Emyatsi y’Emighulu y’Akabiri 1:1-17
1 Solomona mughala wa Daudi mwaendelea eriwatya obwami bwiwe, na Yehova oMungu wiwe abya haghuma naye. Mwamuyira mo mukulu kutsibu.
2 Solomona mwabirikira Abaisraeli bosi, abakulu b’amaelfu, abakulu b’amamia, abatsweri, n’abakulu bosi be Israeli, abakulu b’ebitunga.
3 Enyuma sy’aho, Solomona n’abandu bosi mubaya omo mwanya w’endata owabya e Gibeoni, kundi eyo yo yabya ehema y’erihindanamo y’oMungu w’ekwenene, ehema eyo Musa omughombe wa Yehova akokotaya omo mbwarara.
4 Aliwe Daudi abya iniabirilusya Erisanduku ry’oMungu w’ekwenene e Kiriati-yearimu, n’eritwalaryo omo mwanya ogho abya iniabiriteghekaniryaryo. Abya iniabirihimbiraryo ehema e Yerusalema.
5 Ekiherero ky’ekwivre* ekyo Bezaleli mughala wa Uri, mughala Huri, akokotaya, mukyahirwa embere sy’ehema ya Yehova. Solomona n’abandu bosi abahindene ibakasabira embere syakyo.*
6 Neryo Solomona mwaherera aho h’amahere embere sya Yehova. Mwaherera amahere w’eryokererya 1 000 oko kiherero ky’ekwivre* ky’ehema y’erihindanamo.
7 Omo kiro ky’ekiro ekyo, oMungu mwahulukira Solomona, amamubulya ati: “Wanzire inakuhaki?”
8 Neryo Solomona mwasubirya oMungu w’ekwenene ati: “Wabirikangania baba waghe Daudi y’olwanzo lunene oluteleghula, kandi wabiriniyira mo mwami omo mwanya wiwe.
9 Neryo lino, Yehova Mungu, ekyo wabirilagha baba waghe Daudi kibererere, kundi wabiriniyira mo mwami w’abandu banene ng’olututu lw’oko kihugho.
10 Neryo umbe amenge n’obutoki bw’eriminya emyatsi, nitoke erisondola abandu aba, kundi hane oyo wangatoka eritswera abandu baghu banene* aba?”
11 Neryo oMungu mwabwira Solomona ati: “Kundi ekyo kyo mutima waghu anzire, kandi kundi siwetanisaba uti nikuhe obuteke, ebindu, n’olukengerwa, kutse uti esyonzighu syaghu sikwe, kandi kundi siwetanisaba uti kumbe iwabyaho ebiro binene, aliwe mukanisaba uti nikuhe amenge, obutoki bw’eriminya emyatsi utoke eritswera abandu baghe abo nabirikuyira mo mwami wabo,
12 ngendikuha amenge n’obutoki bw’eriminya emyatsi. Aliwe kandi ngendikuha obuteke, ebindu, olukengerwa kulenga abami bosi ababyaho embere syaghu, n’abakendisyabyaho enyuma syaghu.”
13 Neryo Solomona mwalua omo mwanya w’endata owabya e Gibeoni ahabya ehema y’erihindanamo, amasuba e Yerusalema; neyo mwatabala Abaisraeli.
14 Solomona mwaendelea eriyikuma-kumira emitoka n’esyosabayiri.* Mwabya n’emitoka 1 400 n’esyosabayiri* 12 000. Iniakabika eyindi mitoka omo miyi y’eribikamo emitoka, n’eyindi mitoka iniakabikayo e Yerusalema hakuhi n’oho abya ikere.
15 Mwayira efeza* n’ehero mo nene e Yerusalema ng’amabwe, n’emiti y’emierezi muyabya minene ng’emiti y’emikuyu eyikabya omo Shefela.
16 Solomona iniakalusaya esyosabayiri* siwe e Misri. Abakomersa b’omwami ibakaghula esyosabayiri omo beyi ngumerera.
17 Omutoka mughuma owalyalusibawa e Misri iniakaghula ebihande 600 by’efeza,* n’esabayiri* nguma iyikaghula ebihande 150 by’efeza. Abakomersa b’omwami ibakatasyaghulayasyo abami b’Abahiti n’abami be Siria.
Amaelezo awehikwa
^ Kutse “ky’omulinga.”
^ Kutse “ibakamubuliraya aho.”
^ Kutse “ky’omulinga.”
^ Kinywa kwa kinywa, “erihuluka n’eringira embere sy’abandu.”
^ Kutse “abakaghenda oko syosabayiri.”
^ Kutse “n’esyofarasi; n’esyoshevale.”
^ Ni kindu ky’obughuli ekikalua omo kitaka.
^ Kutse alinga, “Solomona iniakalusaya esyosabayiri siwe e Misri ne Kuwe; abakomersa b’omwami ibakalusayasyo e Kuwe,” alinga e Kuwe ye Kilikia.
^ Ni kindu ky’obughuli ekikalua omo kitaka.
^ Kutse “n’efarasi; n’eshevale.”
