Samweli w’Erimbere 25:1-44
25 Habere habilaba mughulu mulebe, Samweli mwahola. Abaisraeli bosi mubahindana erilira Samweli n’erimuta hakuhi n’enyumba yiwe e Rama. Enyuma sy’aho, Daudi mwaya omo mbwarara ye Parani.
2 E Maoni, yabya omulume mughuma oyo wabya iniatungire esyonyama e Karmeli.* Omulume oyo abya muteke kutsibu, abya n’esyombuli 3 000 n’esyombene 1 000. Oko mughulu oyo, abya akatwa oko syombuli siwe k’obweya e Karmeli.
3 Omulume oyo iniakuhulawa mo Nabali, n’omukali wiwe iniakahulawa mo Abigaeli. Omukali wiwe abya n’amenge kandi ini mubuya, aliwe omulume wiwe abya mutsibu kandi syabya n’emibere eyuwene, abya w’omo kihanda kya Kalebu.
4 Omughulu Daudi abya omo mbwarara, mwowa ngoko Nabali anemutwa oko syombuli siwe k’obweya.
5 Neryo Daudi mwatuma abalwana 10 eyiri Nabali, mwababwira ati: “Muhetukire e Karmeli. Mukendibya mwabihika eyiri Nabali, imwamubwira muti nanzire eriminya ng’anuwene.
6 Kandi mukendimubwira muti, ‘Ukote kandi ubye n’obuholo, n’ekihanda kyaghu kibye n’obuholo, n’ebyosi ebyo uli nabyo bibye ndeke.
7 Mungowa ngoko unemutwa oko syombuli syaghu k’obweya. Omughulu abalisya baghu babya haghuma netu, mututabakolera muhanda, kandi mubatabula ekindu kyosi-kyosi omo mughulu wosi ogho twabya nabo e Karmeli.
8 Wamabibulya abaghombe baghu, ibakendikubwira. Abalwana baghe basimawe omo meso waghu, kundi mutukasa oko mughulu w’obutseme.* Kisi uha abaghombe baghu n’omughala waghu Daudi oko byalya ebiryasaka.’”
9 Neryo abalwana ba Daudi mubaya eyiri Nabali, bamamubwira ebyosi ebyo Daudi alyabalayira. Mubabya babibugha erimubwirabyo,
10 Nabali mwasubirya abaghombe ba Daudi ati: “Daudi nindi? N’omughala wa Yese nindi? Lino abaghombe banene banemutswa oko bakama babo.
11 Ingye nanganimya omukati waghe, amaghetse waghe, n’enyama eyo nabiriteghekanirya abakatwa oko syombuli syaghe k’obweya, neryo inahabyo abandu abo nitasi nga bakasira hayi?”
12 Neryo abalwana ba Daudi mubasubula, bamayabwira Daudi ebyosi ebyo Nabali alyababwira.
13 Daudi mwalw’iniabwira abalume biwe ati: “Obuli mundu imaye omuyali wiwe!” Neryo obuli mundu mwahira omuyali wiwe omo lubo* lwagho, Daudi naye mwahira omuyali wiwe omo lubo lwagho. Abalume abaghenda na Daudi babya balume hakuhi 400, aliwe abasighala n’emizigo babya balume 200.
14 Oko mughulu oyo, omughuma w’oko baghombe ba Nabali mwabwira Abigaeli omukali wa Nabali ati: “Daudi oyuli omo mbwarara mwakatuma abandu ati basyabulaye omukama wetu ng’anuwene, aliwe omukama wetu mwakatsambabo.
15 Abalume abo mubatukolera ebyuwene, babya isibebatatukolera ekibi ekiro n’ekighuma. Omughulu wosi ogho twabugha n’abo omoli, isitwetwataherya ekindu n’ekighuma.
16 Babya ng’oluhimbo olwabya lututimbireko, babya bakatuteya omo musibo n’omo kiro, ibakabya haghuma netu omo mughulu wosi ogho twabya tukalisya esyonyama.
17 Neryo kisi, uminye ekyo ukendikola, kundi omukama wetu n’ab’omo nyumba yiwe yosi bakendihikirwa n’obuhanya, aliwe omukama wetu ni mundu oyutatsomene,* neryo omundu syangamubwira mwatsi.”
18 Neryo Abigaeli mwalw’inimya emikati 200, amalegha abiri manene-manene awalimo edivai, esyombuli itano esyabirikerwa, esyosea* itano sy’engano eyisusire,* esyogato 100 sy’emizabibu eyumire, n’esyogato 200 sy’esyotini esyumire, amasengera ebyosi by’oko syopunda.
19 Neryo mwabwira abaghombe biwe ati: “Mubye embere, naghe ngendibakwama.” Aliwe mwatabwira omulume wiwe Nabali yo kindu kyosi-kyosi.
20 Abigaeli mwandaghala oko kitwa inianikere oko punda yiwe. Daudi n’abalume biwe nabo babya ibanemundaghala, aliwe mubatalangira Abigaeli, kundi abya enyuma sy’ekitwa. Mubasisira ibamabihindana.
21 Oko mughulu oyo, Daudi abya inianemubugha ati: “Kwesi nabya ngateya ebindu bya Nabali byo bule omo mbwarara. Sihali n’ekindu kiwe n’ekighuma ekibawa, aliwe akaniliha ekibi busana n’ekibuya.
22 OMungu ahe esyonzighu syaghe* sy’amalipizi awakalire, namatendiita abalume* bosi b’omo nyumba yiwe omungya omo tututu.”
23 Abigaeli abere abilangira Daudi, mwalw’iniakima oko punda, amakukama embere sya Daudi n’erihira obusu bwiwe b’oko kitaka.
24 Mwayighusa oko bisandu biwe, neryo amamubwira ati: “Mukama waghe, amakosa wosi uhiregho oko mutwe waghe. Leka ngakanaye naghu, unihulikirire ingye mughombe waghu w’obukali.
25 Kisi mukama waghe, isiwakwama ebya Nabali,* oyo ni mundu bule. Iye yo Nabali, ni mukiru ngoko erina riwe ribughire, aliwe ingye mughombe waghu mundalola oko balwana obo watuma.
26 Neryo mukama waghe, oko kwenene-kwenene ngoko Yehova aliho kandi oko kwenene-kwenene ngoko uliho,* Yehova yulyaleka iwatabyako ekosa y’eryuta omusasi, kandi yulyaleka ighutayituhulirya.* Esyonzighu syaghu n’abosi abakakusunzira ebibi babye nga Nabali.
27 Neryo kisi, iwe mukama waghe, unilighire eriha ekihembo ekyo niryakuletera ky’abalwana baghu, abakabya ibane haghuma naghu.
28 Kisi, ughanyire ekosa yaghe, ingye mughombe waghu, kundi oko kwenene Yehova akendisyayira abana baghu mo batabali oko mughulu muli, kundi amalwa ogho ukalwa ni wa Yehova; kandi oho ukatabutirwa, siwewatakola ekosa n’enguma.
29 Omughulu hakendisyabya hakabya omundu oyukasonda erikwita, Yehova akendisyabya akateya engebe* yaghu, iniabya ng’amaboherayo omo kabuta, aliwe akendisyalasa engebe* y’esyonzighu syaghu ngoko omundu akalasa eribwe ry’omo mujeledi.*
30 Omughulu Yehova akendisyakukolera ebibuya byosi ebyo abirikulagha, iwe mukama waghe, kandi omughulu akendisyakuyira mo mukulu we Israeli,
31 siwendisyayikubya b’omo kundi ighukendisyabya imoghututa omusasi wo bule, kandi kundi iwe mukama waghe imoghutayituhulirya ighuwene-wene. Mukama waghe, omughulu Yehova akendisyakukolera ebibuya, isiwasyanibirirawa, ingye mughombe waghu w’obukali.”
32 Neryo Daudi mwabwira Abigaeli ati: “Yehova oMungu we Israeli, apipawe, oyulyakutuma munabwire erisyahindana naghe!
33 Kandi oMungu akutsumule busana n’amenge waghu, utsumulawe kundi munabwire mukanikakiraya eribyako ekosa y’eryuta omusasi n’ey’eriyituhulirya* ingyuwene-wene.
34 Aliwe oko kwenene-kwenene ngoko Yehova oMungu we Israeli aliho, oyulyaleka inatakukolera ekibi, ngaghutalyasa luba erisyahindana naghe, etututu yangahikire inabiriita abalume* bosi b’omo nyumba ya Nabali.”
35 Neryo Daudi mwaligha ebyo Abigaeli amuletera, kandi mwamubwira ati: “Suba ewaghu yo buholo, namabyowa ebyo wamabinibwira. Ngendisyakola ebyo wamanisaba erikola.”
36 Enyuma sy’aho, Abigaeli mwasuba eyiri Nabali. Nabali* abya inianemukola efete ng’omwami omo nyumba yiwe, abya iniabiritsema kandi iniabirikunda kutsibu. Abigaeli mwatamubwira kindu erihika omughulu eryuba ryabya rikasonda erihuluka.
37 Omo tututu ibwabirihwa oko Nabali, omukali wiwe mwamubwira ebyosi ebiryalaba. Neryo omutima wa Nabali mwabya ng’omutima w’omundu oyuholire, mwabya ng’eribwe eritetengana.
38 Habere habilaba ebiro hakuhi 10, Yehova mwita Nabali, neryo amahola.
39 Daudi abere abyowa ngoko Nabali abirihola, mwabugha ati: “Yehova apipawe, oyulyanilwirako Nabali abinitsamba, neryo amita Nabali oyulyaleka ingye mughombe wiwe initakola ekibi, kandi Yehova mwakahira ebibi bya Nabali oko mutwe wiwe.” Neryo Daudi mwatuma abandu ati bayabwire Abigaeli ngoko anzire iniamuyira mo mukali wiwe.
40 Neryo abaghombe ba Daudi mubaya e Karmeli, bamayasungana na Abigaeli. Mubamubwira bati: “Daudi mwakatutuma ati tusyakubwire tuti anzire iniakuyira mo mukali wiwe.”
41 Abigaeli mwalw’iniahangana, amakukama n’erihira obusu bwiwe b’oko kitaka. Mwabugha ati: “Muyabwire omukama waghe muti: Niri mughombe waghu. Nine tayari erinabya ebisandu by’abaghombe baghu.”
42 Neryo Abigaeli mwahangana, amasambira oko punda yiwe. Mwakwama abalume abo Daudi atuma, abaghombe biwe batano b’obukali ibanamukwamire enyuma. Abigaeli kw’abya atya mukali wa Daudi.
43 Kandi Daudi mwayira Ahinoamu we Yezreeli mo mukali wiwe, neryo abosi babiri mubabya bakali biwe.
44 Aliwe Sauli abya iniabiriha Palti y’omwali wiwe ye Mikali, omukali w’erimbere wa Daudi, mo mukali wiwe. Palti abya mughala wa Laishi, oyo wabya we Galimu.
Amaelezo awehikwa
^ Ni muyi we Yuda, aliwe si ky’Ekitwa kye Karmeli.
^ Kinywa kwa kinywa, “kiro ekyuwene.”
^ Ni kindu ky’erihiramo omuyali.
^ Kutse “ni mundu bule.”
^ Eseya nguma ini syolitre 7,33. Ulebaye Endomeko B14.
^ Kutse “eyikalangire.”
^ Kutse alinga, “Daudi.”
^ Kinywa kwa kinywa, “obuli mundu oyukasubala oko luhimbo.” Ni binywa by’Ekiebrania ebikakolesibawa eripokya abalume.
^ Ni bugha ambu “omukiru; oyutawite hakili; omundu bule.”
^ Kutse “enafsi yaghu iriho.”
^ Kutse “iwayisabula.”
^ Kutse “enafsi.”
^ Kutse “enafsi.”
^ Kutse “ng’eribwe erikalua omo kahu k’omujeledi.”
^ Kutse “n’eriyisabula.”
^ Kinywa kwa kinywa, “obuli mundu oyukasubala oko luhimbo.” Ni binywa by’Ekiebrania ebikakolesibawa eripokya abalume.
^ Kinywa kwa kinywa, “Omutima wa Nabali.”
