Ebaruha y’erimbere ya Yohana 3:1-24
3 Mulebaye ngoko Tata abiritwanza kutsibu, tutoke eryahulwamo bana b’oMungu! Ni kwenene tuli bana b’oMungu. Ekyo kyo kikaleka ekihugho ikyatatuminya, kundi sikirikyatamuminya.
2 Banzwa baghe, lino tuli bana b’oMungu. Aliwe, situlitwaminya nga tukendisyabya tuti. Nikwa tunasi ngoko omughulu akendisyayikangania, tukendisyabya nga ye, kundi tukendisyamulangira ngoko ali.
3 Kandi omundu oyumuhiriremo amaha akabya iniakayeraya iyuwene-wene, ngoko Yesu Kristo naye erire.
4 Obuli mundu oyubeghere erikola erilolo akabya isyalikwama emighambo. Erilolo ry’eritendikwama emighambo.
5 Munasi Yesu ngoko mwasa busana n’eritulusyako amalolo, kandi iye syalimo erilolo.
6 Obuli mundu oyuli omo bughuma naye syalibya akakola erilolo; obuli mundu oyubeghere erikola erilolo syalyatamulolako, kandi syalyatamuminya.
7 Bana baghe balere, omundu isyabateba. Omundu oyubeghere erikola ekitunganene ni mutunganene, ngoko Yesu Kristo naye ni mutunganene.
8 Omundu oyubeghere erikola erilolo akalua oko Diabolo, kundi Diabolo akakola amalolo eritsuka oko nzuko.* Ekyo kyo kyaleka Omughala w’oMungu iniasa: eribughaho emibiiri ya Diabolo.
9 Obuli mundu oyo wabutawa n’oMungu syalibeghera eribya akakola erilolo, kundi ekirimu* ky’oMungu kikabya ikine emwisi siwe, neryo aho syangasyabeghera erikola erilolo, kundi iniabiributwa n’oMungu.
10 Abana b’oMungu n’abana ba Diabolo bakaminyikala oko mwatsi ono: Omundu oyutabeghere erikola emyatsi eyitunganene syalilua oko Mungu, n’omundu oyutanzire omughala wabo syalilua oko Mungu.
11 Kundi ono w’omwatsi ogho mwowa erilua oko nzuko: ritolere itwanzana.
12 Isitwabya nga Kaini, oyo walua oko mubi kandi oyo wita mughala wabo. Amwita busanaki? Kundi Kaini abya n’emibere mibi, aliwe omughala wabo abya atunganene.
13 Baghala betu, isimwasweka mukalangira ngoko ekihugho kibaponire.
14 Twabya nga tuholire, aliwe lino tuneho, kundi twanzire baghala betu. Omundu oyutanzire mughala wabo akabya ng’akinaholire.
15 Obuli mundu oyuponire mughala wabo ni mwiti, kandi munasi ngoko sihali omwiti oyukendisyabana engebe y’erikoka.
16 Twabiriminya olwanzo kundi Yesu mwaherera engebe* yiwe busana netu. Neryo ekyo kikaleka itwalangira ngoko netu ritolere itwahererera engebe yetu busana n’abaghala betu.
17 Aliwe, omundu amabya inianawite oko bindu, neryo inialangira omughala wabo inianalaghire oko kindu, aliwe iniaghana erimukwira obulighe, omundu oyo inianganabugha ati anzire oMungu?
18 Bana baghe balere, siritolere tukanza omo binywa bisa. Aliwe, ebyo tukakola byo bitolere ibyakangania ngoko twanzire abandi, kandi ritolere itwanzabo omo kwenene.
19 Ekyo kikakanganaya ngoko tuli n’ekwenene, n’ekyo kikendileka itwikirirya ngoko oMungu atwanzire,
20 nibya nomo omutima wetu angatutswera oko mwatsi wosi-wosi, kundi oMungu ni mukulu kutsibu kulenga emitima yetu, kandi asi emyatsi yosi.
21 Banzwa baghe, emitima yetu yitetatutswera, twanganakania n’oMungu bweghu-bweghu.
22 N’ekindu kyosi-kyosi ekyo tukamusaba akatuhakyo, kundi tukakwama ebyalayiro biwe n’erikola ebyo anzire.
23 Ekyalayiro kiwe kya kino: Twikiriraye omo rina ry’Omughala wiwe Yesu Kristo n’eryanzana, ngoko atuhana erikola.
24 Kandi oyukakwama ebyalayiro biwe akabya iniane omo bughuma naye. Naye akabya iniane omo bughuma n’omundu oyo. N’ekirimu ekyo atuha kikaleka itwaminya ngoko akabya iniane omo bughuma netu.
