Ebaruha y’erimbere ya Yohana 5:1-21
5 Obuli mundu oyo wikirirye ngoko Yesu ni Kristo abiributwa n’oMungu, n’obuli mundu oyo wanzire oMungu anzire n’abana b’oMungu.
2 Tukakanganaya ngoko twanzire abana b’oMungu omughulu tukakanganaya ngoko twanzire oMungu n’erikwama ebyalayiro biwe.
3 Kundi eryanza oMungu ry’erikwama ebyalayiro biwe, n’ebyalayiro biwe si muheke owalitohire.
4 Kusangwa obuli mundu* oyukabutawa n’oMungu akasinga ekihugho, n’ekyatuwatikaya erisinga ekihugho b’obwikirirya bwetu.
5 Oyo wangasinga ekihugho nindi? Yo mundu oyo wikirirye ngoko Yesu ni Mughala w’oMungu.
6 Yesu Kristo mwasa n’amaghetse n’omusasi. Mwatasa n’amaghetse masa, aliwe mwasa n’amaghetse n’omusasi. Ekirimu kyo kikakanganaya omwatsi oyo wo ndeke-ndeke, kundi ekirimu ni kwenene.
7 Kundi hali ebindu ebisatu ebikakanganaya ndeke-ndeke Yesu nga nindi:
8 Ekirimu, amaghetse, n’omusasi; n’ebisatu ebi biri omo bughuma.
9 Twamabiligha ebyo abandu bakabugha, ni bugha ambu, iritolere itwaligha kundu ebyo oMungu akabugha. Kundi ebyo oMungu akabugha ni by’ekwenene, kusangwa ebyo oMungu akabugha ni bindu ebikakanganaya Omughala wiwe nga nindi.
10 Omundu oyo wikirirye Omughala w’oMungu akakanganaya ngoko ebinywa ebyo oMungu amukangiriraya biri omo mutima wiwe. Omundu oyutikirirye oMungu abiriyira oMungu mo mubehi, kundi mwatikirirya ebinywa ebyo oMungu amukangiriraya oko Mughala wiwe.
11 Omwatsi w’ekwenene wono: OMungu mwatuha engebe y’erikota, n’engebe eyo yiri omo Mughala wiwe.
12 Oyuli omo bughuma n’Omughala w’oMungu ali n’engebe eyi, n’oyute omo bughuma n’Omughala w’oMungu syali n’engebe eyi.
13 Ngabahandikira emyatsi eyi mutoke eriminya ngoko muli n’engebe y’erikota, inywe mukikiriraya erina ry’Omughala w’oMungu.
14 Kandi kino kyo tuyiketere oko Mungu:* Nomo twangamusabaki, akatwowa, twamamusaba erikwamana n’erisonda riwe.
15 Kandi twamaminya ngoko akatuhulikirira omughulu tukamusaba omwatsi wosi-wosi, tukaminya ngoko tukendibana ebyo tulyamusaba kundi in’iye tulyasababyo.
16 Omundu amalangira omughala wabo akakola erilolo eritekolaya oko luholo, asabe, n’oMungu akendisyaha omughala wabo oyo y’engebe. Akendisyaha engebe abosi abatekola amalolo awakatwala oko luholo. Hane erilolo erikatwala oko luholo. Siniribugha niti omundu atolere iniasabira omughala wabo amakola erilolo eriri ng’eryo.
17 Eritatunganene ryosi ni rilolo, aliwe hane erilolo eritetwala oko luholo.
18 Tunasi ngoko obuli mundu oyo wabutawa n’oMungu syabeghere erikola erilolo, aliwe oyo wabutawa n’oMungu* akamuteghaya, n’omubi syangamuyira kindu.*
19 Tunasi ngoko tuli b’oMungu, aliwe ekihugho kyosi kikasondolawa na Sitani.*
20 Tunasi ngoko Omughala w’oMungu mwasa n’erituha obwenge tutoke eriminya oMungu w’ekwenene. Kandi erilabira Omughala wiwe Yesu Kristo, tuli omo bughuma Naye. Yo Mungu w’ekwenene, kandi iye yo nzuko y’engebe y’erikota.
21 Bana baghe balere, muyiteghaye oko syosanamu.
Amaelezo awehikwa
^ Kinywa kwa kinywa, “obuli kindu ekyabutawa n’oMungu.”
^ Kutse “twanganakania n’oMungu bweghu-bweghu kundi.”
^ Ni bugha ambu, Yesu Kristo, Omughala w’oMungu.
^ Kutse “syangamuhamba.”
^ Kinywa kwa kinywa, “n’omubi.”
