Samweli w’Erimbere 8:1-22
8 Samweli abere abibya musyakulu, mwayira abana biwe mo batsweri be Israeli.
2 Akambere kiwe ikakahulawa mo Yoeli, n’omughala wiwe w’akabiri iniakahulawa mo Abiya; babya batsweri e Beeri-sheba.
3 Aliwe abaghala biwe mubatakwama emibere yiwe, babya bakarondya endundi omo ritatunganene, ibakaligha ebyutuliro, kandi isibalitswera omo ritunganene.
4 Kiro kighuma, abasyakulu be Israeli mubahindana haghuma, bamayasungana na Samweli e Rama.
5 Mubamubwira bati: “Si y’ono wabiribya musyakulu, aliwe abana baghu sibalikola nga we. Neryo utuhirireho omwami oyukenditutswera ng’ebindi bihanda byosi.”
6 Aliwe Samweli mwapona omughulu bamubwira bati: “Tuhirireho omwami oyukenditutswera.” Neryo Samweli mwasaba Yehova,
7 na Yehova mwabwira Samweli ati: “Ukwame ebyosi ebyo abandu bakakubwira; kundi s’iwe bakaghana, aliwe n’ingye bakaghana ambu isinabya mwami wabo.
8 Bakinakola ngoko bakola omughulu nabalusaya e Misri. Bakabya ibanemunileka n’erikolera eyindi miungu, naghu ekyo kyo bakakukolera.
9 Neryo ukole ebyo bakendikubwira, aliwe litolere iwababwira ndeke-ndeke ebikendisyabahikira. Ubabwire ebyo mwami akendibya akabasaba.”
10 Neryo Samweli mwabwira abandu ababya bakamubwira bati abahirireho omwami ebyosi ebyo Yehova amubwira.
11 Mwababwira ati: “Bino by’omwami oyukendisyabatabala akendisyabya akabasaba: Akendisyimya abaghala benyu n’eribayira mo basuda abakaghendaya emitoka yiwe, abandi bakendisyabya bakaghendya esyosabayiri* siwe, n’abandi ibatibita embere sy’emitoka yiwe.
12 Akendisyayira n’abandi mo bakulu biwe b’abasuda 1 000, abakulu b’abasuda 50; abandi bakendisyabya bakamulimira, erimughesera engano, erimukokoterya ebindu by’amalwa, n’ebindu by’oko mitoka yiwe.
13 Akendisyimya abali benyu ibabya bakamukokoterya amaghuta awakakumba ndeke, erimuhukira akalyo, n’erimukokoterya emikati.
14 Akendisyabya akimya amalima wenyu awuwene, amalima wenyu w’emizabibu awuwene, n’amalima wenyu w’emizeituni awuwene, n’erihabyo abaghombe biwe.
15 Akendisyabya akimya ekighuma ky’omw’ikumi ky’engano yenyu n’eky’emizabibu yenyu, n’erihabyo abakulu abakakolera omo bwikalo bwiwe n’abaghombe biwe.
16 Kandi akendisyimya abaghombe benyu b’obulume n’ab’obukali, esyonde syenyu esyuwene, n’esyopunda syenyu iniakolesyabyo omo mibiiri yiwe.
17 Akendisyabya akimya ekighuma ky’omw’ikumi ky’oko syombuli syenyu, kandi mukendisyabya baghombe biwe.
18 Hakendisyabya ekiro imwalira busana n’omwami oyo inyw’ibene-bene mulyayisombolera, aliwe ekiro ekyo Yehova syendisyabugha oko kyenyu.”
19 Aliwe abandu mubatowa ebyo Samweli ababwira, mubabugha bati: “Iyehe, twanzire tu itwabya n’omwami.
20 Neryo netu tukendibya ng’ebindi bihanda byosi, omwami wetu akenditutswera, akenditusondola, n’eribya akatulwirako.”
21 Samweli abere abyowa ebyosi ebyo bandu balyabugha, mwasubirira mubyo embere sya Yehova.
22 Yehova mwabwira Samweli ati: “Ukwame ebyo bakakubwira, ubahirireho omwami oyukendibatabala.” Neryo Samweli mwabwira abalume be Israeli ati: “Obuli mundu asube omo muyi wiwe.”
Amaelezo awehikwa
^ Kutse “esyofarasi; esyoshevale.”
