Samweli w’Erimbere 24:1-22
24 Sauli mwabya abinalua eyo ayalwa n’Abafilistini, mubamubwira ngoko Daudi ane omo mbwarara ye En-gedi.
2 Neryo Sauli mwasombola abasuda 3 000 b’omo basuda be Israeli, amayarondya Daudi n’abasuda biwe oko kitwa ekiriko ebibwe-bibwe, eyo esyombene sy’omoli sikabya.
3 Sauli mwahika oho bakalisiraya esyombuli ahatimbireko akaluba k’amabwe. Habya hakuhi n’endaki. Habya omwangalu, neryo Sauli mwingira mugho akayasubala.* Daudi n’abasuda biwe babya ibanikere omo mwangalu oyo mw’emwisi-mwisi.
4 Abasuda ba Daudi mubamubwira bati: “Rero kino ky’ekiro ekyo Yehova akakubwira ati, ‘Ngahira enzighu yaghu omo byala byaghu, wanganayirayo ngoko wanzire.’” Neryo Daudi mwahangana, amatwa lyolo-lyolo oko musike w’erikoti rya Sauli eriteko maboko.
5 Aliwe enyuma sy’aho, Daudi mwayowa muhanda omo mutima,* kundi mwatwa oko musike w’erikoti rya Sauli eriteko maboko.
6 Mwabwira abasuda biwe ati: “Sinangakolera omukama waghe y’ekiri ng’eki, ni bugha ambu oyo Yehova abirihirako amaghuta, kundi nisikirye Yehova. Sinangamukolera ekibi kundi Yehova abirimuhirako amaghuta.”
7 Omw’ibugha atya, Daudi mwakakirya* abasuda biwe eriita Sauli. Na Sauli mwalua omo mwangalu, amatasyaendelea n’olughendo lwiwe.
8 Enyuma sy’aho, Daudi mwalua omo mwangalu, amabirikira Sauli ati: “Mukama waghe kandi mwami waghe!” Sauli abere abikebera enyuma, Daudi mwakukama n’erihira obusu bwiwe b’oko kitaka,
9 amabwira Sauli ati: “Busanaki mukakwama ebinywa by’abandu abalyakubwira bati, ‘Daudi anzire iniakukolera ekibi?’
10 Munabwire musa-musa mukayilangirira ngoko Yehova mwakakuhira omo byala byaghe omughulu ulyingira omo mwangalu. Aliwe omughuma w’oko basuda baghe mwakabya abinibwira ati nikwite, mungakukwira obulighe, neryo namamusubirya niti, ‘Sinendikolera omukama waghe y’ekibi, kundi Yehova abirimuhirako amaghuta.’
11 Neryo lino baba waghe, lebaya, omo byala byaghe mune akakimba oko niryatwa oko rikoti ryawe eriteko maboko; omughulu niryatwako, naghu nilyendikwita, aliwe sinetakola ekyo. Neryo wanamalangira ngoko sinirimo mutima w’erikukolera ekibi kutse ow’erighana obutabali bwaghu, kandi ingye sinditakukolera ekibi, aliwe iwe unemunikwamirira ukabugha uti ukaniita.*
12 Yehova alebaye oyusingene nga nindi. Yehova akendisyanituhulirya ebibi ebyo ulyanikolera, aliwe ingye sinendisyakukolera kibi.
13 Ngoko omusyo wa kera akabugha ati, ‘Ababi b’abakanakola ebibi,’ aliwe ingye sinendisyakukolera ekibi.
14 Omwami we Israeli akatakwamirira ho ndi? Ukakwamirira ndi? Ukakwamirira embwa eyiholire? Ekiloko bule kyo ukakwamirira?
15 Yehova alebaye oyusingene nga nindi, kandi akendisyatutswera ingye naghu. Akendisyatsopolya omwatsi waghe n’erinibughira, kandi akendisyanitswera n’erinilusya omo byala byaghu.”
16 Daudi mwabya abibugha eribwira Sauli y’ebinywa ebi, Sauli mwabugha ati: “Oyo ni mulenge waghu, iwe mughala waghe Daudi?” Neryo Sauli mwalira kutsibu.
17 Kandi Sauli mwabwira Daudi ati: “Iwe usingene, n’ingye w’amakosa, kundi mukanikolera ebyuwene, aliwe ingye namakukolera ebituwene.
18 Munabwire mukanikanganaya ngoko uwite omutima oghuwene. Yehova mwakanihira omo byala byaghu, aliwe siwetaniita.
19 Hane omundu oyo wangahindana n’enzighu yiwe, neryo inialekayo, ighende isyetakolerayo kibi? Yehova akendisyakuhemba busana n’ebyo wamanikolera munabwire.
20 Ninasi ndeke-ndeke ngoko ukendibya mwami n’obwami bwe Israeli bukendisyabya bwaghu kera na kera.
21 Neryo lino, unilapire omo rina rya Yehova ngoko siwendisyiita abana baghe nabihola, kandi ngoko siwendisyabughaho erina ryaghe omo kihanda kya baba waghe.”
22 Neryo Daudi mwalapira Sauli. Enyuma sy’aho, Sauli amasuba ewiwe, aliwe Daudi n’abasuda biwe mubasuba omo mwanya ogho mundu ateangahikamo bweghu-bweghu.
Amaelezo awehikwa
^ Kinywa kwa kinywa, “akayaswika ebisando biwe.”
^ Kutse “bunya-mutima; zamiri.”
^ Kutse alinga, “mwapanza-panza.”
^ Kutse “ukita enafsi yaghe.”
