Samweli w’Erimbere 19:1-24
19 Habere habilaba mughulu mulebe, Sauli mwabwira mughala wiwe ye Yonatani n’abaghombe biwe bosi ngoko anzire inita Daudi.
2 Kundi Yonatani mughala wa Sauli abya inianzire Daudi yo kutsibu, mwabwira Daudi ati: “Sauli, baba waghe, anzire iniakwita. Omungya omo tututu, uyilandeko, uyayibise, kandi isiwalua aho ukendibisama.
3 Ingye ngendisyaghenda na baba waghe omoli hakuhi n’aho ukendisyabisama. Ngendikania naye oko myatsi eyikulebirye. Namabiminya omwatsi mulebe, isinendibula erikubwira.”
4 Neryo Yonatani mwabwira baba wiwe Sauli y’emyatsi eyuwene oko Daudi. Mwamubwira ati: “Mwami, isiwakolera omughombe waghu Daudi y’ekibi, kundi syetakukolera kibi, nibya n’ebyosi ebyo abirikola byabirikuletera endundi.
5 Mwahira engebe yiwe y’omo hatari busana n’eriita Omufilistini, neryo Yehova mwawatikya Abaisraeli bosi erisinga Abafilistini bo kutsibu. Muwayilangirira omwatsi oyo, kandi muwatsema. Neryo busanaki ukasonda erikolera omundu oyute n’ekosa y’ekibi? Sihali ekyangaleka iwita Daudi.”
6 Sauli mwahulikirira ebyo Yonatani abugha, neryo mwalapa ati: “Oko kwenene-kwenene ngoko Yehova aliho, Daudi syenditibwa.”
7 Enyuma sy’aho, Yonatani mwabirikira Daudi, amamubwira emyatsi yosi eyo. Neryo Yonatani mwaleta Daudi eyiri Sauli, na Daudi mwaendelea erikolera Sauli ng’embere.
8 Enyuma sy’aho, kandi muhabya amalwa. Daudi mwayalwa n’Abafilistini, mwita abanene, n’abandi mubatibita.
9 Kiro kighuma, Sauli abya inianikere omo nyumba yiwe, iniane n’eritumo omo byala biwe. Omughulu Daudi abya akawata enanga, Yehova mwaleka ekirimu kibi kyase oko Sauli.
10 Sauli mwasonda eritsimitira Daudi y’oko luhimbo omo ritumo, aliwe Daudi mwahepa, neryo eritumo muryayalabira omo luhimbo. Daudi mwatibita omo kiro ekyo.
11 Habere habilaba mughulu mulebe, Sauli mwatuma abandu eyiri enyumba ya Daudi ati bayamulimbaye, kundi abya akasonda erimwita omo tututu. Aliwe omukali wa Daudi, ye Mikali, mwamubwira ati: “Utitatibita omo kiro, omungya ighukendisyabya kinda.”
12 Aho n’aho Mikali mwalabya Daudi omo ridirisa atoke eritibita n’eritswa.
13 Neryo Mikali mwimya esanamu y’eterafimu,* amahirayo oko ngyingo. Mwahira n’obutimba obukokotibwe omo bweya bw’embene oko museghemo wa Daudi, amaswika n’esanamu y’eterafimu omo lukimba.
14 Sauli mwatuma abandu ati bayende Daudi, aliwe Mikali mwababwira ati: “Daudi alwere.”
15 Neryo Sauli mwatuma abandu ewa Daudi, mwababwira ati: “Muniletere Daudi iniane oko ngyingo, ngamwita.”
16 Abalume abo mubabya babingira omo nyumba, mubalangira esanamu y’eterafimu* oko ngyingo n’obutimba obukokotibwe omo bweya bw’embene ibune oko museghemo wa Daudi.
17 Neryo Sauli mwabulya Mikali ati: “Busanaki wamanzangamo utya n’erileka enzighu yaghe yighende?” Mikali mwasubirya Sauli ati: “Mwakanibwira ati, ‘Leka ngaghende. Wamabinihambirira hano, ingakwita!’”
18 Daudi mwabya abitibita, mwaya ewa Samweli, e Rama. Mwamukanirya ebyosi ebyo Sauli alyamukolera. Neryo Daudi na Samweli mubaghenda, bamayikala e Nayoti.
19 Habere habilaba mughulu mulebe, mubabwira Sauli ambu: “Daudi ane e Nayoti, eyiri omo muyi we Rama.”
20 Sauli mwalw’iniatuma abandu ati bayahambe Daudi. Babere babilangira abaminyereri ababirikekeluha bakabugha obuminyereri, na Samweli inianemusondolabo, ekirimu ky’oMungu mukyasa oko bandu abo Sauli atuma, nabo bamatsuka eriyiwata ng’abaminyereri.
21 Mubabya babibwira Sauli y’omwatsi oyo, mwalw’iniatumayo abandi bandu. Aliwe nabo mubatsuka eriyiwata ng’abaminyereri. Neryo Sauli mwatumayo abandi, ekikuto ky’akasatu, nabo mubatsuka eriyiwata ng’abaminyereri.
22 Oko mwiso, Sauli naye mwaya e Rama. Mwabya abihika ahali ekyuna kinene ky’amaghetse ekiri e Seku, mwabulya ati: “Samweli na Daudi bali hayi?” Mubamusubirya ambu: “Bane erya, e Nayoti, eyiri omo muyi we Rama.”
23 Omughulu Sauli abya akaya e Nayoti, eyiri omo muyi we Rama, ekirimu ky’oMungu mukyasa okw’iye, naye amatsuka eriyiwata ng’omuminyereri erihika omughulu ahika e Nayoti, eyiri omo muyi we Rama.
24 Naye mwalusya esyongyimba siwe, amatsuka eriyiwata ng’omuminyereri embere sya Samweli. Mwayilambika ahisi omo musibo wosi oyo n’omo kiro kyosi, iniane ndumbu.* Ekyo kyo kikaleka abandu ibabya bakabugha ambu: “Sauli naye ni muminyereri kwe?”
Amaelezo awehikwa
^ Kutse “omungu w’ekihanda; esanamu.”
^ Kutse “omungu w’ekihanda; esanamu.”
^ Kutse “iniambite esyongyimba sy’emwisi sisa.”
