Samweli w’Erimbere 14:1-52
14 Kiro kighuma, Yonatani, mughala wa Sauli, mwabwira omughombe wiwe oyukamuhekera ebindu biwe by’amalwa ati: “Asa tusokere oko lundi luhande lulya, eyiri ekambi y’abasuda Bafilistini.” Aliwe Yonatani mwatabwira baba wiwe.
2 Sauli abya iniane hakuhi ne Gibea, inianikere omo ndina y’omuti w’amakomamanga, e Migroni, abya haghuma n’abasuda 600.
3 (Ahiya abya ambite e efodi. Abya mughala wa Ahitubu, mughala wabo Ikabodi, mughala wa Finehasi, mughala wa Heli, omuhereri wa Yehova oyo wabya akakolera e Shilo.) Abasuda mubataminya ngoko Yonatani abirighenda.
4 Oko buli luhande lw’enzira eyo Yonatani asonda erilabamo akaya eyiri ekambi y’abasuda Bafilistini, yabya olubwe* oluli ng’erino; olubwe lughuma ilukahulawa mo Bozezi, n’olundi ilukahulawa mo Sene.
5 Olubwe* lughuma lwabya lwimene ng’enduyi oko luhande lw’endata omo mwanya owahererenie ne Mikmashi, n’olundi lwabya oko luhande lw’eyikwa omo mwanya owahererenie ne Geba.
6 Neryo Yonatani mwabwira oyukamuhekera ebindu biwe by’amalwa ati: “Asa tusokere eyiri ekambi y’abasuda abatabanibwe balya. Kwa muhwa Yehova anganatuwatikya erisingabo, kundi sihali ekyangakakirya Yehova erisabula abandu, anganakolesya abandu banene kutse bake.”
7 Oyukamuhekera ebindu biwe by’amalwa mwamubwira ati: “Ukole ngoko omutima waghu anzire. Uye eyo wanzire, ngendikukwama ehosi-hosi eyo wanzire iwaya.”
8 Neryo Yonatani mwasubirya ati: “Tukendisokera eyiri abalume balya, n’eriyikangania kubo.
9 Bamabibugha bati, ‘Mwimane aho, tukasa!’ itwimana aho tuli, isitwaya eyo bali.
10 Aliwe bamabibugha bati, ‘Mwase eyo tuli!’ itwaya eyo bali, kundi ekyo kyo kikendikangania ngoko Yehova akendituwatikya eribasinga.”
11 Neryo Yonatani n’oyukamuhekera ebindu biwe by’amalwa mubayikangania oko basuda b’omo kambi y’Abafilistini. Abafilistini mubabugha bati: “Mulebaye! Abaebrania banemuluira omo byuna ebyo balue babisememo.”
12 Neryo abasuda b’omo kambi y’Abafilistini mubabwira Yonatani n’oyukamuhekera ebindu biwe by’amalwa bati: “Mwase eyo tuli, tukendibakangania ko muli bana!” Aho n’aho Yonatani mwabwira oyukamuhekera ebindu biwe by’amalwa ati: “Unikwame, kundi Yehova akendihirabo omo byala by’Abaisraeli.”
13 Neryo Yonatani mwahetukirayo inianemughenda omo byala n’omo bisando, n’oyukamuhekera ebindu biwe by’amalwa abya iniane enyuma siwe. Yonatani mwatsuka erilwa n’Abafilistini, n’oyukamuhekera ebindu biwe by’amalwa abya akasira enyuma siwe inianemwita abo Yonatani atalyita.
14 Omo malwa ayo w’erimbere, Yonatani n’oyukamuhekera ebindu biwe by’amalwa mubita abandu 20 omo mwanya muke.*
15 Abasuda ababya omo kambi nene mubasagha, n’abosi ababya omo kambi nge mubasagha, nibya n’abasuda abasi erilwa mubasagha, ekitaka mukyalabamo omusiki, n’oMungu mwabahiramo obuba.
16 Abandu ba Sauli abakamuteghaya ababya e Gibea ye Benyamini mubalangira ngoko abasuda b’omo kambi y’Abafilistini babirihangya-hangya.
17 Sauli mwabwira abasuda ababya naye ati: “Mughanze abasuda, mulebaye oyuteho nga nindi.” Mubabya babighanzabo, mubafumbula ngoko Yonatani n’oyukamuhekera ebindu biwe by’amalwa sibaliho.
18 Neryo Sauli mwabwira Ahiya ati: “Ulete Erisanduku ry’oMungu w’ekwenene!” (Kundi oko mughulu oyo,* Erisanduku ry’oMungu w’ekwenene ryabya irine omo kati-kati k’Abaisraeli.)
19 Omughulu Sauli abya akakania n’omuhereri, abasuda ababya omo kambi y’Abafilistini mubahangya-hangya kutsibu, neryo Sauli mwabwira omuhereri ati: “Leka erikola ebyo unemukola.”*
20 Neryo Sauli n’abasuda bosi ababya haghuma naye mubahindana n’eriyalwa. Mubeya Abafilistini ibanemwitana omo miyali, babya isibasi nga bali oko kyahi.*
21 N’Abaebrania ababya ibabiribya oko luhande lw’Abafilistini abaghenda nabo omo kambi mubatsuka erisuba oko luhande lw’Abaisraeli, ababya bakasondolwa na Sauli na Yonatani.
22 Abalume bosi be Israeli ababya ibabiribisama omo kiharo ky’ebitwa kye Efraimu mubowa ngoko Abafilistini babiritibita, neryo abalume abo nabo mubabakwamirira, bamalwa nabo.
23 Ekiro ekyo, Yehova mwasabula Abaisraeli, mubayahika e Bete-aveni ibanemulwa.
24 Aliwe ekiro ekyo, abalume be Israeli babya ibabiriluha kutsibu, kundi Sauli abya iniabirilapisya abasuda ati: “Atakirawe omundu oyukendirya akalyo kosi-kosi embere erigholo rihike n’embere nituhuliraye esyonzighu syaghe!” Neryo muhatabya n’omundu oyukalya akalyo kosi-kosi.
25 Neryo abasuda* bosi mubabya babingira omo musitu, mubalangira obuki ibune ahisi.
26 Abasuda babiri babere babingira omo musitu, mubalangira obuki ibunemusenda, aliwe muhatabya n’omughuma oyo walya kubo, kundi mubasagha ebyo Sauli abalapisaya.
27 Aliwe Yonatani mwatowa ngoko baba wiwe mwalapisya abasuda, neryo mwasumba omutso owabya omo byala biwe, amayahira omutwe-mutwe w’omutso oyo omo kisese. Mwabya abirya oko buki obo, ameso wiwe mwaka.
28 Neryo omusuda mughuma mwabugha ati: “Baba waghu mwakalapisaya abasuda bo luhanya-hanya ati, ‘Atakirawe omundu oyukendirya akalyo munabwire!’ Ekyo kyo kyabirileka abasuda ibaluha kutsibu.”
29 Aliwe Yonatani mwabugha ati: “Baba waghe abirileka abandu ibaghalwa. Lebaya ngoko ameso waghe abiryaka busana n’erighonza oko buki.
30 Terilengekania emyatsi nga yangabere yiti munabwire abasuda nga balyalya oko bindu ebyo balyabana omo kiharo ky’esyonzighu syabo! Balyendiita Abafilistini banene.”
31 Ekiro ekyo, abasuda ba Sauli mubita Abafilistini eritsuka e Mikmashi eriyahika e Aiyaloni. Abasuda ba Sauli mubaluha kutsibu.
32 Neryo abasuda mubabya n’omururu, bamalw’ibimya ebindu ebyo balyalusaya oko syonzighu syabo. Mubimya esyombuli, esyonde, ebyana by’esyonde, n’erikererabyo oko kitaka. Mubalyabyo n’omusasi.
33 Neryo omundu mwasyabwira Sauli ati: “Tahie, abasuda banemukolera Yehova y’erilolo omw’irya enyama n’omusasi.” Sauli mwabugha ati: “Mwamabileghula! Mulw’imulete eribwe rinene eyo niri.”
34 Neryo Sauli mwabugha ati: “Mulabe omo kati-kati k’abasuda n’eribabwira muti, ‘Obuli mundu alete enume yiwe y’ende n’embuli yiwe, mukererebyo hano, n’eriryabyo. Isimwakolera Yehova y’erilolo omw’irya enyama n’omusasi.’” Neryo obuli musuda mwaleta enume yiwe y’ende omo kiro ky’ekiro ekyo, n’erikererayo oko ribwe rinene eryo.
35 Neryo Sauli mwahimbira Yehova y’ekiherero. Ekyo ky’ekiherero ky’erimbere ekyo ahimbira Yehova.
36 Habere habilaba mughulu mulebe, Sauli mwabugha ati: “Tundaghalire eyiri Abafilistini omo kiro, tuyapure ebindu byabo erihika omo tututu. Sitwendibalya n’omughuma.” Abasuda mubamubwira bati: “Kola ekyo wanzire.” Neryo omuhereri mwabugha ati: “Tubulaye oMungu w’ekwenene itukine hano.”
37 Neryo Sauli mwabulya oMungu ati: “Nanganandaghalira eyiri Abafilistini? Unemwendihirabo omo byala by’Abaisraeli?” Aliwe ekiro ekyo, oMungu mwatamusubirya.
38 Neryo Sauli mwabugha ati: “Inywe bakulu b’abasuda, mwase hano, mulebaye erilolo eriryakolawa munabwire nga ni ryahi.
39 Kundi oko kwenene-kwenene ngoko Yehova aliho, oyo wasabula Abaisraeli, nomo angabya ini Yonatani mughala waghe iyulyakola erilolo, litolere iniakwa.” Aliwe muhatabya n’omusuda n’omughuma oyukamusubiraya.
40 Neryo Sauli mwabwira Abaisraeli bosi ati: “Mwimane oko luhande lughuma, ingye n’omughala waghe Yonatani tukendibya oko lundi luhande.” Neryo abandu mubasubirya Sauli bati: “Kola ekyo wanzire.”
41 Neryo Sauli mwabwira Yehova ati: “Iwe Mungu we Israeli, utusubiraye erilabira Etumimu.” Neryo Etumimu muyasombola Yonatani na Sauli, abandi bandu mubatabyako olubanza.
42 Neryo Sauli mwabugha ati: “Mukole obukanga mutoke eriminya nga n’ingye kutse nga ni mughala waghe Yonatani.” Neryo obukanga mubwakangania ngoko ni Yonatani.
43 Neryo Sauli mwabulya Yonatani ati: “Terinibwira, mukakolaki?” Yonatani mwamusubirya ati: “Mungaghonza obuki buke omo mutwe-mutwe w’omutso owalue omo byala byaghe. Ingye y’ono! Sinisaghire erihola!”
44 Neryo Sauli mwabugha ati: “Wamatendihola Yonatani, oMungu iniamba amalipizi awakalire.”
45 Aliwe abasuda mubabwira Sauli bati: “Yonatani oyulyaleka Abaisraeli ibasinga esyonzighu syabo yukendihola? Sikyangatokekana! Oko kwenene-kwenene ngoko Yehova aliho, sihali n’oluywiri n’olughuma lw’oko mutwe wiwe olukenditoghera ahisi, kundi oMungu y’ulyamuwatikaya erikola ekyo alyakola munabwire.” Abandu ko babalaya Yonatani yo batya, neryo mwatahola.
46 Neryo Sauli mwaleka erikwamirira Abafilistini, n’Abafilistini mubasuba omo kiharo kyabo.
47 Obwami bwa Sauli mubwasika omo Israeli. Mwalwa n’esyonzighu siwe syosi esyabya oko syombande syosi. Mwalwa n’Abamoabu, Abaamoni, Abaedomu, abami be Zoba, n’Abafilistini; ehosi-hosi eyo abya akaya iniakasinga.
48 Iniakaya omo malwa butsira buba. Mwasinga Abaamaleki, kandi mwalusya Abaisraeli omo byala by’ababya bakapura ebindu byabo.
49 Abaghala ba Sauli babya Yonatani, Ishvi, na Malkishua. Sauli abya n’abali babiri: Omukulu iniakahulawa mo Merabu, n’omulere iniakahulawa mo Mikali.
50 Muka Sauli iniakahulawa mo Ahinoamu, abya mwali wa Ahimaazi. Omukulu w’abasuda ba Sauli iniakahulawa mo Abneri. Abya mughala wa Neri, kandi mughala wabo baba wa Sauli.
51 Kishi yo wabya baba wa Sauli, na Neri, mughala wa Abieli, yo wabya baba wa Abneri.
52 Omo biro byosi by’obutabali bwa Sauli, muhabya amalwa awakalire omo kati-kati k’Abafilistini n’Abaisraeli. Sauli iniakabya abilangira omulume w’amaka kandi oyutesagha, iniakamuyira mo musuda wiwe.
Amaelezo awehikwa
^ Kutse “olukuka.”
^ Kutse “Olukuka.”
^ Kinywa kwa kinywa, “omo pa nguma y’ebyala y’eririma,” ni bugha ambu, aho syonume sy’esyonde esibiri syanganalima omo kiro kighuma.
^ Kinywa kwa kinywa, “Kiro ekyo.”
^ Kinywa kwa kinywa, “Lusayaho ebyala byaghu.”
^ Kutse “babya omo muvurugo munene.”
^ Kinywa kwa kinywa, “ekihugho.”
