Samweli w’Erimbere 9:1-27
-
Samweli amahindana na Sauli (1-27)
9 Omo kihanda kya Benyamini, mwabya omulume oyukahulawa mo Kishi. Abya mughala wa Abieli, mughala wa Zerori, mughala wa Bekorati, mughala wa Afia. Abya Mubenyamini, kandi abya muteke kutsibu.
2 Abya awite omwana oyukahulawa mo Sauli. Sauli abya mulwana, kandi ini mubuya. Omo Israeli yosi, simwabya omubuya nga ye. Abya muli kulenga abandu bosi, abandu ibakamuhikira oko bitigho.
3 Omughulu esyopunda sya Kishi, ye baba wa Sauli, syahera, baba wiwe mwamubwira ati: “Kisi imaya omughombe mughuma, muyarondaye esyopunda.”*
4 Mubalaba omo kiharo ky’ebitwa kye Efraimu, bamalaba n’omo kiharo kye Shalisha, aliwe mubatasungasyo. Mubayalaba omo kiharo kye Shalimu, eyo nayo mubatasungasyo eyo. Mubalaba omo kiharo kyosi ky’Ababenyamini, aliwe mubatasungasyo.
5 Babere babihika omo kiharo kye Zufu, Sauli mwabwira omughombe oyo babya naye ati: “Tahie, tusubule, baba akasyahangya-hangya busana netu omo mwanya w’erihangya-hangya busana n’esyopunda.”
6 Aliwe omughombe wiwe mwamusubirya ati: “Omo muyi ono si mune omulume w’oMungu. Omulume oyo asikibwe kutsibu. Ebyosi ebyo akabugha bikabererera. Tuyasungane naye, anganatubwira eyo twangasunga esyopunda.”
7 Neryo Sauli mwabwira omughombe wiwe ati: “Twamayayo, itukendiha omulume oyo yoki? Omo syongunza syetu simukiri emikati, simuli ekihembo ekyo twangaha omundu w’oMungu w’ekwenene. Tune n’eky’erimuha?”
8 Neryo omughombe mwasubirya Sauli ati: “Tahie, nangwite oko kighuma ky’ebini ky’eshekeli* y’efeza.* Ngendihakyo omundu w’oMungu w’ekwenene, neryo akenditubwira eyo twangabana esyopunda.”
9 (Kera omo Israeli, omundu iniakabya akasonda eriyabulya oMungu y’obusondoli iniakabugha ati: “Asa tuye eyiri omulangiri, kundi oyo tukahula lino mo muminyereri abya iniakahulawa mo mulangiri.)”
10 Neryo Sauli mwabwira omughombe wiwe ati: “Ebyo wamabugha ebi byuwene, tughende.” Neryo mubaghenda omo muyi ogho omundu w’oMungu w’ekwenene abya ikeremo.
11 Babere ibanemweruka obweruka obukatwala omundu y’omo muyi, mubahindana n’abambesa ababya bakayateha amaghetse. Mubababulya bati: “Omo muyi ono mune omulangiri?”
12 Abambesa abo mubabasubirya bati: “Anemo, nibya yolya embere syenyu. Muyire luba-luba, kundi munabwire mwakasa omo muyi, kusangwa munabwire abandu bakendiherera obuhere omo mwanya w’endata.
13 Mukendibya mwabiningira omo muyi, mukendimweya inianemwerukira omo mwanya w’endata akayalya. Abandu sibangalya ateahika, kundi iye yukatsumula obuhere. Neryo akabya abitsumula obuhere, abalyakokibawa ibatsuka erirya. Mulw’imwirukireyo, mukendimusunga.”
14 Neryo muberukira omo muyi. Babere bakasonda eringira omo muyi, Samweli naye abya akasyahindana nabo atoke eribatwala ahali omwanya w’endata.
15 Omo mulaliryo, embere Sauli ahike, Yehova abya iniabiribwira* Samweli ati:
16 “Omungya oko ndambi eno, ngendisyakutumira omundu w’omo kiharo kya Benyamini. Ukendisyamuhirako amaghuta n’erimuyira mo musondoli w’abandu baghe Abaisraeli. Akendisyalusya abandu baghe b’omo byala by’Abafilistini, kundi nabilangira ngoko abandu baghe banemwaghalwa, kandi nabiryowa ekiriro kyabo.”
17 Samweli abere abilangira Sauli, Yehova mwamubwira ati: “Oyo yo mulume oyo nakubwira niti akendisondola abandu baghe.”
18 Neryo Sauli mwaghenda eyiri Samweli. Samweli abya inianimene omo mulango w’omuyi. Sauli mwamubulya ati: “Wanganambwira enyumba y’omulangiri nga yiri hayi?”
19 Samweli mwamusubirya ati: “Omulangiri oyo n’ingye. Muhetukire ahali omwanya w’endata, ngendibeyayo. Kandi munabwire mukendirya haghuma naghe, neryo mukendisyaghenda omo tututu nabikubwira ebyosi ebyo wanzire eriminya.*
20 Isiwahanga-hangaya busana n’esyopunda esyahera hamabilaba ebiro bisatu, kundi syabiribanika. Ebindu byosi ebyuwene-wene bye Israeli ni byandi kwe? Siwasi ngoko ni byaghu, iwe n’ekihanda kya baba waghu?”
21 Neryo Sauli mwamusubirya ati: “Ukanibwira utya busanaki? Siwasi ngoko niri Mubenyamini w’omo kihanda kike kutsibu omo bihanda bye Israeli? Siwasi ngoko n’ekihanda kyetu kyo kike kutsibu omo bihanda byosi by’Ababenyamini?”
22 Neryo Samweli mwimya Sauli n’omughombe wiwe, amabatwala omo kyumba ky’eriliramo. Mwabikalya omo mwanya w’embere-mbere kulenga abandi abakokibawa; habya abandi bandu hakuhi 30.
23 Samweli mwabwira oyukahuka ati: “Leta akalyo ako niryakuha n’erikubwira niti, ‘Ubikeko.’”
24 Neryo oyukahuka mwimya ekihinga n’ebyosi ebyabya kukyo, amahirabyo embere sya Sauli. Neryo Samweli mwamubwira ati: “Ebyalya ebiryabikawa byamabihirwa embere syaghu. Ulya, kundi mubakakubikirabyo busana n’ekiro kya munabwire. Kusangwa munabugha niti ngwite abagheni.” Neryo ekiro ekyo Sauli mwalya haghuma na Samweli.
25 Neryo mubalua omo mwanya w’endata, bamandaghalira omo muyi. Samweli abya inianemukania na Sauli ibane endata oko nyumba.
26 Mubabuka omo tututu. Bwabere bukanakya, Samweli mwabirikira Sauli. Sauli abya iniane endata oko nyumba ya Samweli. Mwamubwira ati: “Uyiteghekanaye kundi ukasonda erighenda.” Neryo Sauli mwayiteghekania, neryo iye na Samweli mubahuluka.
27 Babere bakandaghalira eyiri omupaka w’omuyi, Samweli mwabwira Sauli ati: “Ubwire omughombe uti abye embere.” Neryo omughombe oyo mwabya embere. Samweli mwatasyabugha ati: “Aliwe iwe, wimane nitoke erikubwira ebyo oMungu alyabugha.”
Amaelezo awehikwa
^ Kinywa kwa kinywa, “esyopunda sy’obukali.”
^ Eshekeli nguma ini syograme 11,4. Ulebaye Endomeko B14.
^ Ni kindu ky’obughuli ekikalua omo kitaka.
^ Kinywa kwa kinywa, “abya iniabirisukula okutu kwa.”
^ Kinywa kwa kinywa, “ebyosi ebiri omo mutima waghu.”
