Ebaruha y’erimbere oko Timoteo 3:1-16
3 Ekinywa eki ni ky’ekwenene: Omundu amayikasa eribya musyakulu w’endeko,* aho inianzire omubiiri owuwene.
2 Omusyakulu w’endeko syatolere akabyako ehinywa-hinywa. Ritolere iniabya n’omukali mughuma musa, iniabya n’olulengo omo mibere yiwe, iniabya n’obwenge, iniabya w’emitondekere, iniabya akakokya abagheni, oyo wasi erikangirirya,
3 isyabya mutamiri, kutse omutsururu, isyabya oyukamakirira amalengekania wiwe,* isyabya w’omwagha, isyanza esyofranga,
4 atolere iniabya omundu oyukasondola* ab’omo nyumba yiwe bo ndeke, oyuli n’abana abakowa kandi abali n’emibere eyuwene,
5 (kundi omundu amabya isyasi erisondola ab’omo nyumba yiwe, iniakenditoka ati eriteya endeko y’oMungu?),
6 syabye oyulikiraraya Kristo yo lino-lino, akasyayiheka n’eritswerwa ngoko Diabolo abiritswerwa.
7 Kandi ritolere iniabya omundu oyukabughawako ndeke n’abandu abate b’omo ndeko, akasyahemuka n’erihambwa omo kitegho kya Diabolo.
8 Abaghombe bawatikya nabo ritolere ibabya bandu abatetsanga omo myatsi, sibabye n’esyondimi ibiri,* sibabye abandu abakanywa edivai nene, sibabye n’omururu w’erirondya esyofranga n’ebindu busana n’endundi yabo ib’ibene-bene,
9 bamakirire ekumbo* nyibuyirire y’obwikirirya ibane n’obunya-mutima* obwerire.
10 Kandi embere sy’eribya abaghombe bawatikya, ritolere ibalengwako ngabanatolere. Neryo bamabya isibaliko ehinywa-hinywa, ibanganabya baghombe bawatikya.
11 Kutya, abakali nabo ritolere ibabya n’emibere eyangaleka ibasikibwa, isibabya b’olutongo, babye n’olulengo omo mibere, babye bataleghula omo myatsi yosi.
12 Ritolere omughombe muwatikya iniabya n’omukali mughuma musa, kandi iniabya akasondola abana biwe n’ekihanda kiwe kyo ndeke.
13 Kundi abalume abakakola ndeke omubiiri mubuyirire bakabughawako ndeke kandi bakakanaya oko myatsi y’obwikirirya eyilebirye Kristo Yesu butsir’isagha.
14 Ngakuhandikira emyatsi eyi, nomo ninasi ngoko hakisiya hake inasa eyo uli,
15 kusudi, nomo nangatselewa, ubye ighunasi ngoko wangayighendya omo nyumba y’oMungu. Enyumba eyo y’endeko y’oMungu oyuliho, enduyi n’efondasyo y’ekwenene.
16 Oko kwenene, ritolere itwaligha ngoko ekumbo* nyibuyirire y’obutaleghula oko Mungu* ni ngulu: ‘Mwakanganibwa omo mubiri, mwaghanzwamo mutunganene omughulu abya n’omubiri w’obunya-kirimu, mwahulukira abamalaika, mwahubiribwa omo kati-kati k’ebihanda, abandu omo kihugho mubamwikirirya, mwakokibwa elubula omo lukengerwa.’
Amaelezo awehikwa
^ Kinywa kwa kinywa, “omulebya.”
^ Kutse “oyukalabayaho kateho, n’erighundu, oyukaghemera oko luhande lughuma, oyute n’olulengo.”
^ Kutse “oyukimanira.”
^ Kutse “sibabye babehi.”
^ Kutse “esiri.”
^ Kutse “ezamiri.”
^ Kutse “esiri.”
^ Kutse “y’erimakirira oMungu.”
