Emyatsi y’Emighulu y’Akabiri 16:1-14
16 Omo mwaka we 36 w’obutabali bwa Asa, omwami Baasha we Israeli mwasyalwa ne Yuda. Mwatsuka eritasyahimba* omuyi we Rama, atoke erikakirya abandu erilua omo kiharo ky’omwami Asa we Yuda n’eringira mukyo.
2 Neryo Asa mwalusya efeza* n’ehoro omo byumba by’eribikamo ebindu by’obughuli by’omo nyumba ya Yehova n’eby’omo nyumba y’omwami, amatumira ebyosi ebyo by’omwami Ben-hadadi we Siria, oyo wabya ikere e Damasko. Mwamutumira n’omulaghe ono:
3 “Hali endaghane omo kati-kati kaghe naghu, n’omo kati-kati ka baba waghe na baba waghu. Ngakutumira efeza* n’ehoro. Kisi, uleke endaghane eyo wakola n’omwami Baasha we Israeli, neryo aho iniakendilua omo kiharo kyaghe.”
4 Ben-hadadi mwakwama ebyo mwami Asa abugha, neryo mwatuma abakulu b’abasuda biwe bayalwe n’emiyi ye Israeli. Mubasinga omuyi we Iyoni, Dani, Abeli-maimu, bamahamba n’amadepo wosi awabya omo miyi ya Naftali.
5 Baasha mwabya abyowa oko mwatsi oyo, mwalw’inialeka eritasyahimba* omuyi we Rama, mwalekera omubiiri oyo w’aho.
6 Neryo omwami Asa mwaghenda n’abandu bosi be Yuda, bamayaheka amabwe n’esyombagho esyo Baasha abya akahimbamo omuyi we Rama. Asa mwawatya* musyo m’omuyi we Geba n’owe Mizpa.
7 Oko mughulu oyo, omulangiri Hanani mwayasungana n’omwami Asa we Yuda, amamubwira ati: “Mughutitasinga abasuda be Siria kundi mukayiketera* omwami we Siria omo mwanya w’eriyiketera* Yehova, oMungu waghu.
8 Abasuda be Etiopia n’abe Libia si banabya banene, kandi si banabya bawite oko mitoka minene n’oko bandu banene abakaghenda oko syosabayiri.* Aliwe, Yehova mwakuwatikya erisingabo kundi muwayiketera iye.
9 Ameso wa Yehova akabya inianemutimba-timba omo kihugho kyosi, kundi anzire erikolesya akaghala kiwe eriwatikya abakamukolera n’omutima wosi.* Rero ebyo ulyakola ni bukiru; eritsuka lino, ebihanda bikendibya bikalwa naghu.”
10 Aliwe, Asa mwahitana oko mulangiri oyo, amamuhira omo ngomo kundi mwamuhitanako kutsibu busana n’ebinywa ebyo amubwira. Oko mughulu oyo, Asa mwatsuka eryaghalya n’abandi bandu.
11 Emyatsi eyilebirye Asa, eritsuka oko mwanzo erihika oko mwiso, yinahandikire omo Kitabu ky’abami be Yuda n’abe Israeli.
12 Omo mwaka we 39 w’obutabali bwiwe, Asa mwakwa obukoni b’omo bisando. Mwatoha kutsibu. N’omo analwala, mwatasondya obuwatikya bwa Yehova, aliwe mwaya eyiri abakalamaya.
13 Asa mwahola ngoko abotata-kulu wiwe bahola; mwahola oko mwaka we 41 w’obutabali bwiwe.
14 Neryo mubamuta omo yisinda nene eyo ayitakulira omo Muyi wa Daudi. Mubamuhira oko kakingo ako bakahirako ekinda, ako babya ibabiryusulyako amaghuta w’ezeri n’amaghuta awakakumba ndeke agho batakokotaya ng’awandi, mubakokotyagho omo bindu mbiriri-mbiriri. Kandi ekiro bamuta, mubamwakirya omuliro munene.*
Amaelezo awehikwa
^ Kutse “eriwatya.”
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Kutse “eriwatya.”
^ Kutse “mwatasyahimba.”
^ Kinywa kwa kinywa, “mukemera.”
^ Kinywa kwa kinywa, “w’eryemera.”
^ Kutse “syofarasi; syoshevale.”
^ Kutse “n’omutima owataghabene.”
^ Si bugha ambu batimaya Asa omo muliro oyo, aliwe mubakya omuliro owalimo ebindu ebikakumba ndeke.