Emyatsi y’Emighulu y’Akabiri 14:1-15
14 Neryo Abiya mwahola ngoko abotata-kulu wiwe bahola. Mubamuta omo Muyi wa Daudi; neryo Asa mughala wiwe mwabya mwami omo mwanya wiwe. Omo mughulu w’obutabali bwiwe, ekihugho mukyabyamo obuholo omo myaka 10.
2 Asa mwakola ebyuwene n’ebitunganene omo meso wa Yehova, oMungu wiwe.
3 Mwalusya omo kihugho mw’ebiherero by’eyindi miungu n’emyanya y’endata, amatsutsanga n’esyonduyi nyibuyirire, n’eritwa emiti mibuyirire.*
4 Kandi mwabwira abandu be Yuda ati basonda-sondaye Yehova oMungu w’abotata-kulu wabo, n’erikwama emighambo n’ebyalayiro biwe.
5 Neryo mwalusya omo miyi yosi ye Yuda mw’emyanya y’endata n’ebiherero by’erihisiryako obukwa. Oko mughulu wiwe, obwami mubutabyamo buna-buna.
6 Mwahimba emiyi eyiwatire e Yuda, kundi omo kihugho simwabya ebuna-buna, kandi muhatabya abasyalwa naye omo myaka eyo, kundi Yehova mwamwikalya buholo.
7 Mwabwira abandu be Yuda ati: “Tuhimbe emiyi eyi n’eritimbya kuyo kw’esyombimbo n’ehileberyo; tuhireko n’emilango n’ebikale binene-binene. Ekihugho kikine kyetu kundi twabirisonda-sonda Yehova, oMungu wetu. Twabirimusonda-sonda, naye abiritwikalya buholo oko syombande syosi.” Neryo mubabugha erihimba.
8 Omo basuda ba Asa mwabya abasuda 300 000 b’omo kihanda kya Yuda, babya bakaheka esyongabo nene-nene n’amatumo. Kandi omo basuda biwe, mwabya abasuda 280 000 b’amaka b’omo kihanda kya Benyamini. Babya bakaheka esyongabo ngengenge* n’obuta.*
9 Habere habilaba mughulu mulebe, Zera Omuetiopia mwasyalwa nabo. Abya n’abasuda 1 000 000 n’emitoka 300. Mwabya abihika e Maresha,
10 Asa mwayalwa naye. Mubayipanga busana n’amalwa omo musya we Zefata, hakuhi ne Maresha.
11 Neryo Asa mwalemba-lemba Yehova oMungu wiwe ati: “Yehova, abo ukasabula bangabya n’akaghala kutse ibabya isibawite akaghala, olo si lubanza okw’iwe. Yehova, Mungu wetu, utuwatikaye kundi tuyiketere iwe* kandi kundi tulyasyalwa n’abandu banene aba omo rina ryaghu. Yehova, iwe Mungu wetu, isiwaleka omundu oyukahola akakusinga.”
12 Neryo Yehova mwasinga Abaetiopia embere sya Asa n’embere sya Yuda; n’Abaetiopia mubatibita.
13 Asa n’abasuda ababya haghuma naye mubabakwamirira eriyahika e Gerari. Mubita Abaetiopia, erihika oko kika sihatasaka n’omughuma, kundi Yehova n’abasuda biwe mubatundula Abaetiopia. Enyuma sy’aho, abasuda be Yuda mubaheka ebindu binene ebyo banyegha omo malwa.
14 Kandi mubalwa n’emiyi yosi eyabya yitimbire oko muyi we Gerari, kundi abandu b’omo miyi eyo babya ibabirisagha busana na Yehova. Abasuda be Yuda mubaheka ebindu omo miyi yosi eyo, kundi mwabya imuli ebindu binene by’eriheka.
15 Mubalwa n’abalisya ababya bikere omo mahema. Mubaheka esyombuli nene n’esyongamia nene. Enyuma sy’aho, mubasuba e Yerusalema.
Amaelezo awehikwa
^ Ulebaye Amaana w’ebinywa.
^ Kangyi-kangyi abakaghusa emisali bo babya bakahekasyo.
^ Ni kindu ky’erilasamo omusali.
^ Kinywa kwa kinywa, “tughemere iwe.”