Samweli w’Erimbere 15:1-35
15 Neryo Samweli mwabwira Sauli ati: “Yehova mwanituma ati nikuhireko amaghuta utoke eribya mwami w’abandu biwe be Israeli. Neryo hulikirira ebyo Yehova akendikubwira.
2 Yehova oMungu w’emilondo ati: ‘Ngendiha Abaamaleki b’amalipizi kundi mubalwa n’Abaisraeli omughulu Abaisraeli babya bakalua e Misri.
3 Neryo Lino, ghenda wite Abaamaleki, utoghotayebo haghuma n’ebindu byabo byosi. Isiwabalayako n’omughuma. Wite abosi, abalume, abakali, abana, esyomekeke, esyonume sy’esyonde, esyombuli, esyongamia, n’esyopunda.’”
4 Neryo Sauli mwahindania abasuda biwe, amaghanzirabo e Telaimu. Habya abasuda 200 000 abakaghenda omo bisando, n’abasuda 10 000 b’omo kihanda kya Yuda.
5 Sauli mwayahika eyiri omuyi w’Abaamaleki, amalimbiryagho hakuhi n’omusya.*
6 Aliwe Sauli mwabwira Abakeni ati: “Mulue omo kati-kati k’Abaamaleki ngasyabita haghuma nabo, kundi mumwakangania Abaisraeli bosi b’olwanzo oluteleghula omughulu babya bakalua e Misri.” Neryo Abakeni mubalua omo kati-kati k’Abaamaleki.
7 Enyuma sy’aho, Sauli mwita Abaamaleki erilua e Havila eriyahika e Shuri, eyiri hakuhi ne Misri.
8 Mwahamba Agagi, omwami w’Abaamaleki, aliwe abandi bandu bosi mwitabo omo muyali.
9 Sauli n’abasuda biwe mubatita* Agagi n’esyonyama esyuwene-wene, esyombuli, esyonde, esyonyama esinenehire, esyombangale, mubatatsandya n’ebindu byosi ebyuwene. Mubatanza eritsandyabyo. Aliwe ebindu byosi by’ebule-bule n’ebyo babya isibanzire, mubatsandyabyo.
10 Neryo Yehova mwabwira Samweli ati:
11 “Nabiriyikubya b’omo nga nayira Sauli mo mwami busanaki, kundi abirinilolyako omughongo, kandi syetakwama ebyo niryamubwira.” Samweli mwahangya-hangya, amalemba-lemba Yehova omo kiro kyosi.
12 Samweli mwabuka omo tututu atoke eriyasungana na Sauli. Mubamubwira bati: “Sauli abiriya e Karmeli, abiriyihimbirayo omonima.” Neryo Samweli mwimya eyindi nzira, amandaghalira e Gilgali.
13 Samweli mwabya abilangira Sauli, Sauli mwamubwira ati: “Yehova akutsumule. Nabirikola ngoko Yehova alyanibwira.”
14 Aliwe Samweli mwabwira Sauli ati: “Ibwa kaninemwowa esyombuli n’esyonde sikama!”
15 Sauli mwabugha ati: “Siryalua ew’Abaamaleki, kundi abasuda sibetita esyombuli n’esyonde esyuwene-wene, kusangwa balue banzire erihererasyo Yehova oMungu waghu. Aliwe ebindi mubakatoghotayabyo.”
16 Neryo Samweli mwabwira Sauli ati: “Lekeraho! Hulikirira ebyo Yehova alyambwira omo kiro.” Neryo Sauli mwamubwira ati: “Bughabyo!”
17 Samweli mwatasyabugha ati: “Omughulu wayirawa mo mukulu w’ebihanda bye Israeli, omughulu Yehova akuhirako amaghuta utoke eribya mwami we Israeli, wabya ighukayilangira mo mundu w’ahisi.
18 Habere habilaba mughulu mulebe, Yehova mwakuha omubiiri, mwakubwira ati, ‘Uyite Abaamaleki, kundi bakakola amalolo. Ulwe nabo erihika omughulu ukendibabughaho.’
19 Neryo busanaki siwetowa ebyo Yehova alyakubwira? Busanaki mughukabya n’omururu, wamalw’iwimya ebindu ebyo ulyanyegha oko syonzighu syaghu n’erikola ebituwene embere sya Yehova?”
20 Aliwe Sauli mwasubirya Samweli ati: “Si munganakwama ebyo Yehova alyabugha! Mungayakola omubiiri ogho Yehova alyamba, mungaleta Agagi omwami w’Abaamaleki, aliwe Abaamaleki mungitabo.
21 Aliwe abasuda bo balimaya esyombuli n’esyonde omo bindu ebyuwene-wene ebilue bitolere eritsandibwa, mubakimayabyo batoke erihererabyo Yehova oMungu waghu e Gilgali.”
22 Neryo Samweli mwabugha ati: “Ukalengekanaya uti niki kyo Yehova akatsemera kutsibu? W’amahere w’eryokererya kutse awandi mahere, kutse ekyo Yehova akatsemera kutsibu ry’eryowa ebyo akabugha? Hulikirira! Eryowa rilengire eriherera obuhere, n’erihulikirira ndeke rilengire erimuherera ebisabu by’esyombangale;
23 omundu oyulimo erighundu akabya iniamabikola erilolo ng’oyukalaghula, n’omundu oyukayilabiriraya ali ng’oyukakolesaya obukumu n’oyukaramaya esyosanamu. Yehova abirikughana kandi siwendisyabya mwami kundi siwetakwama ekinywa kiwe.”
24 Neryo Sauli mwabwira Samweli ati: “Nabirikola erilolo, kundi sinetakwama ebyo Yehova anibwira, kandi kundi sinetakwama ebyo wanibwira. Mungasagha abandu n’erikola ebyo balyabugha.
25 Neryo kisi, ughanyire erilolo ryaghe, kandi tughende naghu nitoke eriyakukama embere sya Yehova.”
26 Aliwe Samweli mwabwira Sauli ati: “Sinendighenda haghuma naghu, kundi siwetakwama ekinywa kya Yehova. Kandi kundi Yehova abirikughana, siwendisyabya mwami we Israeli.”
27 Samweli mwabya abibinduka akasonda erighenda, Sauli mwamakirira ekitswe ky’eyikwa ky’erikoti rya Samweli eriteko amaboko, aliwe muryatulika.
28 Neryo Samweli mwamubwira ati: “Munabwire, Yehova abirikusaghula obwami bwe Israeli, akendihabo oghundi mundu oyukulengire.
29 OMungu w’olukengerwa we Israeli syendibugha amabehi, kutse eribindula amalengekania* wiwe, kundi iye syali ng’omundu oyukabinduka-binduka.”*
30 Neryo Sauli mwabugha ati: “Nabirikola erilolo, aliwe kisi unisikaye embere sy’abasyakulu b’abandu baghe, n’embere sy’Abaisraeli. Tughende haghuma nitoke eriyakukama embere sya Yehova oMungu waghu.”
31 Neryo Samweli mwaghenda haghuma na Sauli, na Sauli mwakukama embere sya Yehova.
32 Neryo Samweli mwabugha ati: “Musegheraye Agagi omwami w’Abaamaleki hakuhi naghe.” Neryo Agagi mwaseghera hakuhi na Samweli inianemusagha n’eritika-tika,* kundi Agagi abya akayibwira ati: ‘Alinga sibendisyanita.’
33 Aliwe Samweli mwabugha ati: “Omuyali waghu abirileka abakali banene ibatabya n’abana, neryo naghu lino mama waghu akendibya butsira mwana.” Neryo Samweli mwita Agagi omo muyali embere sya Yehova e Gilgali.
34 Enyuma sy’aho, Samweli mwasuba e Rama na Sauli mwirukira ewiwe, e Gibea ya Sauli.
35 Erihika omughulu Samweli ahola, mwatasyalola oko Sauli, kundi Samweli abya iniabiribya omo bulighe busana na Sauli. Na Yehova mwayikubya b’omo ng’ayira Sauli mo mwami we Israeli yo busanaki.
Amaelezo awehikwa
^ Kutse “n’omusya owakumamo amaghetse.”
^ Kutse “mubakwira obulighe.”
^ Kutse “eriyikubya b’omo.”
^ Kutse “oyukayikubaya b’omo.”
^ Kutse alinga, “butsira buba.”
