Samweli w’Erimbere 18:1-30
18 Yonatani abere abyowa ebyo Daudi alyakanaya na Sauli, mwanza Daudi ngoko ayanzire.* Neryo Yonatani na Daudi mubabya bira kutsibu.*
2 Eritsuka ekiro ekyo, Sauli mwabwira Daudi ati asighale ewiwe, mwatamulighira erisuba ewa baba wiwe.
3 Yonatani na Daudi mubakola endaghane, kundi Yonatani abya anzire Daudi ngoko ayanzire.*
4 Yonatani mwalusya erikoti riwe eriteko maboko eryo abya ambite, amaharyo Daudi, mwamuha n’esyongyimba siwe esyo akaghenda nasyo oko malwa, omuyali wiwe, obuta* bwiwe, n’omukaba wiwe.
5 Daudi mwatsuka eribya akaya omo malwa. Ehosi-hosi eyo Sauli abya akamutuma, iniakasinga.* Neryo Sauli mwamuyira mo mukulu w’abasuda biwe. Abandu bosi n’abaghombe ba Sauli nabo mubatsemera omwatsi oyo.
6 Omughulu Daudi n’abandi basuda babya bakalua omo malwa ibamabiita Abafilistini, abakali ibakalua omo miyi yosi ye Israeli erisyakokya omwami Sauli. Ibakasa ibanemwimba n’erisata, ibanemuyisyandira bakawata ehighoma n’esyonzenze.
7 Abakali ababya bakayisyandira ibakimba bati:
“Sauli mwakita amaelfu w’esyonzighu,Na Daudi mwakita amakumi w’amaelfu.”
8 Neryo Sauli mwahitana kutsibu kundi olwimbo olo mulutamutsemesya. Mwayibwira ati: “Abakali aba bati Daudi mwakita amakumi w’amaelfu, aliwe bati ingye mungita amaelfu masa. Ekyo bakisiya erimuha b’obwami!”
9 Eritsuka ekiro ekyo, Sauli mwabya akalebya Daudi yo muhanda.
10 Ekiro ekikwamire, oMungu mwaleka ekirimu kibi kighalaye Sauli, neryo Sauli mwatsuka eriyiwata muhanda-muhanda* iniane omo nyumba yiwe. Oko ndambi eyo, Daudi abya inianemuwata enanga ng’ebindi biro, na Sauli abya iniane n’eritumo omo byala biwe.
11 Ngendo ibiri mwaghusa eritumo eryo oko Daudi inianemuyibwira ati: “Ngenditsimitira Daudi y’oko luhimbo!” Aliwe Daudi mwahepa ngendo ibiri esyo.
12 Neryo Sauli mwasagha Daudi, kundi Yehova abya iniane haghuma na Daudi, aliwe abya isyakiri haghuma na Sauli.
13 Neryo Sauli mwayira Daudi mo mukulu w’amaelfu, atoke eriyilusya y’oko. Daudi mwabya akasondola abasuda omo malwa.*
14 Daudi mwabya akatoka* ebyosi ebyo abya akakola, na Yehova abya iniane haghuma naye.
15 Neryo Sauli mwabya abilangira ngoko Daudi abya akasinga kutsibu, mwamusagha.
16 Aliwe abandu bosi be Israeli na be Yuda mubanza Daudi, kundi yo wabya akasondolabo bakayalwa.
17 Habere habilaba mughulu mulebe, Sauli mwabwira Daudi ati: “Mwali waghe mukulu, ye Merabu, y’ono. Ngendikuha ye mo mukali waghu. Aliwe litolere iwalola embere erinikolera n’omuhwa, n’erilwa amalwa wa Yehova.” Kundi Sauli abya akayibwira ati: “Sinendimwita, kumbe Abafilistini ibo bamwita.”
18 Daudi mwasubirya Sauli ati: “Nirindi n’ab’omo kihanda kya baba waghe ni bahi omo Israeli, ekyangaleka inabya mukwe w’omwami?”
19 Aliwe omughulu w’eriha Daudi yo Merabu mwali wa Sauli abye mukali wiwe mwahika ibabiriha omukali oyo yo Adrieli Omumeholati.
20 Oghundi mwali wa Sauli, ye Mikali, mwanza Daudi. Mubabwira Sauli y’omwatsi oyo, Sauli mwatsemeragho.
21 Neryo Sauli mwayibwira ati: “Ngendiha mwali waghe yo Daudi abye mukali wiwe. Aho ngendibya inamabimutegha, Abafilistini batoke erimuhamba.” Neryo Sauli mwatasyabwira Daudi ati: “Munabwire, ukendibya mukwe waghe.”
22 Enyuma sy’aho, Sauli mwabwira abaghombe biwe ati: “Muyabwire Daudi omo bubiso-biso muti, ‘Tahie, omwami akwanzire kutsibu, n’abaghombe biwe bosi bakwanzire kutsibu, neryo ulighe eribya mukwe w’omwami.’”
23 Abaghombe ba Sauli mubabya babibwira Daudi y’emyatsi eyo, Daudi mwababwira ati: “Ha! Mukalengekanaya muti ni kyolo eribya mukwe w’omwami kwe? Ingye niri mwera, kandi niri kalume bule-bule.”
24 Neryo abaghombe ba Sauli mubayamubwira ebyo Daudi alyabugha.
25 Neryo Sauli mwabugha ati: “Muyabwire Daudi muti, ‘Omwami syendikusaba esyofranga sy’omutahyo. Aliwe kundi anzire erituhulirya esyonzighu siwe, akakusaba esyongobi 100 esiswikire obusoni bw’Abafilistini.’” Sauli mwabugha atya kundi abya akalengekania ati Abafilistini bakendiita Daudi.
26 Abaghombe ba Daudi mubayabwira ebinywa ebyo byo Daudi. Neryo Daudi mwanza eribya mukwe w’omwami. Embere omughulu ogho bamuha ahwe,
27 Daudi mwaghenda n’abalume biwe, bamayita Abafilistini 200. Neryo Daudi mwaletera omwami y’esyongobi esikaswika obusoni esyo mwami amusaba atoke eribya mukwe wiwe. Neryo Sauli mwamuha mwali wiwe, ye Mikali, abye mukali wiwe.
28 Sauli mwalangira ngoko Yehova abya haghuma na Daudi, kandi ngoko mwali wiwe, ye Mikali, anzire Daudi.
29 N’ekyo mukyaleka Sauli iniasagha Daudi yo kutsibu. Sauli mwabya nzighu ya Daudi omo ngebe yiwe yosi.
30 Abakulu b’Abafilistini ibabeghere eriyalwa n’Abaisraeli. Aliwe mughulu wosi ogho babya bakayalwa nabo, Daudi iniakasingabo* kulenga abandi baghombe bosi ba Sauli. Neryo erina rya Daudi muryakumayira.
Amaelezo awehikwa
^ Kutse “ngoko anzire enafsi yiwe.”
^ Kutse “enafsi ya Yonatani muyayibohera oko nafsi ya Daudi.”
^ Kutse “ngoko anzire enafsi yiwe.”
^ Ni kindu ky’erilasamo emisali.
^ Kutse “iniakakola n’amenge.”
^ Kutse “mwayighendya ng’omuminyereri.”
^ Kinywa kwa kinywa, “abya akahuluka n’erisubula embere sy’abandu.”
^ Kutse “akakola n’amenge omo.”
^ Kutse “iniakakola n’amenge.”
