Ebaruha y’erimbere oko Timoteo 5:1-25
5 Isiwahayira omundu mukulu okw’iwe, aliwe umulembe-lembe nga baba waghu, abalwana ng’abaghala benyu,
2 abakali abakulu okw’iwe ng’abomama waghu, abambesa ng’abali benyu, ukolerebo n’omutima owerire.
3 Uwatikaye* abakwa-kali abali bakwa-kali kwenene-kwenene.*
4 Aliwe, omukwa-kali amabya inianawite oko bana kutse abitsikulu, ritolere abo ibatsuka erikangania ngoko bamakirire oMungu omo kihanda kyabo, n’eriha ababuti babo n’ababuti b’ababuti babo ebyo basingeneko, kundi ekyo kikatsemesaya oMungu.
5 Omukali oyuli mukwirwa kwenene-kwenene, kandi oyutawite oko kindu akayiketera oMungu, kandi syalileka erilemba-lemba oMungu n’erimusaba omo musibo n’omo kiro.
6 Aliwe, oyukabyaho busana n’eriyitsemesya, nomo angabya inianeho, aholire.
7 Neryo, ubye ukabaha ebyalayiro bino, batoke eribya butsira kosa.
8 Oko kwenene, omundu atitaha abandu biwe ebyo balaghireko, kutsibu-tsibu ab’omo nyumba yiwe, aho iniamaghana obwikirirya, kandi ini mubi kulenga n’oyutikirirye.
9 Omukwa-kali oyutolere erihandikwa yo mukwa-kali oyuli n’emyaka hakuhi 60, amabya iniabya n’omulume mughuma musa,
10 oyo wasibwe ngoko ali n’emighendere eyuwene, oyo wakulaya ndeke abana biwe, oyo wabya akakokya abagheni, oyo wabya akanabya ebisando by’ababuyirire, oyo wabya akawatikya abakaghalawa, oyo wabya akakola obuli mwatsi owuwene n’omuhwa.
11 Aliwe, isiwahandika abakwa-kali abakine balere, kundi omo mwanya w’erikolera Kristo, bakanza eritahibwa omughulu esyongumbu sy’emyatsi y’engyingo sikababukamo.
12 Bakendisyahabwa amalipizi busana n’eritendikola ebyo bayisogha kera.*
13 Kandi babiribya baghata, bakaghanga-ghanga oko manyumba w’abandi; si baghata risa, aliwe kandi ni b’ebwebwebwe, kandi bakayingiraya omo myatsi y’abandi, n’erikania oko myatsi eyo batatolere erikaniako.
14 Neryo nanzire abakwa-kali abakine balere ibalunga, ibabuta abana, ibasugha amanyumba wabo, isibaha enzighu y’akanya k’eritubughako muhanda.
15 Oko kwenene, abandi babirihera oko nzira n’erikwama Sitani.
16 Omukali Mukristo amabya iniawite abatunga biwe bakwa-kali awatikayebo bakasyabya muheke oko ndeko. Amakola atya, endeko iyikenditoka eriwatikya abakwa-kali abali bakwa-kali kwenene-kwenene.*
17 Abasyakulu abakasondola endeko yo ndeke batolere ibasikibwa kabiri, kutsibu-tsibu abakakola kutsibu omw’ibugha n’erikangirirya.
18 Kundi Amasako akabugha ati: “Isiwaboha obuno bw’enume y’ende omughulu ikahumba engano.” Kandi akabugha ati: “Oyukakola omubiiri atolere obuhingyi bwiwe.”
19 Hamabya oyukatsongera omusyakulu, isiwaligha hamabya isihali abimiri* babiri kutse abasatu.
20 Abakakola amalolo, uhayirebo embere sy’abandu, abandi batoke erisagha.
21 Ngakubwira embere sy’oMungu na Kristo Yesu n’abamalaika ababirisombolwa niti ukwame amahano aya butsira kasololo.
22 Isiwahira oko mundu wosi-wosi kw’ebyala luba-luba.* Isiwakola oko malolo w’abandi. Ubye ighunerire.
23 Isiwabya ukanywa amaghetse masa.* Aliwe, ubye ukanywa ehidivai hike busana n’enda yaghu, kandi kundi ukalwala-lwala.
24 Amalolo w’abandu balebe akaminyawa n’abandu bosi, neryo ibalw’ibatswerwa aho n’aho. Aliwe, amalolo w’abandi akaminyawa bolo.
25 Kutya, emikolere eyuwene ikaminyawa n’abandu bosi. Nikwa emikolere eyituwene siyangabisama.
Amaelezo awehikwa
^ Kinywa kwa kinywa, “Usikaye.”
^ Kutse “abakwa-kali abalaghire kwenene-kwenene oko buwatikya.” Ni bugha ambu, sibawite oyo wangabawatikya.
^ Kinywa kwa kinywa, “ebinywa byabo by’erimbere eby’obwikirirya.”
^ Kutse “abakwa-kali abalaghire kwenene-kwenene oko buwatikya.” Ni bugha ambu, sibawite oyo wangabawatikya.
^ Kutse “abatemwe.”
^ Ni bugha ambu, eriha omundu omubiiri w’omo ndeko wo luba-luba.
^ Kutse “Isiwanywa amaghetse.”
