Samweli w’Erimbere 20:1-42
-
Yonatani amabya mutaleghula oko Daudi (1-42)
20 Neryo Daudi mwalua e Nayoti eyiri omo muyi we Rama inianemutibita. Mwayasungana na Yonatani, amamubwira ati: “Mungakolaki? Mungakola kibi kyahi? Mungakolera baba waghu y’erilolo ryahi kyo kikaleka iniasonda eriniita?”*
2 Yonatani mwamusubirya ati: “Ekyo sikyangatokekana! Siwendihola. Baba syalinibisa kindu, angabya mwatsi munene kutse muke akanibwiragho. Baba waghe anganatoka ati erinibisa omwatsi oyo? Ekyo sikyangatokekana.”
3 Aliwe Daudi mwatasyabugha ati: “Baba waghu anasi ndeke-ndeke ngoko unianzire. Neryo anganayibwira ati, ‘Yonatani isyaminya oko mwatsi oyo, iniakendibya omo bulighe.’ Aliwe oko kwenene-kwenene ngoko Yehova aliho, kandi oko kwenene-kwenene ngoko naghu uliho,* hali ekika kighuma kisa omo kati-kati kaghe n’oluholo!”
4 Neryo Yonatani mwabwira Daudi ati: “Ebyosi ebyo wamabugha,* ngendikukolerabyo.”
5 Daudi mwabwira Yonatani ati: “Omungya ni kiro kikulu ky’omughenda muhya-muhya. Omungya litolere inasyalira oko mesa y’omwami; iwe unilighire ngaghende, ngendiyabisama omoli erihika omo righolo ry’ekiro ky’akasatu.
6 Baba waghu amabinibula, neryo iniakubulya nga niri hayi, iwamubwira uti, ‘Daudi mwakanisaba ati nimulighire eriya ewabo, omo muyi we Betlehemu yo luba-luba, kundi abosi b’omo kihanda kyabo bakahindanayo obuli mwaka busana n’eriherera obuhere.’
7 Amabibugha ati, ‘Sihali mbugha.’ Ekyo ikendikangania ngoko omughombe waghu syendikwa kindu, aliwe amabihitana ighukendilw’iwaminya ngoko anzire erinikolera muhanda.
8 Unikanganaye, ingye mughombe waghu, olwanzo oluteleghula, kundi wabirikola endaghane haghuma n’omughombe waghu embere sya Yehova. Aliwe namabya inabirikola ekibi, uniite ighuwene-wene. Ukendinihira omo byala bya baba waghu mo busanaki?”
9 Neryo Yonatani mwasubirya ati: “Sinangakukolera ekiri ng’ekyo! Namabyowa ngoko baba waghe anzire erikukolera muhanda, sinangabula erikubwira.”
10 Neryo Daudi mwabulya Yonatani ati: “Neryo baba waghu amabikukaramira, ingendiminya niti?”
11 Yonatani mwabwira Daudi ati: “Asa tuyalabe-labe emoli.” Neryo Daudi na Yonatani mubayalaba-laba emoli.
12 Neryo Yonatani mwabwira Daudi ati: “Yehova oMungu we Israeli abye mwimiri.* Omungya kutse ekiro ekikwamire eky’omungya, oko ndambi eyiri ng’eno ngendisonda eriminya amalengekania wa baba waghe. Namabilangira iniawite amalengekania awuwene okw’iwe, ingendikuminyisya.
13 Aliwe namabilangira baba waghe inianzire erikukolera muhanda, ingendikuminyisya utoke eribisama. Namatendikuminyisya, Yehova iniamba amalipizi awakalire. Yehova abye haghuma naghu, ngoko anabya haghuma na baba waghe.
14 Naghu unemwendinikangania olwanzo oluteleghula ng’olwa Yehova inikineho kandi nibya nabihola?
15 Isiwasyaleka erikangania ekihanda kyaghe ky’olwanzo oluteleghula, nibya n’omughulu Yehova akendisyabugha oko kihugho kw’esyonzighu syaghu syosi.”
16 Neryo Yonatani mwakola endaghane haghuma n’ekihanda kya Daudi, mwabugha ati: “Yehova akendisyaha esyonzighu sya Daudi sy’amalipizi.”
17 Neryo Yonatani mwabwira Daudi ati atasyasubirira omo binywa ebyo alapa omughulu akola endaghane, kundi Yonatani abya amwanzire ngoko ayanzire.*
18 Neryo Yonatani mwabwira Daudi ati: “Omungya ni kiro kikulu ky’omughenda muhya-muhya. Abandu bakendisyalangira ngoko siwetasa, kundi ekitumbi kyaghu sikyendisyikalako omundu.
19 Nibya n’ekiro ky’akasatu abandu bakendisyakubula. Litolere iwaya eyo wabisama kindi kiro* n’erisighala eyo hakuhi n’eribwe.
20 Neryo ngendisyaghusa emisali isatu oko lundi luhande lw’eribwe, ngendisyabya nga ngasonda erighusayo oko kindu kilebe.
21 Ngendisyatuma omughombe waghe n’erimubwira niti, ‘Uyaniletere emisali eyo.’ Namabisyabwira omughombe waghe niti, ‘Lebaya! Emisali siyiri hali okw’iwe, imayayo.’ Aho ini bugha ambu iwanganasubula, kundi oko kwenene-kwenene ngoko Yehova aliho, aho isighutolere ukasagha, aho ini bugha ambu sihali ekibi ekikendikuhikira.
22 Aliwe namabibwira omulwana oyo niti, ‘Lebaya! Emisali yiri hali okw’iwe.’ Aho ini bugha ambu ughende, kundi Yehova inianzire iwaghenda.
23 Twabirilaghana eribya bira, neryo Yehova abye omo kati-kati kaghe naghu kera na kera.”
24 Neryo Daudi mwayibisa omo kisuki. Ekiro kikulu ky’omughenda muhya-muhya kyabere kyahika, omwami Sauli mwikala oko mesa atoke erirya.
25 Abya ikere aho abeghere erikala hakuhi n’oluhimbo. Yonatani abya ikere inianasamalirene na Sauli, na Abneri abya ikere oho lutambi oko Sauli, aliwe omwanya wa Daudi syabyamo omundu.
26 Ekiro ekyo, Sauli mwatabugha kindu, kundi mwabya akayibwira ati: ‘Daudi anganabya isyerire, alinga muhakabya omwatsi mulebe owalyamuhikira, alinga tu syerire.’
27 Ekiro ekikwamire ekiro kikulu ky’omughenda muhya-muhya, ni bugha ambu ekiro ky’akabiri, omwanya wa Daudi abya tu isyalimo mundu. Neryo Sauli mwabulya Yonatani ati: “Busanaki mughala wa Yese mwatetasyalya muligholo na munabwire?”
28 Yonatani mwamusubirya ati: “Mwakanisaba ati nimulighire eriya e Betlehemu.
29 Mwakanibwira ati, ‘Kisi, unilighire erighenda, kundi ekihanda kyaghe kyosi kikahindana e Betlehemu kitoke eriherera obuhere, n’omughala wetu mwakanibwira ati isinabula erihika. Neryo wamabya iwabirinitsemera, kisi unilighire erighenda bubiso-biso nitoke eriyasungana n’abaghala betu.’ Ekyo kyo kiryaleka Daudi iniatasyalya oko kalyo k’omwami.”
30 Neryo Sauli mwahitana kutsibu oko Yonatani. Mwamubwira ati: “Iwe mwana w’omukali oyutyowa, ukalengekanaya uti sinasi ngoko wabiriyighunga n’omughala wa Yese? Siwulangire ngoko n’isoni okw’iwe n’oko mama waghu?*
31 Ebiro byosi ebyo mughala wa Yese akendisyabya iniane oko kihugho, siwendisyabya n’obuholo. N’obwami bwaghu sibwendisyasika, neryo utume omundu ayamwende, kundi litolere iniakwa.”*
32 Aliwe Yonatani mwasubirya Sauli baba wiwe ati: “Busanaki wanzire erimwita? Mwakayira ati?”
33 Neryo Sauli mwamughusako eritumo riwe atoke erimutsimita. Neryo Yonatani mwaminya ngoko kwenene-kwenene baba wiwe anzire eriita Daudi.
34 Aho n’aho Yonatani mwalua oko mesa inianahitene kutsibu, mwatalya kindu ekiro ky’akabiri ekiro ky’omughenda muhya-muhya kyabilaba, kundi abya omo bulighe busana na Daudi, kandi kundi baba wiwe abya iniabirihemula Daudi.
35 Yonatani mwaya omo kisuki aho balaghana erisungana na Daudi. Omughombe wiwe mughuma mulwana mwaghenda haghuma naye.
36 Neryo Yonatani mwabwira omughombe wiwe ati: “Kisi utibite halya, uniletere emisali eyo ngendighusa.”
37 Omughombe oyo mwatibita. Yonatani mwaghusa omusali mughuma, amalaba oko mughombe oyo. Omughombe oyo mwabya abihika aho omusali atoghera, Yonatani mwabugha omo mulenge muli ati: “Omusali ali hali okw’iwe.”
38 Yonatani mwatasyamubwira ati: “Luba, ghenda luba-luba, isiwayitimba-timbako. Omughombe wa Yonatani mwatola emisali, amasuba eyiri Yonatani.”
39 Omughombe wiwe mwataminya ekyo nga kikasonda eribugha kitiki, Yonatani na Daudi basa bo babya basi.
40 Neryo Yonatani mwaha omughombe wiwe y’ebindu biwe by’amalwa n’erimubwira ati: “Subaya ebindu ebi by’omo muyi.”
41 Daudi abya iniane hakuhi n’aho, oko luhande lw’eyikwa. Omughombe oyo mwabya abighenda, Daudi mwalua eyo abya abiseme. Mwakukama n’erihira obusu bwiwe b’oko kitaka ngendo isatu. Daudi na Yonatani mubakumbatirana n’eriliriranako, aliwe Daudi yo walira kutsibu.
42 Enyuma sy’aho, Yonatani mwabwira Daudi ati: “Ughende buholo, kundi ingye naghu twabirilapa embere sya Yehova tuti, ‘Yehova abye omo kati-kati kaghe naghu, n’omo kati-kati k’abana baghe n’abana baghu kera na kera.’”
Neryo Daudi mwaghenda, na Yonatani amasuba omo muyi.
Amaelezo awehikwa
^ Kutse “eriita enafsi yaghe.”
^ Kutse “enafsi yaghu yiriho.”
^ Kutse “ebyo enafsi yaghu ikendibugha.”
^ Kutse “mutemwe.”
^ Kutse “ngoko anzire enafsi yiwe.”
^ Kutse “kiro ky’erikola omubiiri.”
^ Kinywa kwa kinywa, “n’isoni oko busoni bwa mama waghu?”
^ Kinywa kwa kinywa, “ni mughala w’oluholo.”
