Samweli w’Erimbere 28:1-25
-
Sauli amayasungana n’omukali mulaghuli e En-dori (1-25)
28 Oko mughulu oyo, Abafilistini mubahindania abasuda babo batoke eriyalwa n’Abaisraeli. Neryo Akishi mwabwira Daudi ati: “Unasi ndeke-ndeke ngoko iwe n’abalume baghu mukendighenda naghe omo malwa.”
2 Neryo Daudi mwasubirya Akishi ati: “Unasi ndeke-ndeke ngoko ingye mughombe waghu sinangabula erikukwama.” Akishi mwabwira Daudi ati: “Busana n’ekyo, ukendibya ukaniteya mughulu wosi.”*
3 Oko mughulu oyo, Samweli abya iniabirihola. Abaisraeli bosi mubamulira, bamamuta omo muyi wiwe, e Rama. Sauli abya iniabirilusya omo kihugho mw’abakumu n’abalaghuli.
4 Abafilistini mubahindana, bamayahira ekambi yabo e Shunemu. Sauli naye mwahindania abasuda bosi be Israeli, bamayahira ekambi yabo e Gilboa.
5 Sauli abere abilangira ekambi y’Abafilistini, mwasagha, omutima wiwe mwapuka-puka kutsibu.
6 Omughulu Sauli abya akabulya Yehova y’obusondoli, Yehova mwatabya akamusubirya omo nzoli kutse erilabira e Urimu, kutse erilabira abaminyereri.
7 Oko nduli, Sauli mwabwira abaghombe biwe ati: “Munironderaye omukali oyukakola obukumu, ngendiyamubulirirya.” Abaghombe biwe mubamusubirya bati: “Omukali oyukakola obukumu ali e En-dori.”
8 Neryo Sauli mwalusya esyongyimba siwe, amambala esindi ngyimba bakasyamuminya. Mwaghenda n’abalume biwe babiri, bamayasungana n’omukali oyo omo kiro. Sauli mwamubwira ati: “Ulaghule omw’ikola ngoko omukumu akakola utoke erinikanirya n’omundu oyo ngendikubwira.”
9 Aliwe omukali mwamusubirya ati: “Si unasi ndeke-ndeke ngoko Sauli abiribugha abakumu n’abalaghuli b’omo kihugho, neryo busanaki ukasonda erinilengako?* Wanzire inahola?”
10 Neryo Sauli mwamulapira embere sya Yehova, mwamubwira ati: “Oko kwenene-kwenene ngoko Yehova aliho, siwendibyako olubanza omo mwatsi ono!”
11 Omukali oyo mwamubulya ati: “Wanzire inakukanirya nandi?” Mwamusubirya ati: “Unikaniraye na Samweli.”
12 Omukali oyo abere abilangira “Samweli,”* mwalaka kutsibu, neryo amabulya Sauli ati: “Ulyaniteba busanaki? Ka y’ono n’iwe Sauli!”
13 Omwami Sauli mwamubwira ati: “Isiwasagha, nibwire ekyo wamalangira.” Omukali oyo mwasubirya Sauli ati: “Namalangira omundu oyuli ng’omungu akaluira omo kitaka.”
14 Aho n’aho Sauli mwamubulya ati: “Asosire ati?” Omukali oyo mwamusubirya ati: “Ni musyakulu oyumbite erikoti eriteko maboko, anemwasira omo kitaka.” Neryo Sauli mwaminya ngoko ni “Samweli,” neryo mwakukama, amahira obusu bwiwe b’oko kitaka.
15 Neryo “Samweli” mwabwira Sauli ati: “Ukanikenderaya busanaki? Ulyabugha uti banibirikire busanaki?” Sauli mwamusubirya ati: “Nabirihangya-hangya kutsibu. Abafilistini banemulwa naghe, n’oMungu abirinileka, syalisyanisubirya erilabira abaminyereri kutse esyonzoli, kyo kiryaleka inakubirikira utoke erinibwira ekyo nangakola.”
16 “Samweli” mwamubulya ati: “Neryo busanaki ukanza erinibulya ighunasi ngoko Yehova syakiri haghuma naghu, kandi ngoko abiribya nzighu yaghu?
17 Yehova iyuwene-wene akendikola ekyo abugha ati ngakubwire: Yehova akendikulusyako obwami, akendihabo oghundi mulume nga we, akendihabo Daudi.
18 Kundi mughutakwama ebyo Yehova akubwira, kandi mughutita Abaamaleki abaleka iniahitana kutsibu, ekyo kyo kyamaleka Yehova iniakukolera atya munabwire.
19 Kandi Yehova akendikuhira iwe n’Abaisraeli omo byala by’Abafilistini, n’omungya iwe n’abaghala baghu mukendisyabya haghuma naghe. Kandi Yehova akendisyahira abasuda be Israeli omo byala by’Abafilistini.”
20 Sauli mwabya abyowa ebinywa bya “Samweli,” mwalw’iniasagha kutsibu. Mwayikunungukako, amasighala iniabiriyilambika ahisi. Mwatasyabya n’akaghala, kundi isyalitalya omo musibo wosi, n’omo kiro kyosi.
21 Neryo omukali oyo mwaseghera hakuhi na Sauli, amalangira ngoko Sauli abirihangya-hangya kutsibu. Neryo omukali oyo mwabulya Sauli ati: “Si mungakwama ebyo ulyanibwira, namahira engebe yaghe y’omo bwiko, namakola n’ebyo ulyanisaba.
22 Neryo kisi uhulikirire ebyo ingye mughombe waghu ngakubwira, ngakuha omukati, utsuke erirya embere usubule imo wabya n’akaghala.”
23 Aliwe mwaghana erirya, mwabugha ati: “Sinendirya.” Aliwe abaghombe biwe n’omukali oyo mubamuhatikana kutsibu. Neryo oko nduli, mwahulikirirabo, mwahangana, amikala oko ngyingo.
24 Neryo aho n’aho omukali oyo mwalw’iniakera ekyana ky’ende eky’abya nakyo, amimya n’efarine, amaponda-pondayo, neryo amahuka muyo mw’emikati eyitemo levire.*
25 Ebyosi ebyo mwahabyo Sauli n’abaghombe biwe. Babere babirya, bamasubula omo kiro ekyo kisa-kisa.
Amaelezo awehikwa
^ Kinywa kwa kinywa, “ukendibya ukateya omutwe waghe biro byosi.”
^ Kutse “erilenga oko nafsi yaghe.”
^ Kutse “ekindu ekyalangirika nga Samweli.”
^ Kutse “kihamya.”
