Samweli w’Erimbere 21:1-15
21 Habere habilaba mughulu mulebe, Daudi mwahika e Nobu ew’omuhereri Ahimeleki. Ahimeleki abere abilangira Daudi, mwatsuka erititimana busana n’obuba. Mwabulya Daudi ati: “Wamasa ighuwene busanaki? Busanaki siwetasa n’oghundi mundu?”
2 Daudi mwamusubirya ati: “Omwami mwakaniha omubiiri mulebe, aliwe mwakanibwira ati, ‘Isiwabwira omundu wosi-wosi omubiiri ogho namakuha, kutse ebyalayiro ebyo namakuha.’ Mungabwira abalwana baghe niti tukendyeghania omo kiharo kilebe.
3 Wamabya ighunawite oko mikati itano, umbeyo. Wamatendibya nayo, iwamba ekyosi-kyosi ekyo ukendibana.”
4 Aliwe omuhereri oyo mwasubirya Daudi ati: “Singwite oko yindi mikati, emikati mibuyirire misa yo niwiteko. Abalwana baghu banganalyayo bamabya isibetaghotsera n’abakali.”
5 Daudi mwasubirya omuhereri ati: “Sitwetaghotsera n’abakali, ngoko twataghotsera nabo omughulu twaya omo malwa ebiro byalaba. Ingye n’abalwana baghe tukayikasa tubye itunerire, nibya n’omughulu tukayakola omubiiri owate mubuyirire. Neryo munabwire mo tukendibya baterire kwe?”
6 Neryo omuhereri mwamuha emikati mibuyirire, kundi sihabya eyindi mikati. Yabya mikati y’erikangania eyo babya ibabirilusya embere sya Yehova ekiro ekyo batoke erihiraho eyindi eyikine mihya-mihya.
7 Nikwa omughuma w’oko baghombe ba Sauli abya iniane eyo ekiro ekyo. Habya emyatsi eyaleka iniasighala aho embere sya Yehova. Abya iniakahulawa mo Doegi Omuedomu, abya mukulu w’abalisya ba Sauli.
8 Daudi mwabulya Ahimeleki ati: “Unawite oko ritumo kutse oko muyali ko hano? Munitetaheka omuyali kutse ekindi kindu ky’amalwa, kundi omwami mwakamba omubiiri w’erikola luba-luba.”
9 Omuhereri mwamusubirya ati: “Niwite hano h’oko muyali wa Goliata Omufilistini, oyo wita omo Musya* we Ela. Omuyali oyo abohereko olukimba, kandi ali enyuma we efodi. Wamanza erimyagho, wimayegho, kundi ogho musa wo tuwiteko hano.” Daudi mwamubwira ati: “Sihali oghundi muyali owali ng’oyo. Umbagho.”
10 Ekiro ekyo kisa-kisa, Daudi mwatsukalo akasagha Sauli. Oko mwiso, mwayahika ewa Akishi, omwami we Gati.
11 Abaghombe ba Akishi mubabulya Akishi bati: “Oyu si yo Daudi, omwami w’ekihugho kirya! S’iye yo waleka abandu ibimba n’erisata ibanemubugha bati,‘Sauli mwakita amaelfu w’esyonzighu,Na Daudi amakumi w’amaelfu?’”
12 Daudi mwalengekania oko binywa ebyo, neryo amasagha Akishi omwami we Gati yo kutsibu.
13 Neryo Daudi mwabya akayiwata ng’omusire embere sy’abandu be Gati, n’eriyiwata omo kati-kati kabo* omutwe wiwe ng’abiritsanda. Mwabya akakwararya-kwararya oko milango y’omuyi n’eriyitoghongeryako olukonda oko syonderu siwe.
14 Oko mwiso, Akishi mwabwira abaghombe biwe ati: “Munalangire ngoko omulume oyu ni musire, busanaki mukamuleta embere syaghe?
15 Mukalengekanaya muti eno yiri basire bake kyo kikaleka imwatasyaniletera oghundi? Sinanzire omundu oyo akingira omo nyumba yaghe.”
