Samweli w’Erimbere 5:1-12
5 Abafilistini babere babihamba Erisanduku ry’oMungu w’ekwenene, mubalusyaryo e Ebenezeri, bamatwalaryo e Ashdodi.
2 Abafilistini mubimya erisanduku ry’oMungu w’ekwenene, bamahiraryo omo nyumba* ya Dagoni n’erihiraryo hakuhi na Dagoni.
3 Omo tututu y’ekiro ekikwamire, Abaashdodi babere babibuka, mubeya Dagoni iniabiriterera ahisi oko busu bwiwe embere sy’Erisanduku rya Yehova, neryo mubimya Dagoni bamamusubya ah’akabya.
4 Mubabya babibuka omo tututu y’ekiro ekikwamire, mubeya Dagoni iniabiriterera ahisi oko busu bwiwe embere sy’Erisanduku rya Yehova, omutwe wiwe n’ebyala biwe bibiri byabya ibyabiritwibwa kandi byabya ahisi embere sy’omulango w’enyumba ya Dagoni, ekitswe kya Dagoni ekisosire esamaki* kyo kyatatwibawa.
5 Ekyo kyo kikaleka erihika na munabwire, abaminyereri ba Dagoni n’abosi abakingira omo nyumba ya Dagoni eyiri e Ashdodi sibalilyata omo mwanya owali eyikwa w’omulango.
6 Yehova mwaha Abaashdodi b’amalipizi, mwaghalya abikalani be Ashdodi n’ab’omo biharo byabo omo bukoni bwe emoroide.*
7 Abalume be Ashdodi babere babilangira ekiryabya, mubabugha bati: “Erisanduku ry’oMungu we Israeli isiryasighala ewetu eno, kundi abiritwaghalya kutsibu, itwe n’oMungu wetu Dagoni.”
8 Neryo mubahindania abakama bosi b’Abafilistini, n’eribabulya bati: “Tukendiyira Erisanduku ry’oMungu we Israeli ryo tuti?” Mubasubirya bati: “Mutwale Erisanduku ry’oMungu w’ekwenene e Gati.” Neryo mubatwalaryo e Gati.
9 Babere babitwala Erisanduku eryo rye Gati, Yehova mwaha abandu b’omo muyi oyo b’amalipizi, neryo abandu mubasagha kutsibu. OMungu mwaha abandu b’omo muyi oyo b’amalipizi eritsuka oko mulere, erihika oko mukulu omw’ibaletako obukoni bwe emoroide.*
10 Neryo mubatwala Erisanduku ry’oMungu w’ekwenene e Ekroni. Aliwe ryabere ryabihika e Ekroni, Abanya Ekroni mubatsuka erilaka bati: “Bamabituletera Erisanduku ry’oMungu we Israeli. Banzire eritwita, itwe n’abandu betu!”
11 Neryo mubahindania abakama bosi b’Abafilistini n’eribugha bati: “Musubulaye Erisanduku ry’oMungu we Israeli, muleke risube ewabo, itwe n’abandu betu tukasyahola.” Kundi abandu bosi b’omo muyi oyo babya ibabirisagha bati bakendihola. OMungu w’ekwenene abya iniabiribaha amalipizi awakalire.
12 N’abatahola mubakwa obukoni bwe emoroide.* Neryo ekiriro ky’abandu ky’erisaba obuwatikya mukyahika elubula.
Amaelezo awehikwa
^ Kutse “hekalu.”
^ Kutse alinga, “Dagoni musa.”
^ Kutse “oluhende.”
^ Kutse “oluhende.”
^ Kutse “oluhende.”
