Samweli w’Erimbere 4:1-22
4 Abaisraeli bosi mubowa ebinywa ebyo Samweli abugha.
Kiro kighuma, Abaisraeli mubayalwa n’Abafilistini. Mubahira ekambi yabo hakuhi ne Ebenezeri, n’Abafilistini mubahira ekambi yabo e Efeki.
2 Abafilistini mubayipanga busana n’erilwa n’Abaisraeli, aliwe amalwa mwakala, neryo Abafilistini bamasinga Abaisraeli. Mubita abalume 4 000 ababya bakalwira omo kisuki.
3 Abasuda babere babisuba omo kambi, abasyakulu be Israeli mubabugha bati: “Busanaki Yehova mwakaleka Abafilistini ibatusinga* munabwire? Tuyende erisanduku ry’endaghane ya Yehova eriri e Shilo, tutoke eribya naryo eno, kandi ritoke eritusabula omo byala by’esyonzighu syetu.”
4 Neryo abasuda mubatuma abalume e Shilo. Abalume abo mubayalusyayo erisanduku ry’endaghane ya Yehova w’emilondo, oyo wikere oko kitumbi kiwe ky’obwami endata oko* makerubi. Abaghala babiri ba Eli, ye Hofni na Finehasi, mubakwamanisya erisanduku ry’endaghane y’oMungu w’ekwenene.
5 Erisanduku ry’endaghane ya Yehova ryabere ryabinahika omo kambi, Abaisraeli bosi mubalaka kutsibu, erihika n’oko kika ekitaka kyamalabamo omusiki.
6 Abafilistini babere babyowa emilenge eyo, mubabugha bati: “Busanaki abandu banemulaka batya omo kambi y’Abaebrania?” Oko nduli, mubafumbula ngoko Erisanduku rya Yehova ryabirihika omo kambi.
7 Abafilistini mubasagha, kundi mubabugha bati: “OMungu abiringira omo kambi y’Abaebrania!” Neryo mubabugha bati: “Tuli bahanya, kundi ekiri ng’eki sikyekyatabya.
8 Tuli bahanya! Nindi yukenditusabula omo byala by’oMungu mukulu oyu? Oyu si y’oMungu oyo wita Abamisri omo buhanya mbiriri-mbiriri omo mbwarara?
9 Inywe Bafilistini, simusaghe, kandi mukole lulume-lume mukasyabya bakobe b’Abaebrania, ngoko babya bakobe benyu. Mukole lulume-lume, mulwe nabo.”
10 Neryo Abafilistini mubalwa n’Abaisraeli, bamabasinga, n’obuli Mwisraeli mwatibita eyiri ehema yiwe. Abafilistini mubita Abaisraeli banene. Abafilistini mubita abasuda 30 000 abakaghenda omo bisando.
11 Kandi Abafilistini mubahamba Erisanduku ry’oMungu, n’abaghala babiri ba Eli ye Hofni na Finehasi mubahola.
12 Omulume mughuma w’omo kihanda kya Benyamini mwalua omo malwa akatibita, amayahika e Shilo ekiro ekyo kisa-kisa. Mwahikayo esyongyimba siwe isyabiritulangika n’omutwe wiwe inianeko olututu.
13 Omulume oyo mwahika Eli inianikere oko kitumbi kiwe hakuhi n’endaki. Abya akalebya nga hakendibyaki, kundi abya iniabirikwa obuba omo mutima busana n’Erisanduku ry’oMungu w’ekwenene. Omulume oyo mwingira omo muyi akayabwira abandu ebyabiribya, neryo abandu bosi mubatsuka erilira.
14 Eli abere abyowa abandu bakalira, mwabulya ati: “Hamabyaki ekyamaleka abandu ibalira batya?” Neryo omulume oyo mwaghenda luba-luba, amayabwira Eli ekyabere nga niki.
15 Oko mughulu oyo, Eli abya n’emyaka 98. Abya isyalisyalangira ndeke, iniakalangira ebiri embere siwe bisa.
16 Neryo omulume oyo mwabwira Eli ati: “Ingye y’omulume oyulyalua eyiri amalwa. Mungaluayo munabwire musa-musa ngatibita.” Neryo Eli mwamubulya ati: “Mughala waghe, emyatsi yiriyo yiti?”
17 Neryo oyo wabya akatula omwatsi mwabugha ati: “Abaisraeli mubakasagha Abafilistini, bamatibita, n’Abafilistini mubakita abandu banene, n’abaghala baghu babiri, ye Hofni na Finehasi babirihola, n’Erisanduku ry’oMungu w’ekwenene ryabirihambwa.”
18 Omulume oyo abere abyahula Erisanduku ry’oMungu w’ekwenene, Eli mwakununguka oko kitumbi kiwe, amawa ahisi bunyume-nyume hakuhi n’omulango w’omuyi, n’ebikya biwe mubyabunika, neryo amahola, kundi abya iniabiribya musyakulu, kandi abya munene kutsibu. Abya iniabiritswera Abaisraeli omo myaka 40.
19 Omwalyana wiwe, muka Finehasi, abya mukule kandi habya hakisiya hake iniabuta. Abere abyowa ngoko Abafilistini babirihamba Erisanduku ry’oMungu w’ekwenene, kandi ngoko tata-byala wiwe n’omwira wiwe babirihola, mwayiminyongolya busana n’obulumi bw’obukule, neryo amabuta.
20 Abere akasonda erihola, abakali ababya bimene hakuhi naye mubamubwira bati: “Isiwasagha, kundi wamabibuta omwana w’obulume.” Mwatabasubirya, kandi mwatatsomana.*
21 Aliwe mwaha omwana y’erina rya Ikabodi,* kundi mwabugha ati: “Olukengerwa lwabirilua e Israeli n’eriya omo bunyewa.” Mwabugha atya busana n’Erisanduku ry’oMungu w’ekwenene eryabya iryabirihambwa kandi busana n’ebyahikira tata-byala wiwe n’omwira wiwe.
22 Mwabugha ati: “Olukengerwa lwabirilua e Israeli n’eriya omo bunyewa, kundi Erisanduku ry’oMungu w’ekwenene ryabirihambwa.”
Amaelezo awehikwa
^ Kinywa kwa kinywa, “Busanaki Yehova mwakatusinga?”
^ Kutse alinga, “omo kati-kati.”
^ Kutse “kandi mwatahira omutima wiwe okw’ebyo bamubwira.”
^ Ni bugha ambu “olukengerwa luli hayi?”
