Ebaruha y’erimbere oko Timoteo 1:1-20
1 Ebaruha eno ikalua oko Paulo, omukwenda wa Kristo Yesu, oyo wasombolawa n’oMungu, Omusabuli wetu, na Kristo Yesu, amaha wetu.
2 Ngahandikirayo Timoteo,* omwana waghe w’ekwenene omo bwikirirya.
Olukogho, obughanyiri, n’obuholo bw’oMungu Tata na Kristo Yesu Mukama wetu bibye haghuma naghu.
3 Omughulu nabya inikisiya inaya e Makedonia, munakubwira niti usighale e Efeso. Neryo lino ngatasyakubwira niti usighale e Efeso, utoke eribwira abandi uti isibakangiriraya amakangirirya w’amabehi.
4 Kandi ubabwire uti isibakwama esyohadisi sy’amabehi, kutse erisondya-sondya emyatsi y’ebizazi.* Emyatsi eyo si y’omughaso. Aliwe, omo mwanya w’eriluamo emyatsi y’oMungu eyikahimba obwikirirya, emyatsi eyo ikaleka abandu ibabugha ebyo batasi nga nina kwenene.
5 Ngakuha amahano ayo kundi nanzire itwe bosi itwabya n’olwanzo olukalua omo mutima owerire, obunya-mutima* obuwene, n’obwikirirya obutemo obulimba-limba.*
6 Busana n’eritendikwama emyatsi eyo, abandu balebe babiriyingirya omo buhaka butya-butya.
7 Banzire erikangirirya emighambo. Aliwe, sibasi emyatsi eyo bakabugha kutse emyatsi eyo bakakangiriraya n’omuhwa.
8 Tunasi ngoko emighambo yuwene omundu amabikolesyayo ndeke,
9 amabiminya ngoko emighambo siyiriho busana n’abatunganene, aliwe yiriho busana n’abandu abatekwama emighambo n’abalele, abandu abatekenga oMungu n’abakoli b’amalolo, abandu abakaleghula* n’abakahalaya, abakita abobaba wabo n’abakita abomama wabo, n’abandi abakita,
10 abandu abakakola oburaghane,* abalume abakaghotsera n’abandi balume, n’abakali abakaghotsera n’abandi bakali, abakidnapere,* ababehi, abakalapa omo mabehi, n’emyatsi yosi-yosi eyitahambene n’amakangirirya awuwene,*
11 awahambene n’engulu mbuya eyuwene ey’oMungu w’obutseme, eyo nahabawa.
12 Ngasima Kristo Yesu Omukama wetu oyo wamba obutoki kundi mwalangira iniri mutaleghula, neryo mwamba omubiiri mubuyirire,
13 nomo kera nabya ngatsuma oMungu n’eryaghalya* abandu biwe, kandi nomo nabya n’erighundu, aliwe Kristo mwanighanyira kundi nabya ngakola nitya omo butaminya kandi busana n’eritendikirirya.
14 Aliwe, olukogho olo Omukama wetu anikanganaya lwabya lunene kutsibu, kandi niri n’obwikirirya n’olwanzo lwa Kristo Yesu.
15 Ekinywa eki ni ky’ekwenene kandi ni ky’eriligha butsira buhaka: Kristo Yesu mwasa oko kihugho busana n’erisabula abakoli b’amalolo. Oko bakoli b’amalolo abo, niri w’erimbere.
16 Aliwe, munaghanyirwa kusudi erilabira ingye omundu w’erimbere omo bakola-nabi, Kristo Yesu akanganaye ngoko akahanda omutima wo kutsibu n’eriniyiramo eky’erileberyako oko abosi abakamwikiriraya, batoke erisyabana engebe ya kera na kera.
17 Omwami wa kera na kera, oyutewangatsanda, oyutelangirika, oMungu mughuma musa, asikibawe, n’erihabwa olukengerwa kera na kera. Amina.
18 Timoteo, mwana waghe, ngakuha erihano* eryo erikwamana n’amaminyereri awabughawa okw’iwe, kusudi erilabira amaminyereri ayo, suleke erilwa amalwa awuwene.
19 Ukole utya ighunamakirire obwikirirya, kandi ighune n’obunya-mutima* obuwene, obo bandu balebe babirighana, n’ekyo kyabirileka obwikirirya bwabo ibwatsutsangika ng’obwato.
20 Abaghuma ba kubo ni Himeneo na Aleksanda. Nabiribahira omo byala bya Sitani, kusudi ekyo kibakunge ngoko sikyuwene eritsuma oMungu.
Amaelezo awehikwa
^ Ni bugha ambu, “Omundu Oyukasikaya oMungu.”
^ Kutse “y’esyondengo.”
^ Kutse “ezamiri.”
^ Kutse “obunafiki.”
^ Kutse “abatawite olwanzo oluteleghula.”
^ Ulebaye amaana w’ebinywa, “Oburaghane.”
^ Kutse “abakaheka abandi kinyamaka.”
^ Kutse “awali n’endundi.”
^ Kutse “eryendererya.”
^ Kutse “ekyalayiro.”
^ Kutse “ezamiri.”
