Ebaruha y’erimbere ya Yohana 4:1-21
4 Banzwa baghe, isimwikiriraya obuli kinywa* ekikasondolawa n’ekirimu. Aliwe, mulebaye ebinywa* byosi ebikasondolawa n’ekirimu nga binemulua oko Mungu, kundi abaminyereri bangyi b’amabehi babiribya omo kihugho.
2 Ekyangabawatikya eriminya ekinywa ekikasondolawa n’ekirimu ekikalua ew’oMungu kya kino: Obuli kinywa ekikasondolawa n’ekirimu ekikakanganaya ngoko Yesu Kristo mwasa omo mubiri kikalua ew’oMungu.
3 Aliwe, obuli kinywa ekyasondolawa n’ekirimu ekikaghana Yesu sikirilua ew’oMungu. Ekinywa ekyo kikalua oko oyukaghana Kristo, oyo mwowa ngoko akendisyasa, n’ekinywa ekyo kyabiribya omo kihugho.
4 Bana baghe balere, mukalua oko Mungu kandi mwabirisingabo kundi oyuli omo bughuma nenyu ni mukulu kutsibu kulenga oyuli omo bughuma n’ekihugho.
5 Bakalua omo kihugho; kyo kikaleka ibabugha ebinywa ebikalua omo kihugho, n’ekihugho kikahulikirirabo.
6 Tukalua oko Mungu. Omundu oyo wabiriminya oMungu akatuhulikirira. Omundu oyutelua oko Mungu syalituhulikirira. Ekyo kyo kikatuwatikaya eriminya ekinywa ky’ekwenene ekikasondolawa n’ekirimu, n’ekinywa ky’amabehi ekikasondolawa n’ekirimu.
7 Banzwa baghe, situleke eryanzana, kundi olwanzo lukalua oko Mungu, n’obuli mundu oyo wanzire mulikyabo abiributwa n’oMungu, kandi asi oMungu.
8 Omundu oyutanzire mulikyabo syalyaminya oMungu, kundi oMungu ni lwanzo.
9 OMungu mwakangania ngoko atwanzire omughulu atuma Mughala wiwe, ekyusa kiwe oko kihugho tutoke erisyabana engebe erilabira iye.
10 OMungu mwatuma Mughala wiwe mo buhere bw’eribughaho* amalolo wetu. Mwatakola atya kundi n’itwe twamwanza, aliwe iye yo watwanza.
11 Banzwa baghe, oMungu amabya imwatwanza atya, kwesi ritolere itwanzana.
12 Sihali omundu oyo wabirilangira oMungu n’ekiro n’ekighuma. Twamatendileka eryanzana, oMungu iniakendibya iniane haghuma netu, kandi itukendyusulamo olwanzo.
13 Tukaminya ngoko tukabya itune omo bughuma naye, naye ngoko akabya iniane omo bughuma netu kundi abirituha ekirimu kiwe.
14 Kandi twabirilangira, kandi tunemukangania ngoko Tata mwatuma Mughala wiwe atoke erisabula ekihugho.
15 Omundu oyukakanganaya kw’ikirirye ngoko Yesu ni Mughala w’oMungu, oMungu akabya iniane omo bughuma naye, naye akabya iniane omo bughuma n’oMungu.
16 Twabiriminya n’erikirirya ngoko oMungu atwanzire.
OMungu ni lwanzo, n’omundu oyo akabya inianemukangania olwanzo akabya iniane omo bughuma n’oMungu, n’oMungu akabya iniane omo bughuma naye.
17 Omo nzira eyo, olwanzo lukalangirika ndeke-ndeke omw’itwe tutoke erisyabugha n’obutubaha* omo kiro ky’eritswera, kundi ngoko omundu oyo ali, netu ko tuli tutya omo kihugho kino.
18 Omundu oyo wanzire oMungu syalisagha, aliwe omundu amabyanza ndeke-ndeke ekyo kikaleka iniatasagha* kundi obuba bukaleka omundu iniatakangania olwanzo lo ndeke-ndeke. Oko kwenene, olwanzo lw’omundu oyukakwa obuba lukabya isilughonere.
19 Tukanza kundi n’iye yo watsuka eritwanza.
20 Omundu amabugha ati, “Nanzire oMungu,” aliwe iniaponire omughala wabo, oyo ini mubehi. Kundi omundu oyutanzire omughala wabo oyo akalangira syanganza oMungu oyo ate atalangira.
21 Kandi mwatuha ekyalayiro kino: Omundu oyo wanzire oMungu ritolere inianza na mughala wabo.
Amaelezo awehikwa
^ Kinywa kwa kinywa, “kirimu.”
^ Kinywa kwa kinywa, “ebirimu.”
^ Kutse “bw’erihanula, obukatuleraya.”
^ Kutse “omw’iyiketera.” Kinywa kwa kinywa, “n’obwiranda bw’eribugha.”
^ Kutse “kikahigha obuba.”
