Ebaruha y’erimbere ya Yohana 1:1-10
1 Tukabahandikira omwatsi owalebirye ekinywa ky’engebe, ekyabyaho eritsuka oko nzuko, ekyo twabiryowa, ekyo twabirilangira omo meso wetu, ekyo twalolako n’erilangira ebyo kyakola, kandi mutwatula kukyo omo byala byetu.
2 (Mutwaminya n’eryowa ndeke-ndeke engebe y’erikota eyo Tata akaha, netu tunemubakanganiayo n’eribabwirayo.)
3 Kandi tunemubabwira okw’ebyo twalangira n’eryowa mutoke eribya omo bughuma* netu, ngoko netu tuli omo bughuma na Tata na Mughala wiwe, Yesu Kristo.
4 Kandi tukabahandikira emyatsi eyi tutoke eritsema kutsibu.
5 Omwatsi ogho twowa erilua okw’iye n’owo tunemubahubirya wono: oMungu ni kyakakala, syalimo mwirima* n’ahake.
6 Twamabugha tuti, “Tuli omo bughuma naye,” aliwe itukinalendera omo mwirima, ituli babehi, isitulikwama ekwenene.
7 Aliwe, twamalendera omo kyakakala ngoko naye ali omo kyakakala, aho ituli omo bughuma, n’omusasi wa Yesu Mughala wiwe akatulusayako amalolo wetu wosi.
8 Twamabugha tuti, “Situlimo erilolo,” aho itukayiteba, n’ekwenene isiyiri omw’itwe.
9 Twamaghungama amalolo wetu butsir’ibisa, iniakenditughanyira amalolo wetu n’eritulusyako eritatunganene ryosi-ryosi, kundi iye ni mutaleghula kandi ni mutunganene.
10 Twamabugha tuti, “Situlitwatakola erilolo,” aho itukabugha tuti ni mubehi, n’ekinywa kiwe isikiri omw’itwe.
