Samweli w’Erimbere 29:1-11
-
Abafilistini sibatahira omo Daudi mw’amaha (1-11)
29 Abafilistini mubahindania abasuda babo bosi e Afeki, n’Abaisraeli ibabirihira ekambi yabo hakuhi n’ekitehero kye Yezreeli.
2 Abakama b’Abafilistini babya bakasegherya abasuda babo b’embere omo malwa, ibabiriyipanga mo bikuto by’amamia n’eby’amaelfu. Daudi n’abalume biwe babya bakabakwama enyuma ibane haghuma na Akishi.
3 Neryo abakulu b’Abafilistini mubabulya Akishi bati: “Abaebrania bakakola hano ho ki?” Akishi mwabasubirya ati: “Ono ni Daudi, omughombe wa Sauli, omwami we Israeli. Twamabibugha omwaka kutse ebiro binene okw’aho itune haghuma naye. Eritsuka omughulu atswa omo kambi yabo erihika na lino, sindinatamulangirako kibi.”
4 Aliwe abakulu b’Abafilistini mubamuhitanako, neryo mubamubwira bati: “Usubulaye omundu oyo, asube omo kiharo ekyo wabugha uti ikalemo. Syendindaghala haghuma netu tukaya omo malwa, akasyatubindukira itune omo malwa. Amabya inianzire omwami wiwe iniatasyamutsemera, iniakenditwa emitwe y’abalume betu.
5 Indi mbino ono yo Daudi, oyo babya bakimbira ibanemusata, n’eribugha bati:
‘Sauli mwakita amaelfu w’esyonzighu,Na Daudi mwakita amakumi w’amaelfu.’”
6 Neryo Akishi mwabirikira Daudi, amamubwira ati: “Oko kwenene-kwenene ngoko Yehova aliho, uli mutunganene. Nanzire itwaghenda haghuma naghu omo malwa haghuma n’abasuda baghe, kundi eritsuka ekiro wasa erihika na munabwire sindinatakusungako ekibi. Aliwe abakama b’Abafilistini bakakutika-tikira.
7 Neryo usubule buholo. Kandi isiwakola ekindu kyosi-kyosi ekikendileka abakama b’Abafilistini ibahitana.”
8 Aliwe Daudi mwabwira Akishi ati: “Mungakolaki ekyamaleka iwanisubulya? Eritsuka ekiro ingye mughombe waghu nasa ewaghu, erihika munabwire, nabirikukolera ekibi kyahi? Hane ekyangaleka inataghenda naghu eriyakuwatikya erilwa n’esyonzighu syaghu, iwe mukama waghe kandi mwami waghe?”
9 Akishi mwasubirya Daudi ati: “Okw’ingye, wabiribya mubuya ng’omumalaika w’oMungu, aliwe abakama b’Abafilistini mubakabugha bati, ‘Syendighenda netu omo malwa.’
10 Neryo omungya, ukendisyabuka omo tututu, iwe n’abalume b’omukama waghu, mukendisyayiteghekania n’erighenda bwabinakya.”
11 Bwabere bwabibya tututu, Daudi n’abalume biwe mubahangana, bamasuba omo kihugho ky’Abafilistini, aliwe Abafilistini mubaghenda e Yezreeli.
