Samweli w’Erimbere 27:1-12
-
Abafilistini bamaha Daudi omuyi we Ziklagi (1-12)
27 Aliwe Daudi mwayibwira ati: “Kiro kighuma, Sauli akendisyaniita. Ekyo nangakola ry’eritibitira omo kihugho ky’Abafilistini, neryo Sauli akendileka erinisondya-sondya omo kihugho kyosi kye Israeli, aho ngendibya inamabibala.”
2 Neryo Daudi mwaghenda n’abalume 600 ababya bakamukwama. Mwaya ewa Akishi, mughala wa Maoki, omwami we Gati.
3 Daudi mwikala ewa Akishi e Gati, iye n’abasuda biwe, n’obuli mulume abya n’ekihanda kiwe. Daudi abya n’abakali biwe babiri. Habya Ahinoamu owe Yezreeli, na Abigaeli Omunya Karmeli, omukwa-kali oyo wabya mukali wa Nabali.
4 Sauli abere abyowa ngoko Daudi abiritibitira e Gati, mwaleka erimusondya-sondya.
5 Neryo Daudi mwabwira Akishi ati: “Wamabya iwabirinitsemera, unilighire erikala omo mughuma w’oko milongo. Kundi sinilangire ekyangaleka ingye mughombe waghu inikala haghuma naghu omo muyi w’omwami.”
6 Neryo ekiro ekyo, Akishi mwamuha omulongo we Ziklagi. Kyo kikaleka omulongo we Ziklagi iniabya w’abami be Yuda erihika na munabwire.
7 Daudi mwabugha omo mulongo oyo w’Abafilistini mo mwaka mughuma n’emisi 4.
8 Daudi n’abalume biwe ibakabya ibanemuyalwa n’Abageshuri, Abagirizi, n’Abaamaleki. Ebihanda ebyo byabya bikere omo kiharo ekitsukire e Telamu eriyahika e Shuri, n’eriyahika oko mupaka we Misri.
9 Omughulu Daudi abya akayalwa n’abandu b’omo kiharo kilebe, iniakita abandu bosi, angabya mulume kutse mukali. Aliwe iniakimaya esyombuli, esyonde, esyopunda, esyongamia, n’esyongyimba, neryo iniasuba ewa Akishi.
10 Neryo Akishi iniakamubulaya ati: “Munabwire ulyayalwa n’abandu b’omo kiharo kyahi?” Daudi iniakamusubiraya ati: “Mungayalwa n’ab’oko luhande lw’eyikwa* lwe Yuda” kutse “Mungayalwa n’ab’oko luhande lw’eyikwa lw’ekiharo ky’Abayerameeli” kutse “Mungayalwa n’aboko luhande lw’eyikwa lw’ekiharo ky’Abakeni.”
11 Daudi isyalibalaya omundu wosi-wosi, angabya mulume kutse mukali bakasyaletwa e Gati, neryo omw’ibo imwabya oyukakanaya ebiryakoleka omw’ibugha ati, ‘Daudi mwakakola atya n’atya.’” (Kw’abya akakola atya omo mughulu wosi owabugha omo mulongo w’Abafilistini.)
12 Neryo Akishi abya akaligha ebyo Daudi abya akamubwira. Akishi iniakayibwira ati: ‘Kwenene abiribya kindu ekikakumba muhanda oko bandu biwe Abaisraeli, aho akendibya omughombe waghe biro byosi.’
Amaelezo awehikwa
^ Kutse “lwe Negebu.”
