 Yehova syendisyabalekerania busana n’erina riwe rikulu, kundi Yehova abiriyisogha eribayira mo bandu biwe.
23 Ingye sinendileka n’ahake eribasabira, kundi aho inamakolera Yehova y’erilolo, kandi ingendibya ininemubakangirirya ekyuwene n’enzira eyo litolere imwakwama.
24 Kino kisa kyo mukole: Musaghe Yehova n’erimukolera butaleghula n’omutima wenyu wosi, kundi abiribakolera emyatsi minene-minene.
25 Aliwe mutetaleka erikola ebibi, iniakendibabughaho, inywe n’omwami wenyu.”
Amaelezo awehikwa
^ Kinywa kwa kinywa, “Nabirihulikirira omulenge wenyu oko.”
^ Kinywa kwa kinywa, “omwami oyukalendera embere syenyu.”
^ Kutse “esyofranga sy’erileka omundu inialiba-libania omwatsi.”
^ Kutse “ebindu ebite by’ekwenene.”
