Ebaruha y’erimbere oko Timoteo 2:1-15
2 Embere w’ebyosi, nanzire abandu babye bakalemba-lemba oMungu, babye bakasaba, erihatikana oMungu, n’eriha ewasingya busana n’abandu bosi,
2 busana n’abami, n’abakulu bosi, tutoke eribya omo buholo n’embolere itunemumakirira oMungu omo myatsi yosi n’eritendibyamo lutseghe-tseghe omo myatsi yosi.
3 Ekyo kyuwene kandi kikatsemesaya oMungu, Omusabuli wetu,
4 oyo wanzire abandu bosi ibasabuka n’eriminya ekwenene yo ndeke-ndeke.
5 Kundi hali oMungu mughuma musa n’omusangania mughuma musa omo kati-kati k’oMungu n’abandu, ni bugha ambu, omundu mughuma musa, Kristo Yesu,
6 oyo wayiherera atoke eribya embanulo eyilingene busana n’abandu bosi.* Ekyo kyo kikendisyakanganibwa ndeke-ndeke oko mughulu owatolere.
7 Munasombolwa erihubirya n’eribya mukwenda busana n’erikangania ngoko omwatsi oyo ni w’ekwenene. Ngabugha ekwenene, siniriteba. Ngakangiriraya abandu b’ebihanda babye n’obwikirirya n’eriminya ekwenene.
8 Neryo nanzire abalume ibasaba ehosi-hosi ibanasumbire ebyala bibuyirire,* butsira erihitana n’obuhaka.
9 Kutya, ritolere abakali ibayiyiramo babuya omo lukimba olutolere,* olutelabayaho kateho, n’olukakanganaya ngoko obwenge bukinemo, butsira omw’iluka esyonzwiri,* omw’iyipamba omo bindu by’ehoro, omo syolulu,* kutse esyongyimba esikaghula esyofranga nene.
10 Aliwe, bayiyiremo babuya omw’ikola ebyuwene ngoko ritolere abakali abakakenga oMungu ibabya bakakola.
11 Omukali ighe iniane bukutu.* Akole atya omw’iyikehya kutsibu.
12 Sinitalighira omukali erikangirirya, kutse eritabala omulume, aliwe abye bukutu.*
13 Kundi Adamu yo watsuka eribumbwa, n’enyuma sy’aho Eva naye amabumbwa.
14 Kandi Adamu yo watatebawa, aliwe omukali yo watebawa kutsibu, neryo amakola erilolo.
15 Aliwe, eributa abana ryo rikendisyateya abakali, batitaleka obwikirirya, olwanzo, obubuyirire, n’eribya ibane n’obwenge.
Amaelezo awehikwa
^ Kutse “n’abandu b’emihanda yosi.”
^ Kutse “ebyala biteleghula.”
^ Kutse “olukaleka ibasikya omundu.”
^ Ni bugha ambu, emilukire eyilabiryeho kateho.
^ Kutse “syoperle.”
^ Kutse “inianahunire, butsir’iribugha.”
^ Kutse “inianahunire, butsir’iribugha.”
