Samweli w’Erimbere 16:1-23
16 Oko mwiso, Yehova mwabwira Samweli ati: “Ukendibugha mughulu mungahi ighune omo bulighe busana na Sauli? Si nabirimughana, syendisyabya mwami we Israeli. Wimaye erihembe, usulaye muryo mw’amaghuta, neryo ughende. Ughende ewa Yese Omubetlehemu, kundi nabiriyisombolera oko baghala biwe k’omughuma oyukendibya mwami.”
2 Aliwe Samweli mwabugha ati: “Ngendiyayo niti? Sauli sy’akendibya abyowa ngoko ngayayo, syakendiniita.” Yehova mwasubirya Samweli ati: “Wimaye ende eyikine nyilere, ukendibugha uti, ‘Ngabisyaherera Yehova y’obuhere.’
3 Ubwire Yese uti ase eyo ukendiherera obuhere, neryo ngendikubwira ekyo ukendikola. Ukendinihirira amaghuta oko oyo ngendikukangania.”
4 Samweli mwakola ngoko Yehova alyamubwira. Mwabya abihika e Betlehemu, abasyakulu b’omuyi mubatitimana babimulangira. Mubabugha bati: “Unemwasira buholo kwe?”
5 Samweli mwabasubirya ati: “Inga, ninemwasira buholo. Ngabisyaherera Yehova y’obuhere. Muyeraye n’eryasa aho ngendikolera obuhere.” Neryo mwerya Yese n’abaghala biwe. Mwabya abyeryabo, amababwira ati base eyo akendikolera obuhere.
6 Babere babihika, Samweli mwalangira Eliabu, neryo amayibwira ati: “Ibwa rero ono yo Yehova abirihirako amaghuta, y’ono animene embere siwe.”
7 Aliwe Yehova mwabwira Samweli ati: “Isiwalebaya ngoko amalangirika kutse obuli bwiwe, kundi nabirimughana. OMungu syalilangira ngoko omundu akalangira, kundi omundu akalangira ebyo ameso wiwe amalangira, aliwe Yehova akalangira ebiri omo mutima.”
8 Neryo Yese mwabirikira Aminadabu, amamuleta embere sya Samweli. Aliwe Samweli mwabugha ati: “Oyu naye iyehe, Yehova syetamusombola.”
9 Enyuma sy’aho, Yese mwaleta Shama, aliwe Samweli mwabugha ati: “Ono naye iyehe, Yehova syetamusombola.”
10 Yese mwaleta abaghala biwe 7 embere sya Samweli, aliwe Samweli mwabwira Yese ati: “Abosi aba iyehe, Yehova syetasombolako n’omughuma.”
11 Oko mwiso, Samweli mwabulya Yese ati: “Aba b’abana baghu bosi b’obulume kwe?” Yese mwamusubirya ati: “Akatungo kakineyo, kanemulisya esyombuli.” Neryo Samweli mwabwira Yese ati: “Utume omundu ayakende, kundi sitwenditsuka erirya katekahika hano.”
12 Neryo Yese mwatuma omundu ayende Daudi, neryo mubamuleta embere sya Samweli. Daudi abya mweru-mweru, iniawite ameso aghuwene, kandi ini mubuya. Neryo Yehova mwabwira Samweli ati: “Hangana, umuhireko amaghuta, kundi oyo yo nabirisombola!”
13 Neryo Samweli mwimya erihembe eririmo amaghuta, amahiragho oko Daudi embere sy’abaghala babo. Neryo eritsuka ekiro ekyo, ekirimu kya Yehova mukyasa oko Daudi. Muhabya habilaba mughulu mulebe, Samweli mwasuba e Rama.
14 Ekirimu kya Yehova mukyalua oko Sauli, neryo Yehova mwaleka ekirimu kibi kibye kikamusaghisya.
15 Abaghombe ba Sauli mubamubwira bati: “Wanamalangira ngoko oMungu abirileka ekirimu kibi kibye kikakusaghisya!
16 Kisi mukama wetu, utubwire itwe baghombe baghu tukuronderaye omundu oyo wasi eriwata enanga yo ndeke. Omughulu oMungu akendibya akaleka ekirimu kibi kikusaghisaye, omundu oyo akendibya akakuwatira enanga, neryo iwayowa ndeke.”
17 Neryo Sauli mwabwira abaghombe biwe ati: “Kisi munironderaye omundu oyo wasi eriwata enanga yo ndeke, mumulete hano.”
18 Omughuma w’oko baghombe ba Sauli mwamubwira ati: “Tahie, mughala wa Yese we Betlehemu sy’anasi eriwata enanga yo ndeke! Kandi ni musuda w’amaka, oyutesagha. Asi eribugha, kandi ni mubuya, na Yehova ane haghuma naye.”
19 Neryo Sauli mwatuma oko Yese kw’abandu ati bamubwire bati: “Nitumire mughala waghu Daudi, omulisya.”
20 Neryo Yese mwatuma Daudi ewa Sauli. Mwimya n’epunda, amahekyayo emikati, etsupa y’engobi eyirimo edivai, n’embene eyikine nyilere, omughala wiwe atoke eritwalirabyo Sauli.
21 Daudi kwasa atya ewa Sauli, amatsuka n’erimukolera. Sauli mwamwanza kutsibu, kandi mwamuyira m’omundu oyukamuhekera ebindu biwe by’amalwa.
22 Sauli mwatuma omulaghe oko Yese, ati: “Kisi uleke Daudi asighale eno inianemunikolera, kundi nabirimusima.”
23 Omughulu oMungu abya akaleta ekirimu kibi kisaghisaye Sauli, Daudi iniakimaya enanga yiwe n’erimuwatirayo, neryo Sauli iniakatulera n’eriyowa ndeke, n’ekirimu kibi ikikamulwako.
