Ebaruha y’erimbere oko Timoteo 4:1-16
4 Aliwe, ekinywa ekyasondolawa n’ekirimu ky’oMungu kikakanganaya ndeke-ndeke ngoko omo biro ebikasa, abandu balebe bakendisyaleka obwikirirya, aliwe bakendisyakwama ebinywa by’amabehi ebikasondolawa n’esyombinga, n’amakangirirya w’esyombinga.*
2 Bakendisyakola ekyo busana n’obulimba-limba* bw’abandu abakabugha amabehi, abandu abo obunya-mutima* bwabo buli ng’engolu y’ekironda ekyo mundu akwa busana n’erihisibwa omo kyuma ekihuhire.
3 Bakaghanaya abandu erilunga, n’erighania abandu by’ebyalya eby’oMungu abumba, abandu abali n’obwikirirya n’abasi ekwenene yo ndeke batoke eriryabyo ibanemusima oMungu.
4 Kundi ebyosi ebyo oMungu ahangyika byuwene, sihali ekyangaghuswa, omundu amapokerakyo inianemusima oMungu.
5 Kundi bikayirawamo bibuyirire erilabira ekinywa ky’oMungu n’omusabe owakakolawa busana nabyo.
6 Wamaha abaghala betu b’amahano ano, ighukendibya mughombe wa Kristo Yesu oyuwene, oyukalisibawa ebinywa by’obwikirirya n’amakangirirya awuwene agho wabirikwama ndeke-ndeke.
7 Aliwe, ughane esyohadisi sy’amabehi esikahemula oMungu, ng’esyohadisi sy’abakekulu. Nikwa uyikase eribya omundu oyukamakirira oMungu.
8 Kundi erikalya-kalya omubiri* ni ry’endundi nge. Aliwe, erimakirira oMungu riri n’endundi omo myatsi yosi, kundi rikatuwatikaya eribana emiyisa eyo oMungu abiritulagha lino, n’eyo akendisyatuha omo biro ebikasa.
9 Ekinywa ekyo ni ky’ekwenene kandi ni ky’eriligha butsira buhaka.
10 Ekyo kyo kikaleka itwakola kutsibu n’eriyikasa, kundi twabirihira amaha wetu omo Mungu oyuliho, Omusabuli w’abandu bosi, kutsibu-tsibu abataleghula.
11 Ubye ukaha abandu ebyalayiro ebyo, n’eribakangiriryabyo.
12 Sighuleke omundu wosi-wosi akakupokya busana n’eribya mulwana. Aliwe, ubye eky’erileberyako ekyuwene oko bataleghula omo binywa, omo mighendere, omo lwanzo, omo bwikirirya, n’omo mighendere eyerire,
13 Embere nihike, uyikase eribya ukasoma ndeke embere sy’abandu, erisikya abandu b’omutima, n’erikangirirya.
14 Isiwapokaya ekihembo ekiri omw’iwe, ekyo wahabawa busana n’obuminyereri omughulu ekyaghanda ky’abasyakulu kyakuhirako ebyala.
15 Ulengekanaye* oko myatsi eyo, uyitoberaye muyo, abandu bosi batoke erilangira ngoko unemulola embere.
16 Ubye ukayilebya, n’erilebya nga ukakangiriraya uti. Uyitsinge omo myatsi eyo, kundi wamabikola utya, ighukendiyisabula n’erisabula abakakuhulikirira.
Amaelezo awehikwa
^ Kinywa kwa kinywa, “w’ebirimu ebikateba.”
^ Kutse “obunafiki.”
^ Kutse “ezamiri.”
^ Kutse “erikola amazoezi w’omubiri.”
^ Kutse “Ughaniraye.”
