Samweli w’Erimbere 2:1-36
2 Neryo Hana mwasaba ati:
“Omutima waghe atsemire busana na Yehova;Akaghala* kaghe kabiribya kanene busana na Yehova;Nabiritanda obuno bwaghe busana n’erisubirya esyonzighu syaghe,Kundi ngatsemera ebyo ukakola busana n’erisabula abandu baghu.
2 Sihali omubuyirire nga Yehova,Sihali oghundi oyuli nga we,Sihali olubwe* olusikire ng’oMungu wetu.
3 Muleke eribugha n’emiyiheko;Omo buno bwenyu isimwalua ebinywa by’emiyiheko,Kundi Yehova ni Mungu oyo wasi ebyosi,Kandi akasoha emyatsi omo ritunganene.
4 Obuta* bw’abandu b’amaka bwabiritsutsangwa,Aliwe abaleghetsene babirihabwa akaghala.
5 Litolere abakalya ndeke ibasunga omubiiri owakendibawatikya eribana akalyo,Aliwe abakwire enzala sibangasyakwayo.
Omukali mughumba abiributa abana 7,N’omukali oyo wabya n’abana bangyi syakiwite kubo.*
6 Yehova akita, kandi iniateya engebe;*Akandaghaliraya omo Yisinda,* kandi inialusyamo mundu.
7 Yehova akayira omundu mo mwera, kandi akayira omundu mo muteke;Akahira omundu y’omo mwanya w’ahisi, kandi akahira omundu y’omo mwanya w’endata.
8 Akalusaya omundu wa bule-bule y’omo lututu,*Akalusaya omwera y’omo kilundo ky’eribu,*Atoke eribikalya haghuma n’abakulu;N’eribaha omwanya owasikibwe.
Esyofondasyo sy’ekihugho ni sya Yehova,Syo ahirako ekihugho.*
9 Akateghaya abandu abateleghula okw’iye;Aliwe obuno bw’omubi bukendisyakingwa omo mwirimya,Kundi omundu syalisinga omo kaghala kiwe.
10 Yehova akendisyatoghotya abakalwa nayeOmughulu akendisyakangania ngoko abahiteneko, elubula yikendisyabya emilumo y’obutuku;Yehova akendisyatswera abandu erihika oko mipaka y’ekihugho,Akendisyaha omwami wiwe y’akaghala*Kandi akendisyaha akaghala kanene k’omundu wiwe oyuhirirweko amaghuta.”
11 Neryo Elkana mwasuba ewiwe e Rama, aliwe omulwana mwatsuka erikolera Yehova akasondolwa n’omuhereri Eli.
12 Aliwe abaghala ba Eli babya babi, babya isibasikirye Yehova.
13 Omo mwanya w’eritsemera erighabo eryo bandu babya bakaha abahereri, kino kyo baghala ba Eli babya bakakola: Omughulu omundu abya akaherera obuhere, omughombe w’omuhereri iniakasa enyama iyinemubera, inianawite oko kanya eyiriko ameno asatu.
14 Neryo iniakahira ekanya eyo y’omo base, omo nyungu eyiriko emikono ibiri, omo kinyungu kinene, kutse enyungu eyiriko omukono mughuma. Omuhereri abya akimya ekyosi-kyosi ekyo omughombe wiwe abya akimya omo kanya yiwe. Ko babya bakakolera batya Abaisraeli bosi ababya bakaya e Shilo.
15 Kandi nibya n’embere omundu oyukaherera obuhere ahisaye ebisabu bitoke erilua m’omuki, omughombe w’omuhereri abya akasa n’erimubwira ati: “Umba enyama eyo muhereri akendyokya. Syendiligha eyiryaberibawa, aliwe eyitahire nyisa.”
16 Omughulu omundu oyo abya akamubwira ati: “Leka tutsuke twahisya ebisabu bitoke erilua m’omuki, neryo enyuma sy’aho ukendimya amaghabo wosi agho wanzire,” iniakamubwira ati: “Iyehe, umbayo lino-lino. Wamatendimbayo, ingapurayo!”
17 Neryo amalolo w’abaghombe abo mwabya manene embere sya Yehova kundi abalume abo babya isibasikirye amahere agho bandu babya bakaherera Yehova.
18 Aliwe Samweli abya akakolera Yehova inianambite e efodi y’ekitani, nomo anabya iniakine mulere.
19 N’obuli mwaka, mama wiwe iniakamusonera akakoti akateko maboko. Iniakamutwalirako obuli mwaka omughulu babya bakahetuka n’omwira wiwe bakayaherera.
20 Neryo Eli mwatsumula Elkana n’omukali wiwe. Mwabwira Elkana ati: “Yehova awatikaye omukali oyu erikubutira oghundi mwana oyukendimya omwanya w’omwana oyo wabiribweka Yehova.” Neryo mubasuba ewabo.
21 Yehova mwibuka Hana, neryo Hana amabuta abana. Mwabuta abandi bana basatu b’obulume n’abana babiri b’obukali. Na Samweli abya akakula embere sya Yehova.
22 Oko mughulu oyo, Eli abya iniabiribya musyakulu bondu-bondu. Iniakabya inianemwowa ebyo baghala biwe babya bakakolera Abaisraeli bosi, kandi ngoko babya bakaghotsera n’abakali ababya bakakolera oko mulango w’ehema y’erihindanamo.
23 Iniakabera eribabwira ati: “Busanaki simulileka erikola emyatsi eyiri ng’eyo? Kundi emyatsi eyo bandu bosi banemumbwira ambu munemukola ni mibi.
24 Koko baghala baghe! Emyatsi eyo ninemwowa abandu ba Yehova bakakania siyuwene.
25 Omundu amabikolera oghundi y’erilolo, hanganabya oyukalemba-lemba Yehova ati amukanganaye olukogho. Aliwe omundu amabikolera Yehova y’erilolo, nindi yo wangamusabira?” Aliwe mubatowa baba wabo, kundi Yehova abya iniabiriyisogha eriitabo.
26 Oko mughulu oyo, omulwana Samweli abya inianemukula embere sya Yehova, n’abandu babya bakamutsemera.
27 Kiro kighuma, omundu w’oMungu mwasa eyiri Eli, amamubwira ati: “Yehova mwakabugha ati: ‘Munayiminyisya ndeke-ndeke oko kihanda kya baba waghu omughulu babya e Misri ini bakobe omo nyumba ya Farao, ko bite-bitya?
28 Kandi baba waghu mwasombolwa omo bihanda byosi bye Israeli atoke eribya muhereri waghe, atoke eribya akaherera amahere oko kiherero kyaghe, atoke eribya akaherera obukwa,* n’eryambala e efodi embere syaghe. Kandi munaha ekihanda kya tata-kulu waghu ky’amahere wosi awakahererawa omo muliro agho Abaisraeli* bakaherera.
29 Busanaki mukaghonera* obuhere n’ekihembo ebyo nabugha niti bibye bikahererwa omo nyumba yaghe? Busanaki ukasikaya abaghala baghu kunilenga? Busanaki mukayinenehaya omo maghabo aghuwene-wene w’omo bihembo byosi ebyo bandu baghe be Israeli bakateka?
30 “‘Busana n’ekyo, Yehova oMungu we Israeli ati: “Munabugha niti ekihanda kyaghu n’ekihanda kya baba waghu bikendisyabya bikakola omubiiri* waghe mughulu wosi.” Neryo lino Yehova ati: “Sibyendisyabya bitya! Kundi ngendisyasikya abakanisikaya, aliwe ngendisyapokya abakanipokaya.”
31 Ebiro binemwasa omughulu ngendisyabalusyako akaghala* kenyu, iwe n’ekihanda kya baba waghu, neryo omo kihanda kyaghu simwendisyabya omulume n’omughuma oyukendisyahika omo busyakulu.
32 Omughulu ngendisyabya ininemukolera Abaisraeli b’emyatsi eyuwene, iwe ukendisyabya ighunemulangira enzighu omo nyumba yaghe, kandi omo kihanda kyaghu simwendisyabya omusyakulu n’ahake.
33 Ngendileka omughuma w’oko bana baghu oyukendibya akakolera oko kiherero kyaghe, neryo oyo akendileka ameso waghu inialuha, kandi akendileka iwabya omo bulighe* bunene. Aliwe abangyi b’omo kihanda kyaghu bakenditibwa omo muyali.
34 Ukendiminyira oko kikendihikira abaghala baghu babiri, ye Hofni na Finehasi. Abosi babiri bakendisyahola omo kiro kighuma.
35 Neryo ngendisyayihiriraho omuhereri mutaleghula. Akendisyakola ngoko omutima waghe anzire. Ngendisyayira abana biwe mo bahereri omo mughulu muli, kandi biro byosi akendisyabya muhereri w’omundu waghe oyuhirirweko amaghuta.
36 Oyukendisyasighala omo nyumba yaghu akendisyabya akasa n’erikukama embere siwe akaronda esyofranga n’eky’erirya,* n’eribugha ati: “Kisi, leka nikole oko mibiiri y’abahereri naghe nitoke eribana eky’erirya.”’”*
Amaelezo awehikwa
^ Kinywa kwa kinywa, “Erihembe.” Ulebaye Amaana w’ebinywa.
^ Kutse “olukuka.”
^ Ni kindu ky’erilasamo emisali.
^ Kinywa kwa kinywa, “abirihonga.”
^ Kutse “akaha engebe.”
^ Kutse “Sheoli.” Ni bugha ambu eyisinda y’abandu bosi. Ulebaye Amaana w’ebinywa.
^ Kutse “ekitaka ekikerako ebyalya.”
^ Kutse alinga, “kyabu.”
^ Kutse “Akahanganaya omundu wa bule-bule oyuli omo lututu.”
^ Kinywa kwa kinywa, “y’erihembe.” Ulebaye Amaana w’ebinywa.
^ Kutse alinga, “atoke eribya akatumbya omuki w’amahere.”
^ Kinywa kwa kinywa, “abaghala ba Israeli.”
^ Kinywa kwa kinywa, “mukaha ekipase.” Kutse “mukapokaya.”
^ Kinywa kwa kinywa, “kikendisyabya kikalendera embere syaghe.”
^ Kinywa kwa kinywa, “okuboko.”
^ Kutse “akendileka enafsi yaghu iyahola.”
^ Kinywa kinywa, “n’omukati.”
^ Kinywa kinywa, “omukati.”
