Samweli w’Erimbere 7:1-17
7 Neryo abalume be Kiriati-yearimu mubasyenda Erisanduku rya Yehova, bamatwalaryo omo nyumba ya Abinadabu oko katwa. Mubasombola mughala wa Eleazari abye akakola omubiiri mubuyirire w’eriteya erisanduku rya Yehova.
2 Mubabya babileta Erisanduku e Kiriati-yearimu, muhalaba mughulu muli, muhalaba emyaka 20, neryo Abaisraeli bosi mubatsuka erisondya* Yehova.
3 Neryo Samweli mwabwira Abaisraeli bosi ati: “Mwamabya imwanzire erisubira Yehova n’omutima wenyu wosi, mulusaye omo kati-kati kenyu mw’eyindi miungu n’esyosanamu sya Ashtoreti. Mwamabya kwenene-kwenene imwanzire eriha Yehova y’omutima wenyu wosi n’erimukolera iye musa, iniakendibalusya omo byala by’Abafilistini.”
4 Neryo Abaisraeli mubalusya esyosanamu sya Baali n’esyosanamu sya Ashtoreti omo kati-kati kabo, bamakolera Yehova musa.
5 Enyuma sy’aho, Samweli mwabugha ati: “Muhindanaye Abaisraeli bosi e Mizpa, ngendibasabira oko Yehova.”
6 Neryo mubahindana e Mizpa, mubateha amaghetse n’eryutagho embere sya Yehova. Ekiro ekyo, mubakola amafungo n’eribugha bati: “Twabirikosera Yehova.” Neryo Samweli mwatsuka erisoha emyatsi y’Abaisraeli e Mizpa.
7 Omughulu Abafilistini bowa ngoko Abaisraeli babirihindana e Mizpa, abakama b’Abafilistini mubayalwa n’Abaisraeli. Abaisraeli mubabya babyowa omwatsi oyo, mubasagha busana n’Abafilistini.
8 Neryo Abaisraeli mubabwira Samweli bati: “Isiwaleka erisaba Yehova oMungu wetu uti atuwatikaye n’eritulusya omo byala by’Abafilistini.”
9 Samweli mwimya ekyana ky’embuli, amahererakyo Yehova mo buhere bw’eryokererya. Enyuma sy’aho, mwasaba Yehova ati awatikaye Abaisraeli, na Yehova mwamusubirya.
10 Omughulu Samweli abya akaherera obuhere bw’eryokererya, Abafilistini mubahika bakasyalwa n’Abaisraeli. Aliwe ekiro ekyo, Yehova mwaleta emilumo minene y’obutuku oko Bafilistini, mubabula nga bayire bati. Neryo Abaisraeli mubasingabo.
11 Abaisraeli mubalua e Mizpa, bamakwamirira Abafilistini, mubitabo eriyahika oko luhande lw’eyikwa lwe Bete-kari.
12 Neryo Samweli mwimya eribwe, amimaniaryo omo kati-kati ke Mizpa ne Yashana. Mwahularyo mo Ebenezeri,* kundi mwabugha ati: “Erihika lino, Yehova abirituwatikya.”
13 Abaisraeli ko basinga batya Abafilistini, neryo Abafilistini mubatsira eritasyingira omo kiharo ky’Abaisraeli. Yehova mwabya akalwa nabo omo biro byosi bya Samweli.
14 N’Abafilistini mubasubulya emiyi eyo bapura oko Baisraeli erilua e Ekroni eriyahika e Gati. Abaisraeli mubatasyasubira ebiharo ebyo Abafilistini bimaya.
Kandi muhabya obuholo omo kati-kati k’Abaisraeli n’Abaamori.
15 Omo ngebe yiwe yosi, Samweli mwabya akasoha emyatsi y’Abaisraeli.
16 Obuli mwaka iniakatimba omo Israeli, iniakalaba e Beteli, e Gilgali, ne Mizpa inianemusoha emyatsi y’Abaisraeli omo biharo byosi ebyo.
17 Iniakabya abitimba ehosi eyo, iniakasuba e Rama, kundi eyo yo yabya enyumba yiwe, kandi iniakasoha emyatsi y’Abaisraeli omo muyi oyo. Mwahimbirayo Yehova ekiherero.
