Emyatsi y’Emighulu y’Akabiri 15:1-19
-
Ebyo Asa akola (1-19)
15 Neryo ekirimu ky’oMungu mukyasa oko Azaria mughala wa Odedi.
2 Neryo Azaria mwayasungana na Asa, amamubwira ati: “Iwe Asa, n’inywe bandu bosi be Yuda ne Benyamini, munihulikirire. Yehova akendisyabya haghuma nenyu mughulu wosi ogho mukendisyabya imune haghuma naye. Mwamabimusondya-sondya, isimwendimubula;* aliwe mwamabimuleka, naye iniakendibaleka.
3 Oko mughulu muli,* Abaisraeli babya isibakikolera oMungu w’ekwenene, sibabya n’omuhereri oyo wangabakangirirya, kandi sibabya bakakwama emighambo.
4 Aliwe omughulu baghalawa, neryo bamasuba oko Yehova, oMungu we Israeli, n’erimusondya-sondya, mwatababisa obusu bwiwe.*
5 Oko mughulu oyo, omundu isyangabalama buholo* kundi habya obutsumbu-tsumbu bunene omo bandu b’omo bihugho mbiriri-mbiriri.
6 Ekihanda kighuma kyabya kikabughaho ekindi, n’omuyi mughuma abya akabughaho oghundi, kundi oMungu mwaleka engebe yabo iyabya putsu-putsu busana n’amaligho mbiriri-mbiriri.
7 Aliwe inywe, mubye n’akaghala, kandi isimwabunika mutima* kundi mukendisyahembwa busana n’ebyo mukakola.”
8 Asa abere abyowa ebinywa ebyo n’ebinywa by’omuminyereri Odedi, mwabya n’akaghala. Neryo mwalusya esyosanamu esikita esyonye omo kihugho kyosi kye Yuda ne Benyamini, n’omo miyi yosi y’omo kiharo ky’Ebitwa kye Efraimu eyo ahamba. Mwakokotya n’ekiherero kya Yehova ekyabya embere sy’ebaraza ya Yehova.
9 Kandi mwahindania abandu bosi be Yuda n’abe Benyamini, n’abandu abate Baisraeli ababya bikere nabo, abikalani be Efraimu, be Manase, n’abe Simeoni, abalua omo kiharo kye Israeli mo banene, bamasyayighunga oko Asa babilangira ngoko Yehova, oMungu wiwe, ane haghuma naye.
10 Neryo mubahindana haghuma e Yerusalema oko mwisi w’akasatu, w’omwaka we 15 w’obutabali bwa Asa.
11 Ekiro ekyo, mubaherera Yehova esyonume sy’esyonde 700, esyombuli 7 000 esyo balusaya oko syonyama esyo banyegha omo malwa.
12 Kandi mubayilagha omw’ikola endaghane bati bakendisondya-sondya Yehova, oMungu w’abotata-kulu wabo, n’omutima wabo wosi n’enafsi* yabo yosi.
13 Omundu wosi-wosi, angabya mulere kutse mukulu, angabya mulume kutse mukali, oyo wangaghanire erisondya-sondya Yehova, oMungu we Israeli, ryabya litolere initibwa.
14 Neryo mubalapira Yehova omo mulenge muli, omo milenge miri-miri y’obutseme, ibanemubuha omo syongunga n’omo mahembe bati bakendisikya endaghane.
15 Neryo abandu bosi be Yuda mubatsemera ebyo balyalapa, kundi mubalapa erilua oko mutima wabo wosi, kandi mubasondya-sondya oMungu wabo n’omuhwa, n’oMungu mwatabisa obusu* bwiwe. Yehova mwataleka eribikalya buholo oko syombande syosi.
16 Nibya omwami Asa mwalusya oko mukaka wiwe ye Maaka k’olusunzo lw’eribya mughole, kundi Maaka mwakokotya esanamu eyikita esyonye itoke eribya ikakolesibwa omw’iramya omuti mubuyirire.* Asa mwaterya esanamu eyo eyikita esyonye, amaponda-pondayo, n’erihisiryayo omo Musya we Kidroni.
17 Aliwe emyanya y’endata yabya iyikine omo Israeli. N’omo bine bitya, Asa mwakolera oMungu n’omutima wosi* omo ngebe* yiwe yosi.
18 Kandi Asa mwatwala omo nyumba y’oMungu w’ekwenene mw’ebindu ebyo iye na baba wiwe babya ibabiriyira mo bibuyirire, ni bugha ambu, efeza,* ehoro, n’ebindu mbiriri-mbiriri.
19 Muhatabya amalwa erihika oko mwaka we 35 w’obutabali bwa Asa.
Amaelezo awehikwa
^ Kinywa kwa kinywa, “iniakendileka imwamubana.”
^ Kinywa kwa kinywa, “omo biro binene.”
^ Kinywa kwa kinywa, “mwaleka ibamubana.”
^ Kinywa kwa kinywa, “sihabya buholo oko oyukahuluka kutse oyukingira.”
^ Kinywa kwa kinywa, “isimwakimaya ebyala byenyu.”
^ Ulebaye Amaana w’ebinywa.
^ Kinywa kawa kinywa, “mwaleka ibamubana.”
^ Ulebaye Amaana w’ebinywa.
^ Kutse “Asa syabya n’omutima owaghabene.”
^ Kinywa kwa kinywa, “biro.”
^ Ni kindu ky’obughuli ekikalua omo kitaka.
