Samweli w’Erimbere 13:1-23
13 Sauli abya n’emyaka . . .* omughulu abya mwami we Israeli. Abere abitabala omo myaka ibiri,
2 mwasombola omo Israeli mw’abalume 3 000. Omo balume abo mwabya abalume 2 000 abakendibya bakabya naye e Mikmashi n’omo kiharo ky’ebitwa kye Beteli, n’abalume 1 000 abakendibya bakabya na Yonatani e Gibea ya Benyamini. Enyuma sy’aho, mwabwira abandi basuda ati obuli mundu asube ewiwe.
3 Enyuma sy’aho, Yonatani mwasinga ekambi y’abasuda Bafilistini eyabya e Geba, n’Abafilistini mubowa oko mwatsi oyo. Enyuma sy’aho, Sauli mwabugha ati babuhe omo mahembe omo kihugho kyosi. Mwabugha ati: “Abaebrania bosi bowe!”
4 Abaisraeli bosi mubowa engulu eyikabugha yiti: “Sauli abirisinga ekambi y’abasuda Bafilistini, neryo lino e Israeli yabirikumbira muhanda Abafilistini.” Neryo mubalayira oko bandu ambu bakwame Sauli e Gilgali.
5 Abafilistini nabo mubahindana batoke eriyalwa n’Abaisraeli. Babya n’emitoka y’amalwa 30 000, abandu 6 000 abakaghenda oko syosabayiri,* n’abasuda banene ng’omutsanga owali oko musike-sike w’engetse. Mubayahimba ekambi yabo e Mikmashi, oko luhande lw’eyo ryuba rikasira lwe Bete-aveni.
6 Abaisraeli mubalangira ngoko obuhanya bukendibahikira, kundi babya ibabirihangya-hangya busana n’esyonzighu syabo. Neryo abandu mubayibisa omo myangalu, omo byuna, omo mabwe, omo byumba ebiri emwisi sy’ekitaka, n’omo byuna by’amaghetse.
7 Nibya Abaebrania balebe mubayasoka e Yordani batoke erihika omo kiharo kye Gadi n’ekye Gileadi, aliwe Sauli abya iniakine e Gilgali, n’abandu bosi ababyayo haghuma naye babya ibanemutitimana busana n’obuba.
8 Sauli mwalindirira Samweli omo biro 7, ngoko Samweli anamubwira. Aliwe Samweli mwatasa e Gilgali, neryo abandu mubatsuka erilua ahali Sauli.
9 Oko mwiso, Sauli mwabugha ati: “Muniletere esyonyama esikendibya buhere bw’eryokererya, n’esikendibya buhere bw’obuholo.” Neryo mwaherera obuhere bw’eryokererya.
10 Mwabya abinabugha eriherera obuhere bw’eryokererya, Samweli mwahika. Neryo Sauli mwayamukokya n’erimuramukya.*
11 Neryo Samweli mwabugha ati: “Ulyakola utya busanaki?” Sauli mwamusubirya ati: “Mungalangira abandu ibalimunisigha, naghu siwetasa oko ndambi eyo ulyabugha uti ukendyasirako, n’Abafilistini balue ibabirihindana e Mikmashi.
12 Neryo mungayibwira niti, ‘Abafilistini bakendyasa e Gilgali bakasyalwa naghe isinirinasaba Yehova y’obuwatikya.* Neryo mungalangira eky’erikola iry’en’eriherera obuhere bw’eryokererya.”
13 Neryo Samweli mwabwira Sauli ati: “Ekyo ulyakola ni bukiru. Siwetakwama omughambo ogho Yehova oMungu waghu alyakuha. Nga ulyakwamagho, Yehova angakuyirire iwe n’abana baghu mo batabali be Israeli kera na kera.
14 Aliwe lino, siwenditabala oko mughulu muli. Yehova akendisunga omundu oyukakola ebyosi ebyo anzire, kandi Yehova akendimuyira mo musondoli w’abandu biwe, kundi iwe siwetasikya ebyo Yehova akubwira.”
15 Neryo Samweli mwalua e Gilgali, amahetukira e Gibea ya Benyamini, na Sauli mwaghanza abandu; abasighala haghuma naye, abosi babya bandu hakuhi 600.
16 Sauli na Yonatani n’abandu abasighala haghuma nabo babya bikere e Geba ya Benyamini. Abafilistini mubahimba ekambi yabo e Mikmashi.
17 Abafilistini ababya basi erilwa babya ibakalua omo kambi ibabiriyighaba mo bikuto bisatu. Ekikuto kighuma ikikalaba omo nzira eyikaya e Ofra kikaya omo kiharo kye Shuali.
18 N’ekindi kikuto ikikalaba omo nzira eyikaya e Bete-horoni, n’ekikuto ky’akasatu ikikalaba omo nzira eyikaya eyiri omupaka ogho mundu akalangira iniane omo musya we Zeboimu, oko luhande oluliko embwarara.
19 Oko mughulu oyo, omo kihugho kyosi kye Israeli simwabya omuhesi n’omughuma, kundi Abafilistini babya ibabiribugha bati: “Kumbe Abaebrania isibayihesera omuyali kutse eritumo.”
20 Abaisraeli ibakandaghalira ew’Abafilistini bakayatalya esisuka, esyopiki, esyombasa, n’emighusu.
21 Ibakalihisaya epimu nguma eritalya eyisuka, epiki, ekyuma ekiriko ameno asatu, embasa, n’eritwikira omuhunda w’eribingamo ende.
22 Neryo ekiro ky’amalwa, abandu bosi ababya haghuma na Sauli na mughala wiwe Yonatani sibabya bawite oko muyali kutse eritumo, Sauli na Yonatani basa bo babya bawite oko bindu by’amalwa.
23 Aliwe abasuda Bafilistini babya ibabiriya omo nzira eyikalaba omo musya we Mikmashi.
Amaelezo awehikwa
^ Emyaka yiwe siyiri omo bitabu bya kera by’Ekiebrania.
^ Kutse “syofarasi; syoshevale.”
^ Kinywa kwa kinywa, “n’erimutsumula.”
^ Kutse “isindinatulerya obusu bwa Yehova; isindinasaba Yehova niti anikanganaye olukogho.”
