Emyatsi y’Emighulu y’Akabiri 10:1-19
-
Abaisraeli bamaghana obusondoli bwa Rehoboamu (1-19)
10 Rehoboamu mwaya e Shekemu, kundi Abaisraeli bosi babya ibabiriya e Shekemu bakayamuyira mo mwami.
2 Yeroboamu mughala wa Nebati mwowa oko mwatsi oyo. Oko mughulu oyo, abya iniakine e Misri kundi mwatibitirayo akasagha omwami Solomona. Neryo Yeroboamu mwalw’inialua e Misri.
3 Neryo abandu mubayamurondya. Yeroboamu n’abandu bosi be Israeli mubayasungana na Rehoboamu, bamamubwira bati:
4 “Baba waghu mwaleka amaisa wetu iniakala.* Aliwe iwe utetatusaba binene ngoko baba waghu akola, kandi utetakalya amaisa wetu,* itukendikukolera.”
5 Neryo omwami Rehoboamu mwabasubirya ati: “Musube hano habilaba biro bisatu.” Neryo abandu mubaghenda.
6 Enyuma sy’aho, omwami Rehoboamu mwayasaba erihano ry’abasyakulu abakola na baba wiwe Solomona omughulu abya iniakineho. Mwababulya ati: “Mwamanihana muti nisubiraye abandu aba bo nitiki?”
7 Mubamusubirya bati: “Wamabikolera abandu bo ndeke, wamabibakolera ebyo banzire, n’eribasubirya ndeke, ibakendibya baghombe baghu mughulu wosi.”
8 Aliwe mwatakwama erihano eryo abasyakulu bamuha, neryo mwayarondya erihano oko balwana abakula haghuma naye kandi ababya bakamukolera oko mughulu oyo.
9 Mwabulya abalwana abo ati: “Abandu aba mubakanibwira bati, ‘Isiwakalaya amaisa* wetu ngoko baba waghu akola,’ neryo mwamanihana muti nibasubiraye nitiki?”
10 Abalwana abakula haghuma na Rehoboamu mubamusubirya bati: “Abandu abalyakubwira bati, ‘Baba waghu mwaleka amaisa* wetu iniakala, aliwe iwe isiwakalayagho,’ ubabwire uti, ‘Akasanwe kaghe* kakendibya kanene kulenga embindi ya baba waghe.*
11 Baba waghe mwaleka amaisa* wenyu iniakala, aliwe ingye ngenditasyakalyagho kutsibu okw’aho. Baba waghe iniakabahunza omo hifimbo hya bule-bule, aliwe ingye ngendibya ngabahunza omo syofimbo esiriko ehyuma ehiyitsongire.’”
12 Neryo ekiro ky’akasatu kyabere kyahika, Yeroboamu n’abandu bosi mubayasungana na Rehoboamu, kundi omwami Rehoboamu mwababwira ati: “Musube hano habilaba biro bisatu.”
13 Aliwe omwami mwakaramirabo, mwatakwama erihano eryo basyakulu bamuha.
14 Mwakwama erihano ry’abalwana, neryo amabasubirya ati: “Ingye ngenditasyakalya amaisa* wenyu okw’aho. Baba waghe iniakabahunza omo hifimbo hya bule-bule, aliwe ingye ngendibya ngabahunza omo syofimbo esiriko ehyuma ehiyitsongire.”
15 Neryo omwami mwatakwama eby’abandu, kundi oMungu w’ekwenene yo wabya akasondola emyatsi yitoke erighenda yitya, kusangwa kyabya ikitolere ebinywa ebyo Yehova abwira Yeroboamu mughala wa Nebati erilabira Ahiya owe Shilo ibyabererera.
16 Kundi omwami mwaghana eribahulikirira, Abaisraeli bosi mubamubwira bati: “Kwesi situli b’oko kihanda kya Daudi! N’omughala wa Yese sihali ekyo angatuha. Inywe Baisraeli, obuli mundu asube eyiri emiungu yiwe! Neryo lino Daudi, sulubirira ekihanda kyaghu.” Enyuma sy’aho, Abaisraeli mubasuba omo manyumba* wabo.
17 Aliwe Rehoboamu mwaendelea eritabala Abaisraeli ababya bikere omo miyi ye Yuda.
18 Habere habilabamughulu mulebe, omwami Rehoboamu mwatuma Hadoramu ayasungane n’Abaisraeli bosi, aliwe Abaisraeli bosi mubamwita omo mabwe. Adoramu yo wabya mwimaniri w’abandu ababya bakakola emibiiri y’erikaswa. Omwami Rehoboamu mwatoka erisambira oko mutoka wiwe, amatibita e Yerusalema.
19 Eritsuka ekiro ekyo, Abaisraeli sibalihulikirirana n’ekihanda kya Daudi.
Amaelezo awehikwa
^ Kutse “baba waghu mwatuhekya omuketo owalitohire.”
^ Kutse “wamabyanguhya omuketo owalitohire ogho atuhekaya.”
^ Kutse “nianguhaye omuketo ogho baba waghe abahekaya.”
^ Kutse “baba waghu mwatuhekya omuketo owalitohire.”
^ Kutse “Akanwe kaghe kake.”
^ Kutse “ngendibalolya oko kikalire kulenga baba waghe.”
^ Kutse “baba waghe mwabahekya omuketo owalitohire.”
^ Kutse “baba waghe mwabahekya omuketo owalitohire.”
^ Kinywa kwa kinywa, “mahema.”
