Samweli w’Erimbere 22:1-23
22 Neryo Daudi mwalua eyo, amatibitira omo mwangalu we Adulamu. Abaghala babo n’ekihanda kyosi kya baba wiwe babere babyowa omwatsi oyo, mubandaghalira eyo ali.
2 Neryo abosi ababya n’esyombanza, n’ababya n’amadeni kutse ababya bakaghalwa mubayighunga naye. Babya balume hakuhi 400, neryo mwabya mukulu wabo.
3 Habere habilaba mughulu mulebe, Daudi mwalua e Adulamu, amaya e Mizpe eyiri omo kiharo kye Moabu. Mwabwira omwami we Moabu ati: “Kisi ulighire baba waghe na mama waghe erisighala hano, erihika omughulu ngendiminya ekyo oMungu akendinikolera.”
4 Neryo mwasighirabo omwami we Moabu. Mubasighala haghuma n’omwami we Moabu omughulu wosi ogho Daudi abya omo mwanya ogho mundu ateangahikamo bweghu-bweghu.
5 Habere habilaba mughulu mulebe, omuminyereri Gadi mwabwira Daudi ati: “Isiwasighala omo mwanya oyo ogho mundu ateangahikamo bweghu-bweghu. Usube omo kiharo kye Yuda.” Neryo Daudi mwaya omo musitu we Hereti.
6 Sauli mwowa ngoko abandu mubakalangira Daudi n’abalume biwe. Oko mughulu oyo, Sauli abya e Gibea. Abya ikere omo ndina y’omuti w’omwesheli owabya oko katwa, abya iniane n’eritumo riwe omo byala, n’abakulu bosi b’abandu biwe babya ibanamutimbireko.
7 Neryo Sauli mwababwira ati: “Kisi muhulikirire inywe Babenyamini. Mukalengekanaya muti mughala wa Yese naye akendibaha amalima n’amalima w’emizabibu inywe bosi? Mukalengekanaya muti inywe bosi akendibayira mo bakulu b’amaelfu n’abakulu b’amamia?
8 Inywe bosi mumwanisohera, sihali n’omughuma oyo wasyambwira ngoko mughala waghe abirikola endaghane n’omughala wa Yese. Sihali n’omughuma w’omw’inywe oyo wanikwira obulighe n’erinibwira ngoko mughala waghe-waghe abirihira omo mughombe waghe mw’amalengekania w’erinisohera, ngoko emyatsi yiri munabwire.”
9 Neryo Doegi Omuedomu oyo wabya imene aho, kandi oyo wabya mukulu w’abaghombe ba Sauli, mwabugha ati: “Mungalangira mughala wa Yese akasa e Nobu ewa Ahimeleki, mughala wa Ahitubu.
10 Ahimeleki mwabulya Yehova emyatsi nga yikendighendera Daudi yo yiti, kandi mwamuha akalyo, amamuha n’omuyali wa Goliata Omufilistini.”
11 Aho n’aho omwami Sauli mwatuma omundu ayende Ahimeleki mughala w’omuhereri Ahitubu n’abahereri bosi b’oko kihanda kya baba wiwe, ababya e Nobu. Neryo abosi mubasa embere sy’omwami.
12 Neryo Sauli mwabugha ati: “Kisi unihulikirire, mughala wa Ahitubu.” Naye mwasubirya ati: “Bugha, mukama waghe.”
13 Sauli mwabugha ati: “Busanaki mumukanisohera, iwe n’omughala wa Yese? Mughukamuha omukati n’omuyali, kandi mughukabulaya oMungu emyatsi nga ikendimughendera yiti, ighunasi ngoko akalwa naghe kandi ngoko akanisohera, ngoko emyatsi yiri munabwire.”
14 Neryo Ahimeleki mwasubirya omwami ati: “Omo baghombe baghu bosi mune oghundi w’eriyiketera* nga Daudi? Ni mukwe waghu, kandi ni mukulu w’abasuda abakakuteghaya, kandi asikibwe kutsibu omo kihanda kyaghu.
15 Eyo si y’engendo y’erimbere ingye eribulya oMungu emyatsi nga yikendimughendera yiti. Sindinatalengekania n’ekiro n’ekighuma erikusohera. Kisi mwami waghe, isiwanihirako olubanza ingye kutse ekihanda kya baba waghe, kundi sinilwenasi n’omwatsi n’omughuma oko ebyo wamabugha ebyo.”
16 Aliwe omwami mwasubirya ati: “Ukendikwa, iwe Ahimeleki n’ekihanda kyosi kya baba waghu.”
17 Neryo mwami mwabwira abateya ababya bamutimbireko ati: “Mwite abahereri ba Yehova, kundi babiribya oko luhande lwa Daudi. Babya ibanasi ngoko abiritswa, aliwe mubatanibwira ngoko mubakanamulangira.” Aliwe abateya* b’omwami mubatanza eriita abahereri ba Yehova.
18 Neryo omwami mwabwira Doegi ati: “Iwe ita abahereri aba.” Aho n’aho Doegi Omuedomu mwalw’iniaghulukira kubo. Ekiro ekyo, mwita abalume 85 ababya bambite e efodi y’ekitani.
19 Kandi mwalwa n’abandu be Nobu, omuyi w’abahereri. Mwita omo muyali mw’abalume, abakali, abana, esyomekeke, esyonume sy’esyonde, esyopunda, n’esyombuli.
20 Aliwe Abiatari mughala wa Ahimeleki, mughala wa Ahitubu mwabala, mwatibita, amayayighunga na Daudi.
21 Mwabwira Daudi ngoko Sauli abiriita abahereri ba Yehova.
22 Neryo Daudi mwabwira Abiatari ati: “Omughulu nabya ewa baba waghu, omughulu nalangira ngoko Doegi Omuedomu naye aneyo, munalw’inaminya ngoko akendiyabwira Sauli. Oluholo lw’abandu* bosi b’oko kihanda kya baba waghu luli omo mutwe waghe.
23 Neryo usighale hano haghuma naghe. Isiwasagha, kundi omundu amabisonda erikwita,* in’ingye akasonda eriita, neryo ingendikulwirako, ngendikuteya.”
Amaelezo awehikwa
^ Kutse “mutaleghula.”
^ Kinywa kwa kinywa, “abatibiti.”
^ Kutse “Esyonafsi.”
^ Kutse “eriita enafsi yaghu.”
