Samweli w’Erimbere 30:1-31
30 Ekiro ky’akasatu, omughulu Daudi n’abalume biwe bahika e Ziklagi, mubeya Abaamaleki ibabiriyalwa n’abandu abikere omo kiharo ky’eyikwa* n’ab’omo kiharo kye Ziklagi. Babya ibabirilwa n’abandu be Ziklagi n’eritimya omuyi wabo.
2 Babya ibabiriheka abakali n’abosi ababya omo muyi oyo, eritsuka oko mwana erihika oko mukulu. Mubatita omundu wosi-wosi, aliwe mubahekabo, bamayighendera.
3 Daudi n’abalume biwe babere babihika omo muyi oyo, mubeya ibabiritimyagho, ibabiriheka n’abakali babo, abana babo b’obulume n’ab’obukali mo banyewa.
4 Neryo Daudi n’abalume ababya haghuma naye mubalira kutsibu erihika oko kika bamaluha.
5 Abakali ba Daudi babiri nabo babya ibabirihekwa mo banyewa. Habya Ahinoamu we Yezreeli, na Abigaeli omukwa-kali, oyo wabya mukali wa Nabali we Karmeli.
6 Daudi mwahangya-hangya kutsibu, kundi abalume biwe* babya bakabugha bati bakamughusako amabwe. Abosi babya omo bulighe bunene, kundi babya ibabiriherya abana babo b’obulume n’ab’obukali. Aliwe Yehova oMungu wa Daudi mwamuwatikya eribya n’akaghala.
7 Neryo Daudi mwabwira omuhereri Abiatari, mughala wa Ahimeleki, ati: “Kisi leta e efodi yo hano.” Neryo Abiatari mwaletera Daudi ye efodi.
8 Daudi mwabulya Yehova ati: “Nanganakwamirira ababandi abalyaheka ebilwe omo muyi? Nanganahika kubo namabikwamirirabo?” Neryo oMungu mwamusubirya ati: “Kwamirirabo, kundi ukendibahikako n’erisubulya abandu abalyahekawa mo banyewa.”
9 Daudi n’abalume 600 ababya haghuma naye mubalw’ibaghenda, mubayahika eyiri omusya owakumamo amaghetse* we Besori, eyo bandu balebe ba kubo basighala.
10 Daudi mwaendelea n’olughendo haghuma n’abalume 400, n’abalume 200 mubasighala ahali omusya owakumamo amaghetse, kundi babya ibabiriluha kutsibu, babya isibangatoka erisoka omusya owakumamo amaghetse we Besori.
11 Abasuda mubasunga omulume mughuma Omumisri y’emoli, bamamutwala eyiri Daudi. Mubamuha akalyo n’amaghetse w’erinywa,
12 mubamuha n’ekihande ky’egato y’esyotini esyumire, n’esyogato ibiri sy’emizabibu eyumire. Omulume oyo mwabya abirya, amatasyabya n’akaghala.* Abya iniamabibugha ebiro bisatu isyetalya n’erinywa.
13 Neryo Daudi mwamubulya ati: “Uli mughombe wandi? Ukaluira hayi?” Neryo omulume oyo mwamusubirya ati: “Niri Mumisri, nabya mukobe w’Omuamaleki, aliwe omukama waghe mwanisigha, kundi munalwala hamabihwa biro bisatu.
14 Mutukayalwa n’abandu abikere omo kiharo ky’eyikwa* ky’Abakereti, n’ab’omo kiharo kye Yuda, n’abikere oko luhande lw’eyikwa lw’ekiharo ky’ekihanda kya Kalebu, mutukatimaya n’ekiharo kye Ziklagi.”
15 Neryo Daudi mwamubulya ati: “Wangananitwala eyiri abandu abo, abalyaheka ebindu by’omo muyi?” Omulume oyo mwamusubirya ati: “Ngendikutwalayo, aliwe utsuke walapa omo rina ry’oMungu ngoko siwendiniita, kandi ngoko siwendinihira omo byala by’omukama waghe.”
16 Neryo omulume oyo mwatwala Daudi eyiri abalume abaheka ebindu by’omo muyi, babya ibabiriyitsatsanga omo kiharo ekyo. Babya ibanemulya, erinywa, n’eriyisyandira busana n’ebindu ebyo baheka omo kihugho ky’Abafilistini n’omo kiharo kye Yuda.
17 Neryo Daudi mwitabo eritsuka omo tututu erihika omw’igholo. Muhatabala n’omughuma, erilusyako abalume 400 abatibita oko syongamia.
18 Daudi mwasubulya ebyosi ebyo Baamaleki babya ibabirimya, mwasabula n’abakali biwe babiri.
19 Muhatabula ekindu n’ekighuma kya Daudi n’abalume biwe, kyangabya kike kutse kinene. Mubasubulya abana babo b’obulume n’ab’obukali n’ebindu ebyo Baamaleki baheka. Daudi mwasubulya obuli kindu ekyo Abaamaleki babya ibabiriheka.
20 Neryo Daudi mwimya esyombuli syosi n’esyonde syosi sy’abalume abo. Abalume abo mubahirasyo embere w’esyonyama syabo. Babya bakabugha bati: “Sino sy’esyonyama esyo Daudi alyanyegha.”
21 Enyuma sy’aho, Daudi n’abosi abasubula haghuma naye mubahika ahali omusya owakumamo amaghetse we Besori. Neryo abalume 200 abasighala kundi ibabiriluha kutsibu mubasyakokya Daudi. Daudi mwaseghera hakuhi nabo, amababulya nga banuwene.
22 Aliwe abasuda balebe abaghenda haghuma na Daudi sibabya n’omutima oghuwene, kandi babya bandu bule. Mubamubwira bati: “Kundi abandu aba sibetaghenda haghuma netu, sitwendibaha oko bindu ebiryanyeghawa ebyo tulyasubulaya. Bimaye abakali babo n’abana babo, neryo baghende.”
23 Aliwe Daudi mwabasubirya ati: “Baghala betu, isimwakola ekyo. Isimwakola mutya, kundi ebindu ebi, Yehova yulyatuhabyo. Mwakatuteghaya n’erituwatikya erisinga ababandi abalyalwa n’omuyi wetu.
24 Ekyo sikyangatokekana! Oyulyaya oko malwa akendihabwa ebindu bighumerera n’oyulyasighala hakuhi n’emizigo. Abosi bakendihabwa ebilingirirene.”
25 Eritsuka ekiro ekyo, ebyo Daudi ayisogha mubyabya mughambo w’erighenderako n’ekyalayiro ky’erikwama omo Israeli erihika na munabwire.
26 Daudi mwabya abihika Ziklagi, mwatumira abasyakulu be Yuda ababya bira biwe b’oko bindu ebyo alyanyegha. Mwabatumirabyo n’omulaghe ono: “Kino ni kihembo* ekyo ngabaha, kiryalua omo bindu ebyo niryanyegha oko syonzighu sya Yehova.”
27 Daudi mwatumira ebihembo by’abandu ababya bikere e Beteli, e Ramoti ye Negebu, e Yatiri,
28 e Aroeri, e Sifmoti, e Eshtemoa,
29 e Rakali, n’ababya bikere omo miyi y’Abayerameeli n’omo miyi y’Abakeni,
30 n’ababya bikere e Horma, e Borashani, e Hataki,
31 e Hebroni, n’ababya bikere omo biharo byosi ebyo Daudi n’abalume biwe balabamo.
Amaelezo awehikwa
^ Kutse “kye Negebu.”
^ Kutse “esyonafsi sy’abandu biwe bosi.”
^ Ulebaye Amaana w’ebinywa.
^ Kutse “ekirimu kiwe mukyatasyamusubamo.”
^ Kutse “kye Negebu.”
^ Kinywa kwa kinywa, “muyisa.”
