Emyatsi y’Emighulu y’Akabiri 11:1-23
11 Omughulu Rehoboamu ahika e Yerusalema, mwalw’iniahindania abandu b’omo kihanda kya Yuda n’ekya Benyamini, abasuda 180 000 abasi erilwa,* batoke erilwa n’abandu be Israeli n’erisubulirya Rehoboamu y’obwami.
2 Neryo Yehova mwabwira Shemaya omundu w’oMungu w’ekwenene ati:
3 “Ubwire Rehoboamu mughala wa Solomona omwami we Yuda, n’Abaisraeli bosi abali e Yuda ne Benyamini uti,
4 ‘Yehova ati: “Isimwayalwa n’abaghala benyu. Obuli mundu asube ewiwe, kundi n’ingye niryaleka ebi ibyabya.”’” Neryo mubowa ekinywa kya Yehova, mubasubula ewabo, sibatasyayalwa na Yeroboamu.
5 Rehoboamu mwikala e Yerusalema kandi mwawatya emiyi ye Yuda.
6 Mwatasyahimba* e Betlehemu, Etamu, Tekoa,
7 Bete-zuri, Soko, Adulamu,
8 Gati, Maresha, Zifu,
9 Adoraimu, Lakishi, Azeka,
10 Zora, Aiyaloni, ne Hebroni, emiyi eyiwatire eyabya omo kiharo kye Yuda n’ekiharo kye Benyamini.
11 Kandi mwawatya emyanya eyo omundu ateangahikamo bweghu-bweghu, mwahiramo abakomanda n’eribya akatwalamo akalyo, amaghuta, n’edivai.
12 Mwahira omo miyi mbiriri-mbiriri mw’esyongabo nene-nene n’amatumo; mwawatya emiyi eyo yo kutsibu. Kandi mwaendelea eritabala Yuda na Benyamini.
13 Abahereri n’Abalawi ababya omo Israeli yosi mubalua omo biharo byabo erisyakangania ngoko bali oko luhande lwa Rehoboamu.
14 Abalawi mubalua omo biharo byabo by’erilisiryamo n’eyiri ebitaka byabo, bamasa e Yuda ne Yerusalema, kundi Yeroboamu n’abaghala biwe babya ibabiribugha bati isibasyabya bahereri ba Yehova.
15 Neryo Yeroboamu mwayihiriraho abahereri biwe-biwe abakendibya bakakolera omo myanya y’endata n’erisondola abandu bakaramya emirimu* eyisosire esyombaya n’ebyana by’esyonde ebyo Yeroboamu akokotaya.
16 N’abandu b’omo bihanda byosi bye Israeli ababya banzire erisondya-sondya Yehova oMungu we Israeli mubakwama abahereri n’Abalawi e Yerusalema batoke eriyaherera amahere wo Yehova, oMungu w’abotatakulu wabo.
17 Omo myaka isatu, mubawatya obwami bwe Yuda n’erikangania ngoko bali oko luhande lwa Rehoboamu mughala wa Solomona; omo myaka isatu eyo, mubakola ngoko Daudi na Solomona bakola.
18 Enyuma sy’aho, Rehoboamu mwatahya Mahalati, mwali wa Yerimoti mughala wa Daudi n’owa Abihaili mwali wa Eliabu mughala wa Yese.
19 Habere habilaba biro, Mahalati mwamubutira abana b’obulume. Mwamubutira: Yeusi, Shemaria, na Zahamu.
20 Enyuma sy’aho, Rehoboamu mwatahya Maaka, mwitsikulu wa Absalomu. Habere habilaba biro, Maaka mwamubutira abana b’obulume. Mwamubutira: Abiya, Atai, Ziza, na Shelomiti.
21 Rehoboamu mwanza Maaka omwitsikulu wa Absalomu yo kutsibu kulenga ngoko abya anzire abandi bakali biwe bosi; abya n’abakali 18 n’abandi bakali 60, neryo mwabuta abana b’obulume 28 n’abana b’obukali 60.
22 Neryo Rehoboamu mwayira Abiya mughala wa Maaka mo mukulu n’omusondoli w’abaghala babo, kundi abya anzire erisyamuyira mo mwami.
23 Aliwe Rehoboamu mwakola n’amenge kandi mwatuma* abaghala biwe balebe omo biharo byosi bye Yuda n’ebya Benyamini, omo miyi yosi eyiwatire, kandi mwabya akabaha akalyo kanene n’eribatahirya abakali banene.
Amaelezo awehikwa
^ Kinywa kwa kinywa, “abasombwere.”
^ Kutse “Mwawatya.”
^ Kinywa kwa kinywa, “esyombene.” Kutse “esyombinga.”
^ Kutse “mwapanza-panzira.”
