Samweli w’Erimbere 31:1-13
-
Sauli n’abaghala biwe basatu bamahola (1-13)
31 Abafilistini mubalwa n’Abaisraeli, neryo abasuda be Israeli mubatibita. Abanene mubitibwa oko Kitwa kye Gilboa.
2 Abafilistini mubatara Sauli n’abaghala biwe, mubabahamba, neryo bamita Yonatani, Abinadabu, na Malkishua.
3 Amalwa mwakala oko Sauli. Abasuda ababya bakaghusa emisali mubamuhikako, bamamuhutalya kutsibu.
4 Neryo Sauli mwabwira oyukamuhekera ebindu biwe by’amalwa ati: “Lusaya omuyali waghu omo lubo* lwagho, unitsimite mugho, abandu abatabanibwe aba bakasyaniaghalya n’erinitsimita.” Aliwe oyukamuhekera ebindu by’amalwa mwaghana, kundi mwasagha kutsibu. Neryo Sauli mwimya omuyali wiwe, amayitogherya kugho.
5 Oyukahekera Sauli y’ebindu biwe by’amalwa mwabya abilangira ngoko Sauli amabihola, naye mwayitogherya oko muyali wiwe, neryo amaholera hakuhi na Sauli.
6 Neryo Sauli, abaghala biwe basatu, oyukamuhekera ebindu biwe by’amalwa, n’abandu biwe bosi mubahola ekiro ekyo.
7 Abaisraeli ababya bikere omo musya* n’omo kiharo kye Yordani babere babilangira ngoko abasuda be Israeli babiritibita, kandi ngoko Sauli n’abaghala biwe babirihola, mubalua omo miyi, bamatibita. Enyuma sy’aho, Abafilistini mubasyikala omo miyi eyo.
8 Ekiro ekikwamire, mubasyalusya ebindu by’oko binda. Mubeya ekinda kya Sauli n’ebinda by’abaghala biwe basatu ibine oko Kitwa kye Gilboa.
9 Neryo mubatwa omutwe wa Sauli, bamimya n’ebindu biwe by’amalwa. Enyuma sy’aho, mubatuma abandu omo kihugho ky’Abafilistini bayatule engulu eyo omo syohekalu sy’esyosanamu syabo n’eribwirayo abandu.
10 N’enyuma sy’aho, mubahira ebindu biwe by’amalwa omo hekalu ya Ashtoreti. Mubabohera ekinda kiwe oko luhimbo lwe Bete-shani.
11 Abandu be Yabeshi-gileadi babere babyowa ekyo Abafilistini balyakolera Sauli,
12 abasuda bosi mubatsukalo. Mubaghenda omo kiro kyosi, bamalusya ekinda kya Sauli n’ebinda by’abaghala biwe oko luhimbo lwe Bete-shani. Mubaleta ebinda ebyo e Yabeshi n’eritimyabyo.
13 Enyuma sy’aho, mubimya amakuha wa Sauli n’abaghala biwe bamatagho e Yabeshi omo ndina y’omuti w’omwesheli. Mubakola amafungo omo biro 7.
