Samweli w’Erimbere 26:1-25
26 Enyuma sy’aho, abalume be Zifu mubaya eyiri Sauli e Gibea, n’erimubwira bati: “Daudi anabiseme omo katwa ke Hakila, akahererenie ne Yeshimoni.”*
2 Neryo Sauli mwaghenda n’abalume 3 000 abasombola omo balume be Israeli, mubayarondya Daudi omo mbwarara ye Zifu.
3 Neryo Sauli mwahira ekambi yiwe oko katwa ke Hakila, akahererenie ne Yeshmoni, akali hakuhi n’endaki. Oko mughulu oyo, Daudi abya iniane omo mbwarara. Mwowa ngoko Sauli anemumukwamirira omo mbwarara.
4 Neryo Daudi mwatuma abandu bayalebaye Sauli ng’anabirihika omo mbwarara.
5 Habere habilaba mughulu mulebe, Daudi mwaya eyo Sauli abya iniahirire ekambi yiwe. Daudi mwabya abihikayo, mwalangira oho Sauli na Abneri, mughala wa Neri, omukulu w’abasuda ba Sauli, babya baghotsere; Sauli abya aghotsere omo kambi abasuda biwe ibanamutimbireko, nabo ibanaghotsere.
6 Neryo Daudi mwabulya Ahimeleki Omuhiti na Abishai, mughala wa Zeruya, mughala wa Yoabu, ati: “Nindi yukendindaghala haghuma naghe ngaya omo kambi ya Sauli?” Abishai mwamusubirya ati: “Ingye ngendighenda naghu.”
7 Neryo Daudi na Abishai mubaghenda eyiri abasuda omo kiro. Mubeya Sauli inianaghotsere omo kambi n’eritumo riwe ryabya irinatsimbire omo kitaka hakuhi n’omutwe wiwe; Abneri n’abandi basuda babya ibanamutimbireko, nabo ibanaghotsere.
8 Neryo Abishai mwabwira Daudi ati: “Munabwire ky’ekiro ekyo Mungu alyahira enzighu yaghu omo byala byaghu, leka nimutsimitire oko kitaka omo ritumo ryaghe, sinendimutsimita kabiri, ikendibya ngendo nguma nyisa.”
9 Aliwe Daudi mwabwira Abishai ati: “Isiwamukola nabi, nindi yo wangasumbira ebyala biwe oko oyo Yehova abirihirako amaghuta neryo iniatabyako lubanza?”
10 Kandi Daudi mwabugha ati: “Oko kwenene-kwenene ngoko Yehova aliho, Yehova iyuwene-wene yukendisyamwita, kutse eryo ekiro kilebe kikendisyahika, neryo iniahola, kutse akendisyaya omo malwa, neryo iniahola.
11 Kundi nisikirye Yehova, sindinatalengekania n’ekiro n’ekighuma erikolera omundu oyo Yehova abirihirako amaghuta yo muhanda! Wimaye eritumo eriri hakuhi n’omutwe wiwe n’akalegha k’amaghetse, neryo tughende.”
12 Neryo Daudi mwimya eritumo n’akalegha k’amaghetse ebyabya hakuhi n’omutwe wa Sauli, neryo mubayighendera. Sihabya n’omundu n’omughuma oyo wabalangira kutse oyo waminya kutse oyo wabuka, abosi babya ibabirighotsera, kundi Yehova abya iniabiribaghotserya ehighotseri hinene.
13 Neryo Daudi mwasokera oko ghundi musirya w’ekitwa, amayimana oko singyi y’ekitwa, hali na Sauli.
14 Neryo Daudi mwabirikira abasuda ba Sauli na Abneri mughala wa Neri, mwabugha ati: “Abneri unaniowire?” Abneri mwasubirya ati: “Ulindi iwe ukakenderya omwami?”
15 Daudi mwabwira Abneri ati: “Si uti uli mulume. Omo Israeli mune oyuli ng’awe kwe? Busanaki siwetateya omukama waghu kandi omwami waghu? Ngabugha nitya kundi omusuda mughuma mwakingira omo kambi akasonda eriita omukama waghu kandi omwami waghu.
16 Ekyo ulyakola sikyuwene. Oko kwenene-kwenene ngoko Yehova aliho, utolere iwahola, kundi siwetateya omukama waghu, omundu oyo Yehova abirihirako amaghuta. Terilebya oho lutambi okw’iwe! Eritumo ry’omwami n’akalegha k’amaghetse ebilue hakuhi n’omwami biri hayi?”
17 Neryo Sauli mwaminya omulenge wa Daudi, mwabugha ati: “Oyo ni mulenge waghu, mughala waghe Daudi?” Neryo Daudi mwamusubirya ati: “Inga, n’ingye mukama waghe kandi mwami waghe.”
18 Kandi Daudi mwatasyabugha ati: “Omukama waghe akanikwamirira ingye mughombe wiwe busanaki? Mungakolaki kandi mungatwa lwahi?”
19 Mukama waghe kandi mwami waghe, kisi uhulikirire ebyo ingye mughombe waghu ngakubwira: Yehova amabya iy’ukaleka iwalwa naghe, uleke alighe ekihembo* ky’akalyo ekyo ngamuherera. Aliwe abandu bamabya ibo bakaleka iwalwa naghe, batakirawe embere sya Yehova, kundi babirinihigha kusudi isinasyabya haghuma n’abandu ba Yehova. Ngayowa nga bakanibwira bati, ‘Ghenda, uyakolere eyindi miungu!’
20 Aliwe ingye sinanzire eriholera hali na Yehova. Busanaki ukahindanaya abasuda busana n’eriyarondya ekiloko bule, neryo iwabya nga ukayahighaho engwali y’omo bitwa?”
21 Neryo Sauli mwasubirya ati: “Nabirikola erilolo. Subula, mughala waghe Daudi. Sinendisyasyakukolera ekibi, kundi munabwire mukalangira ngoko engebe* yaghe ni y’omughaso. Ebyo niryakola ni bukiru, mungakola ekosa eyikalire.”
22 Daudi mwamusubirya ati: “Mwami waghe, eritumo ryaghu ry’eri. Utume omughuma w’oko balwana baghu asyenderyo.
23 Yehova y’ukendisyaliha obuli mundu oyutunganene n’obuli mundu mutaleghula. Munabwire, Yehova mwakakuhira omo byala byaghe, aliwe munditanza erikolera muhanda omundu oyo Yehova abirihirako amaghuta.
24 Munabwire mungalangira engebe* yaghu mo y’omughaso. Yehova naye alangire engebe yaghe mo y’omughaso, kandi anilusaye omo hatari yosi.”
25 Neryo Sauli mwabwira Daudi ati: “Mughala waghe Daudi, utsumulawe. Oko kwenene, ukendisyakola emyatsi mikulu-mikulu. Ebyosi ebyo ukendisyakola, bikendisyaghenda ndeke.” Enyuma sy’aho, Daudi mwayighendera, na Sauli amasuba ewiwe.
Amaelezo awehikwa
^ Kutse alinga, “n’embwarara.”
^ Kinywa kwa kinywa, “owe ekikumbo ky’ekihembo.”
^ Kutse “enafsi.”
^ Kutse “enafsi.”
