Ebaruha y’erimbere oko Timoteo 6:1-21
6 Abahekire omuketo w’obukobe babye bakasikya abakama babo bo kutsibu, abandu bakasyabugha muhanda oko rina ry’oMungu n’amakangirirya wiwe.
2 N’abali n’abakama abikirirye isibaghana erisikyabo busana n’eribugha ambu ni baghala babo. Aliwe, ritolere ibakolerabo n’omutima wosi, kundi abandu abikirirye n’abanzirwe bo bakabana endundi omo mubiiri wabo owuwene.
Ubye ukakangirirya abandu emyatsi eyo n’eribahana uti bakwame yo.
3 Omundu amabikangirirya amakangirirya w’amabehi, kandi amatendiligha amakangirirya awuwene,* awakalua oko Mukama wetu Yesu Kristo, kutse iniataligha amakangirirya awakawatikaya omundu erimakirira oMungu,
4 aho iniakayiheka kutsibu kandi isiasi kindu. Inianzire kutsibu obuhaka* n’erikuba obuhaka b’oko binywa. Emyatsi eyo ikaleka ihabya eritsuro, amalwa, olutongo,* n’erilengekania oko bandi kw’emyatsi eyituwene,
5 obuhaka obutehwa bw’abandu ab’esyohakili esitsandire, abatasi ekwenene, abakalangira erimakirira oMungu nga ni mwatsi w’eribanamo endundi.
6 Oko kwenene, erimakirira oMungu ririmo ndundi nene omundu amabitsemera ebyo ali nabyo.
7 Kundi mututaleta omo kihugho mo kindu, kandi sitwangahekamo kindu.
8 Twamabya n’akalyo n’eky’eryambala, itukenditsemera ebyo.
9 Aliwe, abanzire kutsibu eribya bateke bakatoghera omw’ilengwako, bakahambawa omo kitegho, n’omo syongumbu nyingyi sy’obukiru kandi esituwene, esikatwala abandu b’okw’itoghotibwa n’okw’itsandibwa.
10 Kundi eryanza esyofranga y’enzuko y’emihanda yosi y’emyatsi mibi. Kandi busana n’eryanza esyofranga, abandu balebe babirileka obwikirirya, n’eriyitobongola-tobongola ehosi-hosi omo bulumi bunene.
11 Aliwe, iwe omundu w’oMungu, usaghe emyatsi eyi. Nikwa ukwamirire eritunganene, erimakirira oMungu, obwikirirya, olwanzo, eriyiyinia, n’obolo.
12 Ulwe amalwa awuwene w’obwikirirya, umakirire engebe ya kera na kera eyaleka iwabirikirwa, n’eyaleka iwabugha ebinywa ebyuwene embere sy’abimiri* bangyi.
13 Embere sy’oMungu, oyukaleka ebindu byosi ibyabya ibineho, n’embere sya Kristo Yesu, omwimiri* oyo wabugha ebinywa ebyuwene embere sya Pilato, ngakubwira niti:
14 Ukwame ekyalayiro omo nzira eyerire n’eyite yangabuwako muhanda, erihika omughulu Omukama wetu Yesu Kristo akendisyakanganibwa.
15 Omukama mughuma musa w’obutoki kandi oyuli n’obutseme, akendisyayikangania oko mughulu owabirihirwaho. Ni Mwami w’abakatabala ng’abami kandi ni Mukama w’abakatabala ng’abakama.
16 Iye musa yutewangahola, kandi ikere omo kyakakala ekyo omundu ate angahikamo, n’oyo omundu ate atalangira kandi oyo mundu ate angalangira. Asikibawe n’erihabwa obutoki kera na kera. Amina.
17 Ubwire abateke b’omo kihugho kino* uti isibayiheka, kandi isibayiketera obuteke obukahwa. Aliwe, bayiketere oMungu, oyukatuha ndeke-ndeke ebindu byosi ebyo tuwiteko.
18 Ubabwire uti babye bakakola ebyuwene, babye bakakola ebingyi ebyuwene, babye bakahitya, babye tayari eriha abandi.
19 Bamabikola batya, ibakendiyibikira obuteke obuwene, obukendisyabawatikya omo mughulu owakasa, kandi ibakendimakirira engebe y’ekwenene.
20 Timoteo, uteghaye ebyo wabirihabwa. Isiwakwama emikania mitya-mitya eyitesikaya ebibuyirire. Kandi isiwakwama amalengekania w’abandu abakalengekanaya bati basi emyatsi, amalengekania ayo syahambene n’ekwenene.
21 Busana n’erikwama amalengekania awali ng’ayo, abandu balebe babirileka obwikirirya.
Olukogho lubye haghuma nenyu.
Amaelezo awehikwa
^ Kutse “awali n’endundi.”
^ Kutse “alwere obuhaka.”
^ Kutse “ebitsumi.”
^ Kutse “sy’abatemwe.”
^ Kutse “omutemwe.”
^ Kutse “mughulu ono.” Ulebaye amaana w’ebinywa.
