Samweli w’Erimbere 3:1-21
-
Samweli amasombolwa mo muminyereri (1-21)
3 Oko mughulu oyo, omulwana Samweli abya akakolera Yehova akasondolwa na Eli. Oko biro ebyo, Yehova abya isyakibeghere erikania n’abandu, kandi sihabya esyonzoli nene esyabya sikalua oko Mungu.
2 Kiro kighuma, Eli abya inianaghotsere aho abya abeghere erighotsera, n’ameso wiwe abya iniakisiya inialibana, abya isyalisyalangira ndeke.
3 Etala y’oMungu yabya isiriyalima, na Samweli abya akaghotsera omo hekalu* ya Yehova ahabya Erisanduku ry’oMungu.
4 Neryo Yehova mwabirikira Samweli, naye mwasubirya ati: “Ingye y’ono.”
5 Neryo mwatibita eyiri Eli n’erimubwira ati: “Ingye y’ono, si mukanibirikira.” Aliwe Eli mwamubwira ati: “Sinitakubirikira, usube omo ngyingo.” Neryo mwasuba omo ngyingo.
6 Yehova mwamubirikira engendo y’akabiri ati: “Samweli!” Neryo Samweli mwahangana, amaya eyiri Eli, n’erimubwira ati: “Ingye y’ono, si mukanibirikira.” Aliwe Eli mwamubwira ati: “Mughala waghe, sinditakubirikira, suba omo ngyingo.”
7 (Oko mughulu oyo, Samweli abya isyalyaminya Yehova yo ndeke-ndeke, kandi Yehova abya isyalyatakania naye.)
8 Yehova mwamubirikira engendo y’akasatu ati: “Samweli!” Neryo Samweli mwahangana, amaya eyiri Eli, n’eribugha ati: “Ingye y’ono, si mukanibirikira.”
Neryo Eli mwafumbula ngoko Yehova yo wabya akabirikira omulwana oyo.
9 Neryo Eli mwabwira Samweli ati: “Ghenda uyaghotsere. Amatasyakubirikira, iwabugha uti, ‘Yehova, kanaya, omughombe waghu anahulikirire.’” Neryo Samweli mwatasyayaghotsera aho akaghotsera.
10 Yehova mwasa, amimana aho, kandi mwabirikira ngoko anakola, ati: “Samweli, Samweli!” Na Samweli mwamusubirya ati: “Kanaya, kundi omughombe waghu anahulikirire.”
11 Yehova mwabwira Samweli ati: “Hulikirira! Ngendisyakola omo Israeli m’omwatsi owakendisyaswekya* abosi abakendisyowagho.
12 Ekiro ekyo, ngendisyakola ebyosi ebyo nabiribugha oko Eli n’ekihanda kiwe, eritsuka oko mwanzo erihika oko mwiso.
13 Ukendimubwira uti ngendisyaha ekihanda kiwe ky’amalipizi wa kera na kera busana n’ekosa y’abaghala biwe. Anasi ndeke-ndeke ngoko mubabya bakatakira oMungu, aliwe mwatabakunga.
14 Busana n’ekyo, nabirilapira ekihanda kya Eli niti sihali obuhere kutse ekihembo ekikendisyahererwa ekosa y’ekihanda kya Eli yitoke erighanyirwa.”
15 Samweli mwaghotsera erihika omo tututu. Enyuma sy’aho, mwakingula emilango y’enyumba ya Yehova. Samweli mwasagha eribwira Eli enzoli eyo alyalangira.
16 Aliwe Eli mwabirikira Samweli ati: “Samweli, mughala waghe!” Naye mwasubirya ati: “Ingye y’ono.”
17 Eli mwamubwira ati: “Mwakakubwira atiki? Kisi, isiwanibisa mwatsi. OMungu akuhe amalipizi awakalire wamabinibisa ekinywa n’ekighuma ky’oko ebyo alyabugha.”
18 Neryo Samweli mwamubwira emyatsi yosi, mwatamubisa ekinywa n’ekighuma. Neryo Eli mwabugha ati: “Ni Yehova. Akole ngoko anzire.”
19 Samweli mwaendelea erikula, na Yehova abya haghuma naye. Omo binywa biwe, mumwatabya n’ekighuma ekyabula eribererera.*
20 Abaisraeli bosi eritsuka e Dani eriyahika e Beeri-sheba mubaminya ngoko Samweli abiribya muminyereri wa Yehova.
21 Yehova mwabya akahulukira Samweli e Shilo, eyo yo Yehova abya akayiminyisya oko Samweli, kandi eyo yo Yehova abya akakania naye.
Amaelezo awehikwa
^ Ni bugha ambu, ehema.
^ Kinywa kwa kinywa, “owakendileka amatwi wosi awabiri iniabyamo obuyuyu.”
^ Kinywa kwa kinywa, “ekyatoghera ahisi.”
