Emyatsi y’Emighulu y’Akabiri 12:1-16
12 Obwami bwa Rehoboamu bwabere bwabisika ndeke-ndeke kandi mwabya abibya n’amaka, mwaleka erikwama Emighambo ya Yehova, n’Abaisraeli bosi nabo mubaleka erikwamayo.
2 Omo mwaka w’akatano w’obutabali bwa Rehoboamu, Shishaki omwami we Misri mwasyalwa n’omuyi we Yerusalema, kundi Abaisraeli babya ibabirileghula oko Yehova.
3 Abya n’emitoka 1 200, abandu 60 000 abakaghenda oko syosabayiri,* n’abasuda banene abo alua nabo e Misri; habya Abalibya, Abasuki, n’Abaetiopia.
4 Mwahamba emiyi eyiwatire ye Yuda; n’oko nduli, amayahika e Yerusalema.
5 Omuminyereri Shemaya mwayasungana na Rehoboamu n’abakulu be Yuda ababya bahindene e Yerusalema busana na Shishaki. Omuminyereri Shemaya mwababwira ati: “Yehova ati, ‘Mwabirinisighania, neryo naghe nabiribasighania n’eribahira omo byala bya Shishaki.’”
6 Abakulu be Israeli n’omwami mubabya babyowa ebinywa ebyo, mubayikehya, n’eribugha bati: “Yehova asingene.”
7 Omughulu Yehova alangira ngoko babiriyikehya, Yehova mwabwira Shemaya ati: “Babiriyikehya. Sinendisyatoghotyabo, ngendibasabula omo biro bike. Sinendisyaleta erihitana ryaghe oko muyi we Yerusalema erilabira Shishaki.
8 Aliwe bakendibya baghombe biwe. Ekyo kikendileka ibaminya ngoko erinikolera ryuwene kulenga erikolera abami* b’omo bindi bihugho.”
9 Neryo Shishaki omwami we Misri mwayalwa n’omuyi we Yerusalema. Mwimya ebindu by’obughuli by’omo nyumba ya Yehova n’ebindu by’obughuli by’omo nyumba y’omwami. Mwaheka obuli kindu, mwaheka n’esyongabo sy’ehoro esyo Solomona akokotaya.
10 Neryo omwami Rehoboamu mwakokotya esyongabo sy’ekwivre* esikendibya sikakolesibwa omo mwanya w’esiryahekawa, mwahasyo abakulu b’abateya ababya bakatsunga omulango w’enyumba y’omwami.
11 Omughulu omwami abya akaya oko nyumba ya Yehova, abateya ibakaheka esyongabo esyo; n’enyuma sy’aho, ibakasubayasyo omo depo y’abateya.
12 Kundi omwami mwayikehya, Yehova mwaleka erimuhitanako, kandi mwatatoghotyabo olosi, kandi e Yuda yabya iyikine ebindu bilebe ebyuwene.
13 Omwami Rehoboamu mwabya n’akaghala kanene e Yerusalema kandi mwaendelea eritabala. Rehoboamu abya n’emyaka 41 omughulu abya mwami. Mwatabala oko myaka 17 iniane e Yerusalema, omuyi ogho Yehova asombola omo miyi yosi y’ebihanda bye Israeli atoke eribyako erina riwe. Mama w’omwami iniakahulawa mo Naama Omuamoni.
14 Aliwe omwami Rehoboamu mwakola ebituwene, kundi mwatayisogha omo mutima wiwe erisondya-sondya Yehova.
15 Emyatsi yosi eyilebirye Rehoboamu, eritsuka oko mwanzo erihika oko mwiso, yinahandikire omo bitabu by’omuminyereri Shemaya n’omo kitabu kya Ido omulangiri ekihandikiremo ebizazi* ngoko bitondekene. Rehoboamu na Yeroboamu ibakabera erilwa.
16 Enyuma sy’aho, Rehoboamu mwahola ngoko abotata-kulu wiwe bahola. Mwatabwa omo Muyi wa Daudi; neryo mughala wiwe Abiya mwabya mwami omo mwanya wiwe.
Amaelezo awehikwa
^ Kutse “syofarasi; syoshevale.”
^ Kinywa kwa kinywa, “amami.”
^ Kutse “sy’omulinga.”
^ Kutse “esyondengo.”
