Ebaruha y’erimbere ya Yohana 2:1-29
2 Bana baghe balere, ngabahandikira emyatsi eyi kusudi isimwakola erilolo. Aliwe, omundu amakola erilolo, tuli n’omundu oyo wangatuwatikya,* oyuli hakuhi na Tata, ni bugha ambu, Yesu Kristo, oyutunganene.
2 Kandi iye ni buhere bw’eribugha amalolo wetu.* Akabughaho amalolo wetu n’aw’ekihugho kyosi.
3 Twamabibya tukasikya ebyalayiro biwe, ekyo ikikendikangania ngoko twabirimuminya.
4 Omundu oyukabugha ati, “Nabirimuminya,” aliwe isyalikwama ebyalayiro biwe, ni mubehi n’ekwenene siyiri omo mundu oyo.
5 Omundu amakwama ekinywa kiwe, akabya iniakakanganaya ngoko anzire oMungu yo ndeke-ndeke, n’ekyo kyo kikaleka itwaminya ngoko tuli omo bughuma naye.
6 Omundu oyukabugha ati akabya iniane omo bughuma naye, atolere iniabya akakola ngoko Yesu abya akakola.*
7 Banzwa baghe, ekyalayiro ekyo ngabahandikira si kihya-kihya, aliwe ni kya kera. Mumwowakyo eritsuka oko nzuko. Ekyalayiro kya kera eki ni kinywa ekyo mwabiryowa.
8 Kandi ngabahandikira ekyalayiro kihya-kihya, ekyalayiro ekyo Yesu akwama. Nenyu nibya munemukwamakyo, kundi omwirima anemuhwaho n’ekyakakala ky’ekwenene kinemukolerya.
9 Omundu oyukabugha ati ali omo kyakakala, aliwe isyanzire omughala wabo, oyo iniakine omo mwirima.
10 Omundu oyo wanzire omughala wabo akabya iniane omo kyakakala, kandi sihali ekyangaleka iniatwikala.
11 Oyutanzire omughala wabo ali omo mwirima, kandi akabya inianemulendera omo mwirima; akabya isyasi eyo akaya, kundi omwirima akabya iniabiriliba ameso wiwe.
12 Bana baghe balere, ngabahandikira kundi amalolo wenyu abirighanyirwa busana n’erina riwe.
13 Inywe bobaba, ngabahandikira, kundi mwabiriminya oyo wabya inianeho eritsuka oko nzuko. Inywe balwana, ngabahandikira, kundi mwabirisinga omubi. Inywe bana, ngabahandikira, kundi mwabiriminya Tata.
14 Inywe bobaba, ngabahandikira, kundi mwabiriminya oyo wabya inianeho eritsuka oko nzuko. Inywe balwana, ngabahandikira, kundi muli n’akaghala, kandi kundi ekinywa ky’oMungu kikabya ikine omw’inywe, kandi mwabirisinga omubi.
15 Simwanze ekihugho kutse emyatsi eyiri omo kihugho. Omundu amanza ekihugho, isyanzire Tata.
16 Kundi ebyosi ebiri omo kihugho, ni bugha ambu, esyongumbu sy’omubiri, esyongumbu sy’ameso, n’omundu eryanza eriyikangania* busana n’ebindu ebyo awiteko, emyatsi eyo siyirilua oko Tata. Aliwe, ikalua oko bandu b’ekihugho.
17 Kandi, ekihugho n’esyongumbu syakyo binemulaba, aliwe oyukakola erisonda ry’oMungu akendisyabyaho kera na kera.
18 Bana baghe, eno y’endambi y’omwiso. Mwabiryowa ngoko oyukaghana Kristo anemwasa, nibya na lino abakaghana Kristo abangyi babiribyaho. Ekyo kikaleka itwaminya ngoko y’endambi y’omwiso.
19 Balua omw’itwe, aliwe sibabya kwenene-kwenene b’okw’itwe; kundi oko kwenene bangabere b’okw’itwe, bangasighere omo kati-kati ketu. Aliwe, mubaghenda erikangania ngoko abosi si b’okw’itwe.
20 Kandi mumwahirwako amaghuta n’oMungu mubuyirire erilabira ekirimu. Inywe bosi munasi ekwenene.
21 Siniribahandikira kundi simwasi ekwenene, aliwe ngabahandikira kundi munasiyo, kandi kundi sihali amabehi awakalua omo kwenene.
22 Omubehi yo wahi? Si y’oyukaghana ngoko Yesu yo Kristo kwe? Oyo yukaghana Kristo, ni bugha ambu, oyukaghana Tata na Mughala wiwe.
23 Obuli mundu oyukaghana Omughala w’oMungu syali omo bughuma na Tata. Aliwe, obuli mundu oyukabugha ati ikirirye Omughala w’oMungu ali omo bughuma na Tata.
24 Aliwe inywe, ebyo mowa oko nzuko ritolere ibyabya ibine omw’inywe. Ebyo mwowa erilua oko nzuko byamabya ibine omw’inywe, imukendibya imune omo bughuma n’Omughala w’oMungu n’omo bughuma na Tata.
25 Kandi iyuwene-wene abiritulagha omwatsi ono: Engebe y’erikota.
26 Ngabahandikira emyatsi eyi busana n’abandu abakasonda eribateba.
27 Amaghuta agho Mungu abahirako erilabira ekirimu kibuyirire syabalueko, kandi simulaghire oko mundu eribakangirirya. Aliwe, amaghuta ogho mwahirawako erilabira ekirimu kibuyirire akabakangiriraya emyatsi yosi. Ni w’ekwenene si w’amabehi. Isimwalua omo bughuma naye ngoko ekirimu kyabakangiriraya.
28 Neryo lino, bana baghe balere, mubye imune omo bughuma naye, kusudi omughulu akendisyayikangania, itwabya n’obwiranda bw’eribugha, kusudi isitwasyayihighula okw’iye busana n’esisoni sinene omughulu w’eribyaho riwe.
29 Mwamabya imunasi ngoko ni mutunganene, ni bugha ambu, imunasi ngoko obuli mundu oyukakola ebitunganene abutawa naye.
Amaelezo awehikwa
^ Kutse “oyukatulwirako.”
^ Kutse “bw’erihanula, obukasubayaho obuholo.”
^ Kinywa kwa kinywa, “atolere iniabya akaghenda ngoko Yesu abya akaghenda.”
^ Kutse “eriyihalamba.”
