Emyatsi y’Emighulu y’Akabiri 13:1-22
13 Omo mwaka we 18 w’obutabali bw’omwami Yeroboamu, Abiya mwabya mwami we Yuda.
2 Mwatabala oko myaka 3 iniane e Yerusalema. Mama wiwe abya iniakahulawa mo Mikaya; abya mwali wa Urieli we Gibea. Abiya na Yeroboamu mubabya bakalwa.
3 Neryo Abiya mwaya omo malwa n’abasuda 400 000 b’amaka kandi abasi erilwa.* Na Yeroboamu mwapanga abasuda biwe batoke erilwa na Abiya, babya basuda 800 000 b’amaka kandi abasi erilwa.*
4 Neryo Abiya mwimana oko Kitwa kya Zemaraimu, ekiri omo kiharo ky’ebitwa kye Efraimu. Mwabugha ati: “Yeroboamu n’Abaisraeli bosi munihulikirire.
5 Simwasi ngoko Yehova oMungu we Israeli mwaha Daudi y’obwami atoke eritabala Israeli kera na kera, iye n’abaghala biwe, omw’ikola naye endaghane y’omunyu?*
6 Aliwe Yeroboamu mughala wa Nebati, omughombe wa Solomona mughala wa Daudi, mwayihanda, amaghana erikwama eby’omukama wiwe.
7 Abalume abatawite eky’erikola, ebiwere-were, mubyayighunga naye. Mubyaghana erikwama obusondoli bwa Rehoboamu mughala wa Solomona. Oko mughulu oyo, Rehoboamu abya iniakine mulere kandi ini muba, neryo isyangatoka eriyihanda kubyo.
8 “Neryo lino, mukalengekanaya muti mwanganayihanda oko bwami bwa Yehova obuli omo byala by’abaghala ba Daudi, kundi muli banene kandi kundi muwite oko byana by’ende by’ehoro ebyo Yeroboamu alyabakokoteraya mo miungu.
9 Si mwabiritibita oko bahereri ba Yehova, abitsikulu ba Haruni, kandi mwabiritibita n’oko Balawi, neryo mwabiriyihiriraho abahereri benyu-benyu ngoko abandu b’omo bindi bihanda bakakola. Omundu wosi-wosi oyukasa* n’enume y’ende eyikine nyilere n’esyombangale 7 anganabya muhereri w’emiungu eyo eyite miungu.
10 Itwe, Yehova y’oMungu wetu, sitwetwamusighania; abahereri betu, abitsikulu ba Haruni, banemukolera Yehova, n’Abalawi banemubawatikya omo mubiiri wabo.
11 Banemutumbirya Yehova y’omuki w’amahere w’eryokererya omo buli tututu n’omo buli igholo-gholo, banemumutumbirya n’obukwa obukaluamo ekikumbo ekyuwene. Banemuhira n’emikati eyitomengekene* oko mesa y’ehoro eyabiryeribwa. Kandi obuli igholo-gholo, banemwakya esyotala esikabya oko kindu ky’erihirako esyotala eky’ehoro. Tunemukola ebyo Yehova oMungu wetu akatusaba erikola, aliwe inywe mwabirimusighania.
12 Neryo mulangire! OMungu w’ekwenene ane haghuma netu, anemutusondola, n’abahereri biwe bane hano busana n’eribuha omo syongunga bakakangania ngoko tukalwa nenyu. Balume be Israeli, isimwalwa na Yehova, oMungu w’abotata-kulu wenyu, kundi simwangatoka.”
13 Aliwe Yeroboamu mwatuma abasuda ati bayalimbaye abalume be Yuda n’eribasirako enyuma. Neryo abasuda ba Yeroboamu babya embere sy’abasuda be Yuda, n’abandi basuda ba Yeroboamu abayabalimbaya babya enyumba sy’abasuda be Yuda.
14 Abasuda be Yuda babere babibinduka, mubalangira ngoko bakendilwa n’abasuda abali embere syabo n’abali enyuma syabo. Neryo mubasaba Yehova bati abawatikaye, abahereri ibanemubuha omo syongunga mo kutsibu.
15 Abasuda be Yuda mubalaka omo mulenge w’amalwa. Abasuda be Yuda babere babilaka omo mulenge w’amalwa, oMungu w’ekwenene mwasinga Yeroboamu n’Abaisraeli bosi embere sya Abiya na Yuda.
16 Abaisraeli mubatibita bakasagha abasuda be Yuda, oMungu mwahirabo omo byala byabo.
17 Abiya n’abandu biwe mubitabo kutsibu, abasuda 500 000 abasi erilwa* be Israeli mubahola.
18 Ekiro ekyo, abalume be Israeli mubahemuka, aliwe abasuda be Yuda ibo mubasinga kundi mubayiketera* Yehova, oMungu w’abotata-kulu wabo.
19 Abiya mwataleka erikwamirira Yeroboamu. Mwamusaghula emiyi eno: Beteli n’emilongo eyitimbire kuyo, Yeshana n’emilongo eyitimbire kuyo, ne Efraini n’emilongo eyitimbire kuyo.
20 Oko mughulu wa Abiya, Yeroboamu mwatasyabya n’akaghala ako abya nako embere. Oko mwiso, Yehova mwamuha amalipizi, neryo amahola.
21 Aliwe Abiya mwabya n’akaghala kanene. Ebiro bikalaba, Abiya mwabya n’abakali 14, mwabuta abana b’obulume 22 n’abana b’obukali 16.
22 Eyindi myatsi eyilebirye Abiya, ebyo akola, n’ebyo abugha, ebyosi ebyo binahandikire omo bitabu by’omuminyereri Ido.
Amaelezo awehikwa
^ Kinywa kwa kinywa, “abasombwere.”
^ Kinywa kwa kinywa, “abasombwere.”
^ Ni bugha ambu, “endaghane ya kera na kera kandi eyiteyangabinduka.”
^ Kinywa kwa kinywa, “oyukasyusulaya ebyala biwe.”
^ Ni bugha ambu, emikati y’erikangania.
^ Kinywa kwa kinywa, “abasombwere.”
^ Kinywa kwa kinywa, “mubaghemera.”
