Samweli w’Erimbere 6:1-21
-
Abafilistini bamasubya Erisanduku e Israeli (1-21)
6 Erisanduku rya Yehova muryabugha omo kiharo ky’Abafilistini mw’emisi 7.
2 Enyuma sy’aho, Abafilistini mubabirikira abahereri n’abakumu, bamababulya bati: “Tuyire Erisanduku rya Yehova ryo tuti? Mutubwire nga tukendisubulyaryo tuti omo kihugho ekyo ryaluamo.”
3 Mubabasubirya bati: “Mwamabibugha muti mukasubulaya erisanduku rya Yehova oMungu we Israeli, isimwasubulayaryo butsira kihembo. Litolere imwamusubuliryaryo n’ekihembo ekikendileka imwaghanyirwa. Neryo ekyo kyo kikendileka imwalama, kandi mukendiminya ekiryaleka iniabaha amalipizi ayo.”
4 Neryo Abafilistini mubabulya bati: “Tumutumire ekihembo kyahi atoke eritughanyira?” Mubabasubirya bati: “Inywe n’abakama benyu mumukahikirawa n’obuhanya bughumerera, neryo kino kyo mukole erikwamana n’emighanzo y’abakama b’Abafilistini: Mutume ebisosekanio bitano by’obukoni bwe emoroide* ebikokotibwe omo horo, n’esyombeba itano sy’ehoro.
5 Mukokotaye ebindu ebisosire obukoni bwe emoroide* n’ebindu ebisosire esyombeba esikatsandaya ekihugho kyenyu, kandi musikaye oMungu we Israeli. Kwa muhwa akendileka eribaha amalipizi, inywe, omungu wenyu, n’ekihugho kyenyu.
6 Busanaki mukakala-kalaya omutima wenyu ng’Abamisri na Farao abakala-kalaya emitima yabo? OMungu mwabaha amalipizi awakalire, neryo mubalangira ngoko eky’erikola kisa ry’erileka Abaisraeli baghende.
7 Neryo muteghekanaye engurubani nyihya-nyihya* n’esyonde ibiri esiriko ebyana, kandi esitesyatahirwako omuketo, mubohere engurubani oko syonde esyo. Aliwe mulusaye kusyo kw’ebyana n’erisubyabyo eka.
8 Mwimaye Erisanduku rya Yehova, muhireryo oko ngurubani* n’ebindu by’ehoro ebyo mukamutumira mo kihembo mutoke erighanyirwa. Muhirebyo omo kasanduku, n’erihira akasanduku ako hakuhi n’Erisanduku ry’oMungu, neryo mutume Erisanduku
9 n’erilebya emyatsi nga yikendighenda yiti. Erisanduku ryamabihetuka omo nzira ye Bete-shemeshi n’erilolera omo kihugho ekyo ryaluamo, aho in’iye y’ulyatuletera obuhanya bunene obo. Aliwe bitetabya bitya, itukendiminya ngoko s’iye y’ulyatuha amalipizi; itukendiminya ngoko obukoni obo bulyayasira.”
10 Abafilistini mubakola ngoko balyababwira. Mubimya esyonde ibiri esyabyako ebyana, bamabohera engurubani* y’oko syonde esyo, aliwe mubakingira ebyana byasyo by’eka.
11 Enyuma sy’aho, mubahira Erisanduku rya Yehova oko ngurubani,* bamahirako n’akasanduku akabyamo esyombeba sy’ehoro n’ebisosekanio by’obukoni bwe emoroide* ebikokotibwe omo horo.
12 Neryo esyonde esyo musyakwama enzira ye Bete-shemeshi, musyaghenda butsir’ikita. Musitalua omo nzira eyo, syabya sikaghenda isinemwama. Musitakitira oko luhande lw’amali kutse lw’amalembe. Omughulu wosi oyo, abakama b’Abafilistini babya ibanakwamiresyo enyuma. Mubakwamasyo eriyahika oko mupaka we Bete-shemeshi.
13 Abandu be Bete-shemeshi babya ibanemughesa engano omo musya.* Mubabya babilangira Erisanduku, mubatsema kutsibu.
14 Omutoka w’erikura mwahika omo ririma rya Yosua Omubete-shemeshi, n’erimana aho hakuhi n’eribwe rinene. Neryo abandu mubatulanga omuti owabya oko ngurubani* batoke eryakya omuliro, neryo bamaherera esyonde esyo syo Yehova mo buhere bw’eryokererya.
15 Abalawi mubakimya Erisanduku rya Yehova n’akasunduku akabyamo ebindu by’ehoro, bamahira ebyosi oko ribwe rinene. Ekiro ekyo, abandu be Bete-shemeshi mubaherera Yehova y’amahere w’eryokererya n’awandi mahere.
16 Abakama batano b’Abafilistini mubabya babilangira ekyo, mubasuba e Ekroni ekiro ekyo kisa-kisa.
17 Nikwa ebisosekanio by’obukoni bwe emoroide* ebikokotibwe omo horo ebyo Abafilistini batumira Yehova mo kihembo batoke erighanyirwa bya bino: Ekisosekanio kighuma kyabya kye Ashdodi, ekindi kyabya kye Gaza, ekindi kyabya kye Ashkeloni, ekindi kyabya kye Gati, n’ekindi kyabya kye Ekroni.
18 Emighanzo y’esyombeba sy’ehoro yabya yilingene n’emighanzo y’emiyi yosi y’Abafilistini eyabya y’abakama batano, ni bugha ambu, emiyi eyo omundu ateangahikamo bweghu-bweghu n’emilongo.
N’eribwe rinene eryo bandu be Bete-shemeshi bahirako Erisanduku rya Yehova ni kindu ekikinibukaya omwatsi oyo erihika na munabwire. Eribwe eryo rikine omo ririma rya Yosua Omubete-shemeshi.
19 Aliwe oMungu mwita abandu be Bete-shemeshi kundi mubalebya Erisanduku rya Yehova. Mwita abandu 50 070* ba mubo. Abandu mubalira busana n’abandu banene abo Yehova ita.
20 Neryo abandu be Bete-shemeshi mubabugha bati: “Nindi yo wangimana embere sya Yehova, oMungu mubuyirire oyu? Kyanguwanirye iniatuluako.”
21 Neryo mubatuma abandu bayabwire abikalani be Kiriati-yearimu bati: “Abafilistini babirisubulya Erisanduku rya Yehova. Mundaghale, mwase muhekeryo.”
Amaelezo awehikwa
^ Kutse “by’oluhende.”
^ Kutse “oluhende.”
^ Kutse “omutoka muhya-muhya w’erikura; esharyo nyihya-nyihya.”
^ Kutse “mutoka w’erikura; sharyo.”
^ Kutse “omutoka w’erikura; esharyo.”
^ Kutse “mutoka w’erikura; sharyo.”
^ Kutse “by’oluhende.”
^ Kutse “ribanda.”
^ Kutse “mutoka w’erikura; sharyo.”
^ Kutse “by’oluhende.”
^ Kinywa kwa kinywa, “abandu 70, abandu 50 000.”
